18-Nov-2023

ବଲାଙ୍ଗୀର(ପ୍ରେରଣା ଖବର)-କ୍ରିକେଟକୁ ନେଇ ବଲାଙ୍ଗୀର ସମେତ ବିଭିନ୍ନ ଅଞ୍ଚଳରେ ବେଟିଂ ଜୁଆଖେଳ ଚାଲିଥିଲା । ବଲାଙ୍ଗୀର ପୋଲିସ ମଧ୍ୟ ଏହା ଉପରେ ନଜର ରଖିଥିଲା । ଶେଷରେ ଆଜି ମହାରାଷ୍ଟ୍ରର “କୁବେର ମଟକା” ଡନ ସମେତ ୧୪ଜଣ ଅଭିଯୁକ୍ତଙ୍କୁ ଧରିବାରେ ବଲାଙ୍ଗୀର ଟାଉନପୋଲିସ ସଫଳ ହୋଇଛି । ଏଥି ମଧ୍ୟରେ ମହାରାଷ୍ଟ୍ରର ୫ଜଣ ଥିବା ବେଳେ ବାକି ସମସ୍ତେ ବଲାଙ୍ଗୀର ଜିଲ୍ଲାର । ଗୁରୁବାର ରାତିରେ ବଲାଙ୍ଗୀର-ସୋନପୁର ରୋଡରେ ଥିବା କିଙ୍ଗପ୍ଲାଜା ହୋଟେଲରେ ରହି ଏମାନେ ବେଟିଂ ଚଳାଉଥିବା ବେଳେ ବଲାଙ୍ଗୀର ପୋଲିସ ଟିମ ତାଙ୍କୁ ଧରିଥିଲା । ଏଥିରେ କୁବେର ମଟକାକୁ ଚଳାଉଥିବା ଡନ ମହାରାଷ୍ଟ୍ର ଜଲଗାଁଓର ମହେନ୍ଦ୍ର ସୁଦାମ ମହାଜନ ମଧ୍ୟ ଧରାପଡିଛି । ତା ସହିତ ମହାରାଷ୍ଟ୍ରର ୫ଜଣ ଆସି କିଙ୍ଗପ୍ଲାଜା ହୋଟେଲରେ ରହି ଅନଲାଇନ କୁବେର ମଟକାକୁ ଅପରେଟ କରୁଥିଲେ । ସେମାନେ ଅନଲାଇନରେ ଏକ ଆନଡ୍ରୟଡ ଆପ ଖୋଲି ସେଥିରେ ବିଭିନ୍ନ ସ୍ଥାନରେ ଏଜେଣ୍ଟମାନଙ୍କ ଜରିଆରେ ବେଟିଂରେ ଅର୍ଥ ରୋଜଗାର କରୁଥିଲେ । ଏବେ ମୁଖ୍ୟତଃ କ୍ରୀକେଟକୁ ନେଇ ଲକ୍ଷାଧିକ ଟଙ୍କାର ବେଟିଂ ଲଗାଇ ଲୋକମାନେ ଏହି କଟକା ଗେମ ପ୍ରତି ଆଗ୍ରହ ଦେଖାଉଥିଲେ । ବଲାଙ୍ଗୀର ପୋଲିସ କୌଣସି ସୂତ୍ରରୁ ଖବର ପାଇ ଟାଉନଥାନା ଆଇଆଇସି ବିଶ୍ୱଜିତ ମନବୋଧଙ୍କ ନେତୃତ୍ୱରେ ଏକ ଟିମ କିଙ୍ଗପ୍ଲାଜା ହୋଟେଲରେ ଚଢାଉ କରିଥିଲା  ଓ ସେଠାରୁ ଏହି ଅଭିଯୁକ୍ତମାନଙ୍କୁ ଗିରଫ କରିଥିଲା । ତଦନ୍ତରେ ପୋଲିସ ଅନେକ କିଛି ସୂରାକ ପାଇଛି । କିଭଳି ଅନଲାଇନରେ ବେଟି କରି କୋଟି କୋଟି ଟଙ୍କାର କାରବାର ଚାଲିଥିଲା ତାହା ଆଜି ପୋଲିସ ଏସଡିପିଓ ତୁଫାନ ବାଗ ଟାଉନଥାନାରେ ଆୟୋଜିତ ଏକ ସାମ୍ବାଦିକ ସମ୍ବିଳନୀରେ ଖୁଲାସା କରିଛନ୍ତିି । ଗିରଫ ଅଭିଯୁକ୍ତଙ୍କ ମଧ୍ୟରେ ମହାରାଷ୍ଟ୍ରର କୁବେର ମଟକା ଡନ ମହେନ୍ଦ୍ର ସୁଦାମ ମହାଜନ,ରାହୁଲ ହିରାଲାଲ,ଅର୍ଜୁନ ଦେଓଚାନ୍ଦ ମହାଜନ,ପ୍ରବୀଣ ଗୁଲାବ ମହାଜନ,ଫିରୋଜ ଖାନ,ବଲାଙ୍ଗୀର ଗେଟସରୋବରପଡାର ହମିଦକୁମାର ଜଗତ,ସଚିନ ପାତ୍ର,କଂସାରୀପଡାର ଅଚ୍ୟୁତ ଚିରଗୁନ,ତାଲପାଲିପଡାର ଆନ୍ଥୋନୀ ନାଗ,ରାମଜୀ ପଡାର ପ୍ରହଲ୍ଲାଦ ଦର୍ଜି,ରୁଗୁଡିପଡାର ପର୍ବେଜ ଖାନ,କମ୍ବୁ ଠାକୁର,ଖଲିଆପାଲିର ସହିଦ ଖାନ,ଘସିଏନର କିଶୋର ସାହୁ ରହିଛନ୍ତି । ସେମାନଙ୍କଠାରୁ ୮ଟି ମୋବାଇଲ ଫୋନ,୨୦,୧୫୦ ଟଙ୍କାର ନୋଟ,ଗୋଟିଏ ଇନୋଭା କାର,୯ଟି ସିଳଭର ମୂର୍ତ୍ତି,ସଟ୍ଟା ସିଟ ଓ ଚାଟ ଜବତ କରାଯିବା ସହିତ ୫ଲକ୍ଷ୨୭ହଜାର୪୬୫ ଟଙ୍କାର ବ୍ୟାଙ୍କ ଜମାକୁ ଫ୍ରିଜ କରାଯାଇଥିବା ପୋଲିସ ସୂଚନା ଦେଇଛି । ଏହି ଚଢାଉରେ ଟାଉନଥାନା ଆଇଆଇସି ବିଶ୍ୱଜିତ ମନବୋଧ,ଅତିରିକ୍ତ ଆଇଆଇସି ଅନୀତା ପଟନୀଆ,ଏସଆଇ ନବୀନ ଭୋଇ,ମୋହିଣୀ ମଲ୍ଲିକ,ଅର୍ଥନୈତିକ ଅପରାଧ ଥାନାର ଅଭିନାଶ ନାୟକ,ଆକାଶ ସାମଲ,ଟାଉନଥାନା ଏଏସଆଇ ବୈକୁଣ୍ଠ ଦେହେରି,ବିଦ୍ୟାଧର ଭୋଇ ପ୍ରମୁଖ ସାମିଲଥିଲେ ।