-+91-9937148622 |
prerana_bgr@rediffmail.com |
Thursday 19th November 2026 |
R.N.I. Regd No. ODIODI/2010/46693
Breaking News
18-Nov-2026
ଭୁବନେଶ୍ୱର(ମୁରଲୀଧର ମିଶ୍ର): ସମ୍ଭାବ୍ୟ ବାତ୍ୟା ‘ଅକଓ୍ୱନ’ର ମୁକାବିଲା ଏବଂ ସହରବାସୀଙ୍କ ଧନଜୀବନ ସୁରକ୍ଷା ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ବ୍ୟାପକ ପ୍ରସ୍ତୁତି ଆରମ୍ଭ ହୋଇଛି। ପାଣିପାଗ ବିଭାଗର ସତର୍କ ସୂଚନା ଅନୁଯାୟୀ, ନଭେମ୍ବର ୧୯ରୁ ୨୨ ତାରିଖ ପର୍ଯ୍ୟନ୍ତ ପ୍ରବଳ ବର୍ଷାର ସମ୍ଭାବନା ଥିବାରୁ ସହରର ଜଳବନ୍ଦୀ ଅଞ୍ଚଳ, ତଳିଆ ଅଞ୍ଚଳ ଓ ବିପଦସଙ୍କୁଳ ସ୍ଥାନଗୁଡ଼ିକ ଉପରେ ସ୍ୱତନ୍ତ୍ର ନଜର ରଖାଯାଇଛି। ଏଥିପାଇଁ ସମସ୍ତ ଅଧିକାରୀ ଓ କର୍ମଚାରୀଙ୍କ ଛୁଟି ବାତିଲ କରାଯିବା ସହ ଆସନ୍ତା ୨୪ ତାରିଖ ପର୍ଯ୍ୟନ୍ତ କେହି ମୁଖ୍ୟାଳୟ ନ ଛାଡ଼ିବାକୁ ନିର୍ଦ୍ଦେଶ ଦିଆଯାଇଛି।
ବିଏମ୍ସି କମିଶନର ଶ୍ରୀ ଚଞ୍ଚଳ ରାଣାଙ୍କ ଅଧ୍ୟକ୍ଷତାରେ ଆଜି ଆୟୋଜିତ ପ୍ରସ୍ତୁତି ବୈଠକରେ ବିଏମ୍ସିର ସମସ୍ତ ବିଭାଗୀୟ ଅଧିକାରୀଙ୍କ ସମେତ ୱାଟକୋ ଓ ଅଗ୍ନିଶମ ବିଭାଗର ଅଧିକାରୀମାନେ ଯୋଗଦେଇଥିଲେ। ବାତ୍ୟାର ମୁକାବିଲା ପାଇଁ ଆବଶ୍ୟକ ମାନବ ସମ୍ବଳ, ଗାଡ଼ି ଓ ଯନ୍ତ୍ରପାତିକୁ ଆଜି ରାତି ସୁଦ୍ଧା ପ୍ରସ୍ତୁତ ରଖିବାକୁ କମିଶନର ନିର୍ଦ୍ଦେଶ ଦେଇଛନ୍ତି।
ବିଏମ୍ସି ମୁଖ୍ୟାଳୟରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ କାର୍ଯ୍ୟକ୍ଷମ ରହିବ। ଜଣେ ଡେପୁଟି କମିଶନର କିମ୍ବା ସହକାରୀ କମିଶନର ଏହାର ଦାୟିତ୍ୱରେ ରହିବେ ଏବଂ ଅତିରିକ୍ତ କମିଶନର ସମଗ୍ର କାର୍ଯ୍ୟର ତଦାରଖ କରିବେ। ପ୍ରତ୍ୟେକ ୱାର୍ଡରେ ଜଣେ ଅଧିକାରୀ ଓ ଜଣେ ଯନ୍ତ୍ରୀ ଦାୟିତ୍ୱରେ ରହିବେ। ପମ୍ପ ଚାଳକ ଓ ରାପିଡ୍ ଆକ୍ସନ ଟିମ୍ (ରାଟ୍) ୨୪ ଘଣ୍ଟିଆ ଡ୍ୟୁଟି କରିବା ସହ ୱାର୍ଡ କାର୍ଯ୍ୟାଳୟରେ ଦିନରାତି ଉପସ୍ଥିତ ରହିବେ।
ଜଳବନ୍ଦୀ ଆଶଙ୍କା ଥିବା ଅଞ୍ଚଳରେ ଆଗୁଆ ପାଣି ପମ୍ପ ମୁତୟନ କରିବାକୁ ଇଞ୍ଜିନିୟରିଂ ବିଭାଗ, ଜୋନାଲ ଡେପୁଟି କମିଶନର ଓ ଅଗ୍ନିଶମ ବିଭାଗକୁ କୁହାଯାଇଛି। ଡ୍ରେନ୍ରୁ ପଙ୍କ ଉଦ୍ଧାର, ଜାମ୍ ହୋଇଥିବା ଅଂଶ ସଫା ଏବଂ ଜଳ ନିଷ୍କାସନ ପଥରେ ଥିବା ଅବରୋଧ ହଟାଇବା କାର୍ଯ୍ୟ ତୁରନ୍ତ ଶେଷ କରାଯିବ। ଡ୍ରେନ୍ର ଭେଣ୍ଟ ଓ ଖୋଲା ଡ୍ରେନ୍ ନିକଟରେ ଆବଶ୍ୟକ ବ୍ୟାରିକେଡ୍ ବ୍ୟବସ୍ଥା କରାଯିବ। ତଳିଆ ଅଞ୍ଚଳର ବାସିନ୍ଦାଙ୍କୁ ସତର୍କ ରହିବା ସହ ଆବଶ୍ୟକ ପଡ଼ିଲେ ନିକଟସ୍ଥ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର ହେବାକୁ ପରାମର୍ଶ ଦିଆଯାଇଛି। ଜଳବନ୍ଦୀ ସମସ୍ୟା ତୁରନ୍ତ ଦୂର କରିବା ସମ୍ଭବ ନ ହେଲେ ମାଇକିଂ ମାଧ୍ୟମରେ ଲୋକଙ୍କୁ ସଚେତନ କରାଯିବ।
ବାତ୍ୟା ସମୟରେ ଗଛ ଉପୁଡ଼ି ପଡ଼ିବା କିମ୍ବା ଡାଳ ଭାଙ୍ଗି ରାସ୍ତା ଅବରୋଧ ହେବା ଆଶଙ୍କା ଥିବାରୁ ଟ୍ରିମିଂ ଟିମ୍, ଜେସିବି, କଟର ଓ ଆବଶ୍ୟକ ମାନବ ସମ୍ବଳ ପ୍ରସ୍ତୁତ ରଖାଯିବ। ଗୁରୁତ୍ୱପୂର୍ଣ୍ଣ ସ୍ଥାନରେ ଏହି ଟିମ୍ଗୁଡ଼ିକୁ ଆଗୁଆ ମୁତୟନ କରାଯିବ। ଏହି କାର୍ଯ୍ୟରେ ଅଗ୍ନିଶମ ବିଭାଗ ସହଯୋଗ କରିବ। ସେହିପରି ନିର୍ମାଣାଧୀନ ଉଚ୍ଚ ଅଟ୍ଟାଳିକାଗୁଡ଼ିକରେ ନିର୍ମାଣ କାର୍ଯ୍ୟ ବନ୍ଦ ରଖିବା ସହ କ୍ରେନ୍ଗୁଡ଼ିକୁ ସୁରକ୍ଷିତ ଓ ବନ୍ଦ କରିବାକୁ ବିଲ୍ଡରମାନଙ୍କୁ ନିର୍ଦ୍ଦେଶ ଦିଆଯାଇଛି।