28-Sep-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଟାଉନ୍ ଥାନା ଅଞ୍ଚଳର ତୁଳସୀନଗର ସାର ଗୋଦାମ ନିକଟରେ ଯୁବକଙ୍କୁ ମାରଣାନ୍ତକ ଆକ୍ରମଣ ଘଟଣାରେ ପୁଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏନେଇ ବଲାଙ୍ଗୀର ଟାଉନ୍ ଥାନାରେ କେସ୍ ନମ୍ବର ୪୪୬, ତାରିଖ ୨୫.୦୯.୨୦୨୬ରେ ବିଏନ୍ଏସ୍‌ର ଧାରା ୨୯୬/୧୦୯(୧)/୭୯/୩୫୧(୩)/୩(୫) ଅନୁଯାୟୀ ମାମଲା ରୁଜୁ ହୋଇଛି।

ପୁଲିସ ସୂଚନା ଅନୁଯାୟୀ, ସେପ୍ଟେମ୍ବର ୨୪ ତାରିଖ ସକାଳ ପ୍ରାୟ ୫ଟାରୁ ୬ଟା ମଧ୍ୟରେ ତୁଳସୀନଗରସ୍ଥିତ ସାର ଗୋଦାମ ନିକଟରେ ଏହି ଘଟଣା ଘଟିଥିଲା। ତୁଳସୀନଗରର ରାମଚନ୍ଦ୍ର ନାଗଙ୍କ ପୁଅ ଲିଲୁ ନାଗ (୩୫) ଓ ଆଲୋକ ବାଗର୍ତ୍ତୀଙ୍କୁ ଏକ ଗୋଷ୍ଠୀ ଅଭିଯୁକ୍ତ ଅସ୍ତ୍ରଶସ୍ତ୍ରରେ ଆକ୍ରମଣ କରିଥିବା ଅଭିଯୋଗ ହୋଇଛି।

ଅଭିଯୋଗ ଅନୁସାରେ, ଅଭିଯୁକ୍ତମାନେ ପୂର୍ବରୁ ସ୍ଥାନୀୟ ଯୁବତୀମାନଙ୍କୁ ନେଇ ଆପତ୍ତିଜନକ ମନ୍ତବ୍ୟ ଦେଉଥିଲେ। ଏହାକୁ ନେଇ ଉଭୟ ପକ୍ଷ ମଧ୍ୟରେ ବଚସା ହେବା ପରେ ଆକ୍ରମଣ ଘଟିଥିଲା। ଆକ୍ରମଣରେ ଲିଲୁ ନାଗ ଓ ଆଲୋକ ବାଗର୍ତ୍ତୀଙ୍କ ଦୁଇ ହାତର ପାପୁଲିରେ ଗଭୀର କଟା ଆଘାତ ଲାଗିଥିବା ପୁଲିସ କହିଛି। ଅଭିଯୋଗକାରୀଙ୍କ ଡାକ୍ତରୀ ପରୀକ୍ଷା ରିପୋର୍ଟ ଅପେକ୍ଷାରତ ରହିଛି।

ଏହି ଘଟଣାରେ ପୁଲିସ ତୁଳସୀନଗରର ନରସିଂହ ବାଗଙ୍କ ପୁଅ ଆଲୋକ ବାଗ (୨୬), ସାଗରପଡ଼ାର ଗଦାଧର ପଞ୍ଚବିହାରଙ୍କ ପୁଅ ଅନୁରାଗ ପଞ୍ଚବିହାର ଓରଫ ଆଜୁ (୨୦), ସାଗରପଡ଼ାର ଗୌତମ ପଞ୍ଚବିହାରଙ୍କ ପୁଅ ବାଦଲ ପଞ୍ଚବିହାର (୨୦) ଏବଂ ସୁଦପଡ଼ାର ଦେବୀଦତ୍ତ ଦାଶ ଦେବଶର୍ମାଙ୍କ ପୁଅ ଅବିନାଶ ଦାଶ ଦେବଶର୍ମା ଓରଫ ଷ୍ଟେମନ୍ (୩୦)ଙ୍କୁ ଗିରଫ କରିଛି।

ଚାରି ଅଭିଯୁକ୍ତଙ୍କୁ ୨୮ ସେପ୍ଟେମ୍ବର ୨୦୨୬ରେ ଗିରଫ କରାଯାଇ କୋର୍ଟକୁ ଚାଲାଣ କରାଯାଇଛି। ତଦନ୍ତ ସମୟରେ ପୁଲିସ ଅଭିଯୁକ୍ତ ଅନୁରାଗ ପଞ୍ଚବିହାର ଓରଫ ଆଜୁଙ୍କ ନିକଟରୁ ଏକ ଭିଭୋ ମୋବାଇଲ୍ ଫୋନ୍ ଜବତ କରିଛି। ଏହି ଫୋନ୍ ମାଧ୍ୟମରେ ଅଭିଯୁକ୍ତମାନେ ଆହତ ଯୁବକମାନଙ୍କୁ ଘଟଣାସ୍ଥଳକୁ ଡାକିଥିବା ପୁଲିସ କହିଛି।

ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ପୁଲିସର ତଦନ୍ତ ଜାରି ରହିଛି।