-+91-9937148622 |
prerana_bgr@rediffmail.com |
Sunday 22nd November 2026 |
R.N.I. Regd No. ODIODI/2010/46693
Breaking News
21-Nov-2026
ବଲାଙ୍ଗୀର(ପ୍ରେରଣା ଖବର): ସରକାରୀ ଚାକିରି କରାଇ ଦେବାର ପ୍ରଲୋଭନ ଦେଖାଇ ବେକାର ଯୁବକଙ୍କ ଠାରୁ ଲକ୍ଷାଧିକ ଟଙ୍କା ଠକେଇ ଅଭିଯୋଗରେ ବଲାଙ୍ଗୀର ପୁଲିସ ଜଣେ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ପୁଇଁତଳା ଥାନା ଅନ୍ତର୍ଗତ ବୁବେଲ ଗ୍ରାମର ବେଣୁଧର ନାଏକଙ୍କ ପୁଅ ରୋନିତ ନାଏକ (୩୦)। ପୁଲିସର ସୂଚନା ଅନୁଯାୟୀ, ବରଗଡ଼ ଜିଲ୍ଲା ମହୁଲପାଲି ଗ୍ରାମର ଦୋଳମଣି ରଣାଙ୍କ ପୁଅଙ୍କୁ ଏଲ୍ଟିଆର୍ ଯୋଜନାରେ ସରକାରୀ ଶିକ୍ଷକ ଚାକିରି କରାଇଦେବାର ପ୍ରତିଶ୍ରୁତି ଦେଇ ଅଭିଯୁକ୍ତ ୨୦୨୪ ମସିହାରେ ତିନିଟି କିସ୍ତିରେ ୮ ଲକ୍ଷ ଟଙ୍କା ନେଇଥିଲେ। ଅଭିଯୋଗ ଅନୁସାରେ, ଟଙ୍କା ନେବା ପରେ ଚାକିରି କରାଇ ନଦେବା ସହ ଟଙ୍କା ମଧ୍ୟ ଫେରାଇ ନଥିଲେ ।ଗତ ୨୧ ନଭେମ୍ବରରେ ଡୋଳାମଣି ଓ ତାଙ୍କ ପୁଅ ଟଙ୍କା ଫେରସ୍ତ ମାଗିବାକୁ ଅଭିଯୁକ୍ତଙ୍କ ଘରକୁ ଯାଇଥିବା ବେଳେ ଅଭିଯୁକ୍ତ ଓ ତାଙ୍କ ସହଯୋଗୀ ମିଶି ଲୁହା ରଡ୍ରେ ପୁଅକୁ ଆକ୍ରମଣ କରିଥିବା ଏବଂ ସାର୍ଟ ଚିରି ଧମକ ଦେଇଥିବା ଅଭିଯୋଗ ହୋଇଛି।ଏହି ଘଟଣାରେ ପୁଲିସ ଆହତଙ୍କ ଚିରା ସାର୍ଟ, ଅଭିଯୁକ୍ତଙ୍କ ମୋବାଇଲ୍ ଫୋନ୍ ଓ ଗୋଟିଏ ଲୁହା ରଡ୍ ଜବତ କରିଛି । ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରାଯାଇଛି ।ତଦନ୍ତ ବେଳେ ଅଭିଯୁକ୍ତ ଅନ୍ୟ ତିନି ଜଣଙ୍କଠାରୁ ମଧ୍ୟ ସରକାରୀ ଚାକିରି କରାଇଦେବା ନାଁରେ ଟଙ୍କା ନେଇଥିବା ଅଭିଯୋଗ ସାମ୍ନାକୁ ଆସିଛି। ସଇଁତଳାର ପ୍ରଦୀପ କୁମାର ବାଗଙ୍କଠାରୁ ୨ ଲକ୍ଷ, ବାସୁଦେବ ମଲ୍ଲିକଙ୍କ ଠାରୁ ୧ ଲକ୍ଷ ଏବଂ ରାକେଶ ପାତ୍ରଙ୍କ ଠାରୁ ୩ ଲକ୍ଷ ଟଙ୍କା ନେଇଥିବା ଅଭିଯୋଗ ରହିଛି । ଜେ.ଇ.ଇ, କିରାଣି ଓ ପିଅନ ଚାକିରି କରାଇ ଦେବାର ପ୍ରତିଶ୍ରୁତି ଦେଇ ଏହି ଅର୍ଥ ନେଇଥିବା କୁହା ଯାଇଛି । ଏନେଇ ବଲାଙ୍ଗୀର ଟାଉନ୍ ଥାନାରେ ମଧ୍ୟ ଅନ୍ୟ ଏକ ମାମଲା ରୁଜୁ ହୋଇଛି। ପୁଲିସର ସୂଚନା ଅନୁସାରେ, ଅଭିଯୁକ୍ତଙ୍କ ନାମରେ ପୂର୍ବରୁ ମଧ୍ୟ ପୁଇଁତଳା ଥାନାରେ ଦୁଇଟି ମାମଲା ରହିଛି । ଅନ୍ୟପକ୍ଷରେ, ସରକାରୀ ଚାକିରି କରାଇଦେବା ନାଁରେ କେହି ଟଙ୍କା ମାଗିଲେ କିମ୍ବା ଉଚ୍ଚପଦସ୍ଥ ଅଧିକାରୀଙ୍କ ସହ ସମ୍ପର୍କ ଥିବା ଦାବି କରି ପ୍ରଲୋଭିତ କଲେ ତାଙ୍କ କଥାରେ ନ ପଡ଼ିବାକୁ ବଲାଙ୍ଗୀର ପୁଲିସ ସାଧାରଣ ଜନତା, ବିଶେଷ କରି ବେକାର ଯୁବକ ଓ ଚାକିରି ଆଶାୟୀଙ୍କୁ ସତର୍କ କରାଇଛି ।