-+91-9937148622 |
prerana_bgr@rediffmail.com |
Sunday 22nd November 2026 |
R.N.I. Regd No. ODIODI/2010/46693
Breaking News
21-Nov-2026
ରିପୋର୍ଟ : ମଳୟ ମିଶ୍ର
ବଲାଙ୍ଗିର: ଗତ କିଛିବର୍ଷ ହେଲା ବଲାଙ୍ଗିର କ୍ଷୁଦ୍ର ଜଳସେଚନ ବିଭାଗର ପ୍ରକଳ୍ପଗୁଡିକ ବସ୍ତୁତଃ ସରକାରୀ ଯୋଜନାର ବିକଳାଙ୍ଗ ଗର୍ଭପାତରେ ପରିଣତ ହୋଇଥିବା ଜନସାଧାରଣଙ୍କ ମଧ୍ୟରେ ସମାଲୋଚନା ପ୍ରକାଶ ପାଇଛି । ତାହା ଏମ୍ ଆଇ ପି ହେଉ ବା ଚେକ୍ ଡ୍ୟାମ୍ , ପ୍ରତିବର୍ଷ ଶହ ଶହ କୋଟିର ଟଙ୍କା ପାଣିରେ ପଡୁଛି । ସ୍ଥାନୀୟ ରାଜନେତା ବନାମ ନିର୍ବାଚିତ ଲୋକପ୍ରତିନିଧି ବା ଶାସନକ୍ଷମତାରେ ଥିବାଦଳର ନେତା ଓ ସେମାନଙ୍କର ତଥାକଥିତ କର୍ମୀଙ୍କ ସମେତ ପ୍ରଶାସନ ଏବଂ ବିଭାଗୀୟ ଯନ୍ତ୍ରୀଙ୍କ ପାଇଁ ଏହି ବିଭାଗର ପ୍ରକଳ୍ପଗୁଡିକ ଦୁର୍ନୀତିର ଦୁହାଁଳିଆ ଗାଈ ପାଲଟିଯାଇଛି ।
ବିଡମ୍ବନାର ବିଷୟ ଏହା ଯେ , ବଛା ବଛା ଦୁର୍ନୀତିଗ୍ରସ୍ତ କନିଷ୍ଠ ଯନ୍ତ୍ରୀ , ସହକାରୀ ଯନ୍ତ୍ରୀ , ନିର୍ବାହୀଯନ୍ତ୍ରୀ ବା ଅଧୀକ୍ଷଣ ଯନ୍ତ୍ରୀମାନଙ୍କୁ ଏହି ବିଭାଗରେ ଏଥିପାଇଁ ଥଇଥାନ କରାଯାଇ ପ୍ରକଳ୍ପର ବିଫଳତା ପାଇଁ ସମୀକ୍ଷାପୂର୍ବକ ଉତ୍ତରଦାୟୀ ହେବା ପୂର୍ବରୁ ଅଳ୍ପସମୟର ଅବଧୀ ଭିତରେ ସେମାନେ ଅନ୍ୟତ୍ର ବଦଳି ହୋଇ ପଳାଉଛନ୍ତି ।
ବଲାଙ୍ଗିର କ୍ଷୁଦ୍ର ଜଳସେଚନ ଡିଭିଜନ ଅନ୍ତର୍ଗତ ବଲାଙ୍ଗିର , ପାଟଣାଗଡ , ଟିଟିଲାଗଡ , ଖପ୍ରାଖୋଲ ଆଦି ସବ୍- ଡିଭିଜନରେ ଗତ କିଛିବର୍ଷରେ ହୋଇଥିବା କେତେକ ଏମ୍ ଆଇ ଓ ଚେକ୍ ଡ୍ୟାମ୍ ଗୁଡିକୁ ଅନୁଧ୍ୟାନ କରାଗଲେ , ଉପରୋକ୍ତ ଅଭିଯୋଗର ସତ୍ୟତା ଜଣାପଡେ । ଏଥିରୁ ଗୋଟିଏ ଦୁଇଟି ଉଦାହରଣ ଯଥେଷ୍ଟ ।
ବଲାଙ୍ଗିର ସହର ବା ଜିଲ୍ଲା ସଦର ମହକୁମାର ଗନ୍ଧରେଲ୍ ଏମ୍ ଆଇ ପି ଓ ଲକ୍ଷ୍ମୀଜୋର୍ ଚେକ୍ ଡ୍ୟାମ୍ ଇ ଏହାର ଜ୍ଳଳନ୍ତ ପ୍ରମାଣ । ଏହାର ପରିଚାଳନାଗତ ତ୍ରୁଟି ନିମନ୍ତେ ବିଗତବର୍ଷ ଓ ଗତବର୍ଷ ଏହାର ଉଦ୍ ବୃତ୍ତ ବର୍ଷା ବା ବନ୍ୟାଜଳ ସହରଭିତରେ ପଶିଯାଇ ବ୍ୟାପକ କ୍ଷୟକ୍ଷତି ଘଟାଇଥିଲା । ଏହାର ନିର୍ମାଣ ଓ ମରାମତି ପାଇଁ ହୋଇଥିବା କୋଟି କୋଟି ଟଙ୍କାର ବ୍ୟୟକୁ ନେଇ ରାଜନୈତିକ ଦଳ ମଧ୍ୟରେ ବିବାଦୀୟ ପରିସ୍ଥିତି ସୃଷ୍ଟି ହେଲା । ଅଦ୍ୟାବଧି ଏହା ସମସ୍ୟା ହୋଇ ରହିଛି ।
ଜିଲ୍ଲା ବା ଡିଭିଜନରେ କରାଯାଇଥିବା ଖପ୍ରାଖୋଲରୁ ଆରମ୍ଭ କରି ସଇଁନ୍ତଳା ପର୍ଯ୍ୟନ୍ତ ଅଞ୍ଚଳରେ ଚେକ୍ ଡ୍ୟାମ୍ ନିର୍ମାଣରେ ବ୍ୟାପକ ନିମ୍ନମାନର କାମ , ମିଥ୍ୟାବିଲ୍ ଓ ବାଟମାରଣା ହୋଇଥିବା ଅଭିଯୋଗର ସଠିକ୍ ତଦନ୍ତ ହେଲାନାହିଁ । ଏଷ୍ଟିମେଟ୍ ଉଲଙ୍ଘନ କରାଯାଇ ଶସ୍ତାସିମେଣ୍ଟ , ନିର୍ଦ୍ଧାରିତ ଓଜନରୁ କମ୍ ଲୁହାଛଡ ଓ କମ୍ ଗଭୀରତାର ଖାଲ ଖୋଳି ନରମ ମାଟି ଜାଗାରେ ହାର୍ଡ ସଏଲ୍ ଦର୍ଶାଯାଇ ଏମ୍ ବି ରେ ବିଲ୍ କରାଯାଇଥିବା ଅଭିଯୋଗ ହେଉଛି ।
ମନ୍ତ୍ରୀବିଧାୟକଙ୍କ ସୁପାରିଶରେ ରାଜନୈତିକ କୁଜି ଠିକାଦାରଙ୍କୁ ତୋଷଣନୀତିରେ କାମ ଦିଆଯାଇ ରୀତିମତ ଲୁଣ୍ଠନ କରାଯାଇଆସୁଛି । ଗତବର୍ଷ ଓ ଚଳିତବର୍ଷର ବର୍ଷାଋତୁର ସାମାନ୍ୟ ବନ୍ୟାରେ ବହୁ ଚେକ୍ ଡ୍ୟାମ୍ ଭାଙ୍ଗିଯାଇଛି ଓ ସେସବୁର ମରାମତିର ବର୍ଦ୍ଧିତଆକଳନ କରାଯାଇ ସରକାରଙ୍କୁ ଆହୁରି ଅର୍ଥ ମଗାଯାଇଛି । ବିଲ୍ ପେମେଣ୍ଟକୁ ଉପରୁ ଅଟକାଇ ରଖି ଓ ଅଧା ଅଧା କରି ଉପରୁ ତଳ ଯାଏ ବିପୁଳ ପିସି ଆଦାୟ କରାଯାଉଛି ବୋଲି ଅଭିଯୋଗ ହେଉଛି ।
ଏବେ ଏଠାରେ ଏସ୍ ଇ ଥିବା ଇଂ ରବୀନ୍ଦ୍ର କୁମାର ସେଠୀ ବଦଳି ହୋଇ ବ୍ରହ୍ମପୁରର ଋଷିକୂଲ୍ୟା ନଦୀବନ୍ଧ ଯୋଜନାକୁ ଚୁପ୍ ଚାପ୍ ଖସିଗଲେ ଓ ଏବେ ତାଙ୍କସ୍ଥାନରେ ଜଣେ ଭାରପ୍ରାପ୍ତ ନିର୍ବାହୀଯନ୍ତ୍ରୀ ଆସିଛନ୍ତି । ଖପ୍ରାଖୋଲ ଓ ପାଟଣାଗଡ ସବ୍ ଡିଭିଜନ ଦୁଇଟି ଦାୟିତ୍ବରେ ପୂର୍ବରୁ ଏହି ଡିଭିଜନରେ କନିଷ୍ଠଯନ୍ତ୍ରୀ ଓ ଟିଟିଲାଗଡରେ ଥିବା ଇଂ ମୁରଲୀଧର ମହାଲିକ ଏସ ଡି ଓ ଅଛନ୍ତି । ସେହିପରି ବଲାଙ୍ଗିର ଓ ଟିଟିଲାଗଡ ସବ୍ ଡିଭିଜନ ଦୁଇଟି ଦାୟିତ୍ବରେ ଇଂ ମାନଭଞ୍ଜନ ଶତପଥୀ ଅଛନ୍ତି । ବଲାଙ୍ଗିର ଚିଫ୍ ଇଞ୍ଜିନିୟରଙ୍କ ଅଧୀନରେ ରହିଥିବା ସୋନପୁର ଡିଭିଜନରେ ମଧ୍ୟ ଅନୁରୂପ ଦୁର୍ନୀତି ଓ ଅନିୟମିତତା ଚାଲିଥିବା ଚର୍ଚ୍ଚାହେଉଛି ।
ଏଣୁ ଏହାକୁ ଚଳିତ ବିଧାନସଭାରେ ଏକ ପ୍ରସଙ୍ଗ ଭାବରେ ଉପସ୍ଥାପିତ କରାଯାଇ ସମଗ୍ର ଡିଭିଜନର ପ୍ରକଳ୍ପଗୁଡିକର ଏକ ଉଚ୍ଚସ୍ତରୀୟ ଭିଜିଲାନ୍ସ ତଦନ୍ତ କରାଯିବାକୁ ଜନସାଧାରଣ ଦାବି କରୁଛନ୍ତି ।
ପରେ ଏହି ବିଭାଗର ପୁଙ୍ଖାନୁପୁଙ୍ଖ ଅନୁସନ୍ଧାନମୂଳକ ରିପୋର୍ଟ ପ୍ରକାଶ ପାଇବ ।