19-Jun-2026

ବଲାଙ୍ଗିର(ପ୍ରେରଣା ଖବର): ବଲାଙ୍ଗିର ସହରରେ ଖୁଲମ୍ ଖୁଲ୍ଲା ଅପରାଧୀଙ୍କ ଆତଙ୍କରାଜ ବଢ଼ି ଚାଲିଛି। ବିଭିନ୍ନ ଆପ୍ ମାଧ୍ୟମରେ ଅପରାଧୀକ କାର୍ଯ୍ୟକଳାପ ସଞ୍ଚାଳନ,ସାଇବର୍ ଅପରାଧ,ଆର୍ଥିକ ଜାଲିଆତି ଏବଂ ବେଆଇନ ଡ୍ରଗ୍ସ ଚୋରା କାରବାର ଭଳି ସଂଗଠିତ ଅପରାଧ ବ୍ୟାପକ ଭାବେ ବୃଦ୍ଧି ପାଇବାରେ ଲାଗିଛି, ଯାହା ଜିଲ୍ଲାର ଜନତାଙ୍କ ସୁରକ୍ଷା ପ୍ରତି ଏକ ବଡ଼ ବିପଦ ସୃଷ୍ଟି କରିପାରେ ବୋଲି ଅନୁମାନ କରାଯାଉଛି। ସବୁଠାରୁ ବଡ ଗମ୍ଭୀର ବିଷୟ ହେଉଛି, ୨୦ ରୁ ୨୫ ବର୍ଷ ଭିତରେ ଥିବା ଯୁବ ଗୋଷ୍ଠୀ ଏହି ଡ୍ରଗ୍ସ ବ୍ୟବହାରରେ ଅନେକ ଅପରାଧୀକ କାର୍ଯ୍ୟକଳାପରେ ଲିପ୍ତ ରହି ନିଜର ଜୀବନକୁ ନଷ୍ଟ କରିବା ସହ ସମାଜ ପ୍ରତି ବିପଦ ସୃଷ୍ଟି କରୁଛନ୍ତି।ଯୁବକ ମାନେ ଦେଶର ମେରୁଦଣ୍ଡ ବୋଲି କହୁଥିବା ବେଳେ ସେହି ଯୁବକ ମାନେ ଡ୍ରଗ୍ସ ର ବଶବର୍ତ୍ତୀ ହୋଇ ଦେଶ, ରାଜ୍ୟ ତଥା ଜିଲ୍ଲା ପାଇଁ ବିପଦ ସୃଷ୍ଟି କରୁଥିବା ପରିଲକ୍ଷିତ ହେଉଛି।ସହରରେ ବେଆଇନ ଡ୍ରଗ୍ସ କାରବାର ଜୋରଦାର ଚାଲିଥିବା ବେଳେ ପୋଲିସ ବିପୁଳ ପରିମାଣରେ କଫ ସିରପ ଜବତ କରୁଛି। ହେଲେ ପୋଲିସ ଡ୍ରଗ୍ସ କାରବାରକୁ ସମ୍ପୂର୍ଣ୍ଣ ନିୟନ୍ତ୍ରଣ କରିବାରେ ଫେଲ୍ ମାରିଛି। କୋଟି କୋଟି ଟଙ୍କାର ଡ୍ରଗ୍ସ କାରବାର କରୁଥିବା ବ୍ୟବସାୟୀ ମାନେ ମାଲାମାଲ୍ ହେଉଥିବା ବେଳେ ଏହାକୁ ବ୍ୟବହାର କରୁଥିବା ଯୁବକ ମାନେ ନିଜର ହିତା ହିତ ଜ୍ଞାନ ହଜାଇ ଅପରାଧ କରିବା ପାଇଁ ପଛାଉ ନାହାନ୍ତି। ଡ୍ରଗ୍ସ ସେବନ କରି ସହର ମଧ୍ୟରେ ଅନେକ ଦୁଇ ଚକିଆ ଯାନ ରେ ଦୁଇ ରୁ ତିନି ଜଣ ଯୁବକ ବସି ନିଶା ପ୍ରଭାବରେ ତୀବ୍ର ବେଗରେ ଗାଡ଼ି ଚଳାଉଥିବା ବେଳେ ପୋଲିସ ଏମାନଙ୍କୁ ନିୟନ୍ତ୍ରଣ କରିବାରେ ବିଫଳ ହୋଇଛି। ସହରରେ ଅବାଧରେ ଘୁରି ବୁଲୁଛି ବେଆଇନ ବନ୍ଧୁକ ଏବଂ ମାରଣାସ୍ତ୍ର।ଶାନ୍ତିର ସହର ବଲାଙ୍ଗିର ଏବେ ଅଶାନ୍ତ ହୋଇ ପଡିଛି।ସାଧାରଣ ଜନତାଙ୍କ ମଧ୍ୟରେ ଭୟର ଲହରୀ ଖେଳିଯାଇଛି। ପ୍ରକାଶଥାଉକି,  ୨୦୨୪ ସାଧାରଣ ନିର୍ବାଚନ ସମୟରେ ତତ୍କାଳୀନ ବିଜେପି ର କେନ୍ଦ୍ରୀୟ ସଭାପତି ଜେ.ପି ନଡ୍ଡା ଓଡ଼ିଶା ପାଇଁ ମୋଦୀ ଙ୍କ ଗ୍ୟାରେଣ୍ଟି ସଙ୍କଳ୍ପପତ୍ର ଉନ୍ମୋଚନ କରିଥିଲେ।ଉକ୍ତ ସଂକଳ୍ପପତ୍ରରେ ଓଡ଼ିଶାକୁ ନିଶାମୁକ୍ତ ରାଜ୍ୟରେ ପରିଣତ କରିବା ପାଇଁ ମୋଦୀ ଙ୍କ ନାମରେ ଗ୍ୟାରେଣ୍ଟି ଦିଆ ଯାଇଥିଲା।କିନ୍ତୁ ବିଜେପି ଶାସନର ଦୁଇ ବର୍ଷ ବିତିଯାଇଥିଲେ ମଧ୍ୟ ଓଡ଼ିଶାରେ ନିଶା ନିବାରଣ ହେବା ପରିବର୍ତ୍ତେ ଅଧିକ ମାତ୍ରାରେ କାରବାର ବୃଦ୍ଧି ପାଇଛି।ଏହି ନିଶା କାରବାରର ପ୍ରାଦୁର୍ଭାବ ଅନ୍ୟ ଜିଲ୍ଲା ଅପେକ୍ଷା ବଲାଙ୍ଗିର ଜିଲ୍ଲାରେ ବିଶେଷ ଭାବରେ ଦେଖାଦେଇଛି। ସୂଚନାରୁ ଜଣାପଡ଼େ ୨୦୦୦ ମସିହା ରେ ରାଜ୍ୟର ଅବକାରୀ ରାଜସ୍ୱ ୧୩୫ କୋଟି ୩୫ ଲକ୍ଷ ଟଙ୍କା ଥିବା ବେଳେ ଏବେ କୁଆଡେ ତାହା ୧୦ ହଜାର କୋଟି ଟଙ୍କାରୁ ଅଧିକ ହେବ ବୋଲି ସରକାର ଆକଳନ କରୁଥିବା ଚର୍ଚ୍ଚା ଜୋର୍ ଧରିଛି। ଗୋଟିଏ ପଟେ ସରକାର ନିଶାମୁକ୍ତ ଓଡିଶା ଗଠନ କରିବାର ସଂକଳ୍ପ ନେଉଥିବା ବେଳେ ଅନ୍ୟ ପଟେ ରାଜ୍ୟ ରାଜସ୍ବ ବୃଦ୍ଧି ପାଇଁ ନିଶା କାରବାର ବଢ଼ାଇ ରାଜସ୍ୱ ଆଦାୟ ପାଇଁ ଯୋଜନା କରୁଛନ୍ତି। ବିଜେପି ଶାସିତ ରାଜ୍ୟ ବିହାର ଏବଂ ଗୁଜରାଟ ରେ ସମ୍ପୂର୍ଣ୍ଣ ନିଶା ନିବାରଣ ଲାଗୁ କରାଯାଇ ଥିବା ବେଳେ ଓଡ଼ିଶାକୁ ମଧ୍ୟ ନିଶା କାରବାର କବଳରୁ ମୁକ୍ତ କରି ଏକ ସୁସ୍ଥ ସମାଜ ଗଠନରେ ସହାୟକ ହେଲେ ମୋଦୀ ଙ୍କ ସ୍ବପ୍ନ ସାକାର ହେବ।