-+91-9937148622 |
prerana_bgr@rediffmail.com |
Friday 20th November 2026 |
R.N.I. Regd No. ODIODI/2010/46693
Breaking News
19-Nov-2026
ଝରଣିପାଲି, (ପ୍ରେରଣା ଖବର) ଅଗଲପୁର ବ୍ଲକ୍ ଅନ୍ତର୍ଗତ ଝରଣିପାଲି ଗ୍ରାମ ପଞ୍ଚାୟତର ପଣ୍ଡାକିଟାଲ ଗ୍ରାମରେ ରବି ଋତୁ ୨୦୨୬-୨୭ ଅବସରରେ କମ୍ପ୍ରେନସିଭ ରାଇସ ଫଲୋ ମେନେଜମେଣ୍ଟ (ସିଆରଏଫଏମ) ଯୋଜନା ଅନ୍ତର୍ଗତ ଏକ ଚାଷୀ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଯାଇଛି l ଗ୍ରାମ୍ୟ କୃଷି କର୍ମଚାରୀ ବୈକୁଣ୍ଠ ଜଗତ ଓ କୃଷକ ସାଥୀ କୃଷକ ସାଥି ଙ୍କ ଆହ୍ୱାନକ୍ରମେ ଆୟୋଜିତ ଏହି କାର୍ଯ୍ୟକ୍ରମରେ ଝରଣିପାଲି ସରପଞ୍ଚ ଶ୍ରୀମତୀ ସୁନିତା ସାହୁ, ସ୍ଥାନୀୟ କୃଷି ଇନ୍ପୁଟ୍ ଡିଲର ଏବଂ ସିଆରପି ଯଶୋଦା ବାଗ ଯୋଗଦେଇ ଚାଷୀମାନଙ୍କୁ ଉତ୍ସାହିତ କରିଥିଲେ। କାର୍ଯ୍ୟକ୍ରମରେ ଧାନ ଅମଳ ପରେ ପତିତ ରହୁଥିବା ଜମିରେ ଅବଶିଷ୍ଟ ମାଟିର ଆର୍ଦ୍ରତାକୁ ଉପଯୋଗ କରି ମୁଗ, ବିରି, ମସୁର ଓ ସୋରିଷ ଆଦି ଡାଲି ଓ ତୈଳବୀଜ ଫସଲ ଚାଷ କରିବାକୁ ଚାଷୀମାନଙ୍କୁ ପରାମର୍ଶ ଦିଆଯାଇଥିଲା। ଏହାଦ୍ୱାରା ପତିତ ଜମିର ସଦୁପଯୋଗ ସହ ଫସଲ ବିବିଧକରଣ, ମାଟିର ଉର୍ବରତା ବୃଦ୍ଧି ଓ ସ୍ଥାୟୀ କୃଷି ପ୍ରଣାଳୀକୁ ପ୍ରୋତ୍ସାହନ ମିଳିପାରିବ ବୋଲି ଆଲୋକପାତ କରାଯାଇଥିଲା l ଏଥିସହିତ ଉନ୍ନତମାନର ବିହନ ବ୍ୟବହାର, ବିହନ ବିଶୋଧନ, ସଠିକ୍ ବୁଣା ପ୍ରଣାଳୀ, ସାର ପରିଚାଳନା ଏବଂ ରୋଗପୋକ ନିୟନ୍ତ୍ରଣ ସମ୍ପର୍କରେ ଚାଷୀମାନଙ୍କୁ ବୈଷୟିକ କୃଷି ପରାମର୍ଶ ପ୍ରଦାନ କରାଯାଇଥିଲା l ଏହି ଅବସରରେ ସିଆରଏଫଏମ ଯୋଜନା ଅନ୍ତର୍ଗତ ବିଭିନ୍ନ ଡାଲି ଓ ତୈଳବୀଜ ଫସଲର ବିହନ ଚାଷୀମାନଙ୍କୁ ବଣ୍ଟନ କରାଯାଇଥିଲା। କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ଚାଷ କାର୍ଯ୍ୟ ପାଇଁ ଉପଯୁକ୍ତ ସମୟରେ ବିହନ ଯୋଗାଇ ଦିଆଯାଇଥିବାରୁ ଚାଷୀମାନେ ସନ୍ତୋଷ ଓ ଆଗ୍ରହ ପ୍ରକାଶ କରିବା ସହ ବିଭାଗର ଏହି ପଦକ୍ଷେପକୁ ସ୍ୱାଗତ କରିଥିଲେ l ପତିତ ଜମିର ସଦୁପଯୋଗ, ମୃତ୍ତିକାର ସ୍ୱାସ୍ଥ୍ୟ ସୁରକ୍ଷା, ଫସଲ ଉତ୍ପାଦନ ବୃଦ୍ଧି ଏବଂ ଚାଷୀଙ୍କ ଆୟ ବୃଦ୍ଧି ମାଧ୍ୟମରେ କୃଷି କ୍ଷେତ୍ରକୁ ଅଧିକ ସମୃଦ୍ଧ କରିବା ହିଁ ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା l