-+91-9937148622 |
prerana_bgr@rediffmail.com |
Saturday 21st November 2026 |
R.N.I. Regd No. ODIODI/2010/46693
Breaking News
20-Nov-2026
ଟିଟିଲାଗଡ(ସଞ୍ଜୟ କୁମାର ନାୟକ)- ରାଜ୍ୟ ସରକାରଙ୍କ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ସରକାରୀ କର୍ମଚାରୀଙ୍କ ବଦଳି ନେଇ ସ୍ପଷ୍ଟ ନିର୍ଦ୍ଦେଶନାମା ଜାରି ହୋଇଥିଲେ ମଧ୍ୟ ଏହାକୁ ଖୋଲାଖୋଲି ଉଲ୍ଲଂଘନ କରାଯାଉଥିବା ଅଭିଯୋଗ ହୋଇଛି । ନିର୍ଦ୍ଦିଷ୍ଟ ସମୟସୀମା ପରେ ବି ଜଣେ ଅଧିକାରୀ ଗୋଟିଏ ସ୍ଥାନରେ ଦୀର୍ଘଦିନ ଧରି ରହିବା ଘଟଣା ଏବେ ପ୍ରଶାସନିକ ସ୍ୱଚ୍ଛତା ଉପରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି ।
ଓଡ଼ିଶା ସରକାରଙ୍କ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ସରକାରୀ କର୍ମଚାରୀଙ୍କ ବଦଳି ନୀତି ସମ୍ପର୍କିତ ବ୍ୟାପକ ମାର୍ଗଦର୍ଶିକା ଜାରି କରାଯାଇଥିଲା। ମାତ୍ର ଏହି ସରକାରୀ ନିୟମାବଳୀକୁ ଅଣଦେଖା କରାଯାଉଥିବା ଦେଖିବାକୁ ମିଳିଛି। ଅଧିକାରୀଙ୍କ ବଦଳି ନିର୍ଦ୍ଦେଶ ଆସିବା ପରେ ମଧ୍ଯ ପୁଣି ତାକୁ ବାତିଲ କରାଯାଉଥିବା ଦେଖିବାକୁ ମିଳୁଛି। ତାହେଲେ ଏହାର କାରଣ କଣ ? ଯେଉଁ ଅଧିକାରୀଙ୍କ ବଦଳି ବାତିଲ ହେଉଛି ସେମାନଙ୍କ ବିରୁଦ୍ଧରେ ଭିଜିଲାନ୍ସ ତଦନ୍ତ କରାଗଲେ ବହୁତ କିଛି ତଥ୍ୟ ପଦାକୁ ଆସିବ ବୋଲି ସାଧାରଣରେ ଚର୍ଚ୍ଚା ହେଉଛି।
କୌଣସି ଅତିରିକ୍ତ କାର୍ଯ୍ୟକାଳ ପ୍ରଶାସନିକ ମାର୍ଗଦର୍ଶିକା ଏବଂ ମାନ୍ୟବର ସୁପ୍ରିମକୋର୍ଟଙ୍କ ପ୍ରତିଷ୍ଠିତ ଆଇନର ସିଧାସଳଖ ଉଲ୍ଲଂଘନ କରୁଛି। 'ଷ୍ଟେଟ୍ ଅଫ୍ ୟୁପି ବନାମ ସିୟା ରାମ' ଏବଂ 'ସୋମେଶ ତିୱାରୀ ବନାମ ୟୁନିଅନ୍ ଅଫ୍ ଇଣ୍ଡିଆ' ମାମଲାରେ ସର୍ବୋଚ୍ଚ ନ୍ୟାୟାଳୟ ସ୍ପଷ୍ଟ ରାୟ ଦେଇଛନ୍ତି ଯେ, ପ୍ରଶାସନିକ ବ୍ୟବସ୍ଥାରେ ନ୍ୟସ୍ତସ୍ୱାର୍ଥ, ଦୁର୍ନୀତି ଏବଂ ଏକଚାଟିଆ କାରବାରକୁ ରୋକିବା ପାଇଁ ବଦଳି ନୀତି ଅତ୍ୟନ୍ତ ଜରୁରୀ।
ସୁପ୍ରିମକୋର୍ଟଙ୍କ ମତାନୁଯାୟୀ, କୌଣସି ସରକାରୀ କର୍ମଚାରୀ ଯେପରି ନିଜର ବ୍ୟକ୍ତିଗତ ସମ୍ପର୍କ ବଢ଼ାଇ ସରକାରୀ କର୍ତ୍ତବ୍ୟରେ ଅବହେଳା ନକରନ୍ତି, ସେଥିପାଇଁ ବଦଳି ଏକ ପ୍ରଶାସନିକ ଆବଶ୍ୟକତା। ବିନା କୌଣସି ବିଶେଷ ଜନସ୍ୱାର୍ଥରେ ବଦଳି ନୀତିକୁ ପାଳନ ନକରିବା ପ୍ରଶାସନିକ ଏକଚାଟିଆ ମନୋଭାବ ଏବଂ ସମ୍ଭାବ୍ୟ ଦୁର୍ନୀତିକୁ ପ୍ରୋତ୍ସାହନ ଦେଇଥାଏ। ତେବେ ବିଭିନ୍ନ ଅଧିକାରୀଙ୍କ ଦୀର୍ଘଦିନର ରହଣି ପଛରେ ନ୍ୟସ୍ତସ୍ୱାର୍ଥ ଏବଂ ଉଚ୍ଚପଦସ୍ଥ ଅଧିକାରୀଙ୍କ ସୁରକ୍ଷା ରହିଥିବା ନେଇ ଏବେ ସାଧାରଣରେ ଚର୍ଚ୍ଚା ଜୋର ଧରିଛି। ସରକାରୀ ନିୟମ ଓ ସୁପ୍ରିମକୋର୍ଟଙ୍କ ଗାଇଡଲାଇନକୁ ଅଣଦେଖା କରି ଗୋଟିଏ ସ୍ଥାନରେ ଜମି ରହିଥିବା ସମ୍ପୃକ୍ତ ଅଧିକାରୀଙ୍କ ବିରୋଧରେ ପ୍ରଶାସନ କେବେ କାର୍ଯ୍ୟାନୁଷ୍ଠାନ ଗ୍ରହଣ କରୁଛି, ତାହା ଦେଖିବାକୁ ବାକି ରହିଲା ।