05-Feb-2021

ପୁରୀ(ପ୍ରେରଣା ଖବର): ଶବ ସତ୍କାର କରିବାକୁ ଆସି ନିଜେ ପାଲଟି ଗଲେ ଶବ। ସ୍ବର୍ଗଦ୍ବାରରେ ଜଳିଲା ୨ ଜଣଙ୍କ ଜୁଇ। ମୃତ ବ୍ୟକ୍ତି ହେଲେ କଟକ ଚାଉଳିଆଗଞ୍ଜ ଥାନା ଅଧୀନ ଶିଖରପୁର ଅଞ୍ଚଳର ଶରତ ଗୋଚ୍ଛାୟତ, ତାଙ୍କ ବୟସ ୫୮ ବର୍ଷ। ଗତ ୩୧ ତାରିଖରେ ଜଣେ ସମ୍ପର୍କୀୟଙ୍କ ଦେହାନ୍ତ ପରେ ଶବ ଦାହ କରିବାକୁ ପରିଜନଙ୍କ ସହ ପୁରୀ ଯାଇଥିଲେ ଶରତ। ସମସ୍ତେ ଏକ ବସ୍‌ ଯୋଗେ ଆସି ସ୍ୱର୍ଗଦ୍ୱାରରେ ପହଞ୍ଚିଥିଲେ । ଶବ ଦାହ ପରେ ସମସ୍ତେ ବସ୍‌ ଯୋଗେ ଫେରିଯାଇଥିବାବେଳେ ବେଳାଭୂମି ବୁଲୁଥିବାରୁ ଶରତ ଫେରି ପାରି ନଥିଲେ ।

ସ୍ୱର୍ଗଦ୍ୱାରରେ ପହଞ୍ଚିବାବେଳ ବସ୍‌ ନଥିବା ଦେଖି ସେ ବିବ୍ରତ ହୋଇ ପଡିଥିଲେ । ପାଖରେ ଫୋନ୍‌ ନଥିବାରୁ ପରିବାର କିମ୍ବା ସମ୍ପର୍କୀୟଙ୍କ ସହ ଯୋଗାଯୋଗ ବି କରି ପାରିନଥିଲେ । ପାଖରେ ପଇସା ନଥିବାରୁ ସେ ଚାଲି ଚାଲି ଘରକୁ ଫେରୁଥିଲେ । ରାତି ପ୍ରାୟ ୧୧ଟାରେ ପୁରୀ-ଭୁବନେଶ୍ୱର ଜାତୀୟ ରାଜପଥ ସତ୍ୟବାଦୀ କାଦୁଆଛକ ଠାରେ ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇଥିଲା । ଶରତଙ୍କୁ ସତ୍ୟବାଦୀ ମେଡିକାଲ୍‌ରେ ଭର୍ତ୍ତି କରାଯାଇଥିଲା । କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତାଙ୍କ ପକେଟରୁ ଏକ ଖାତା ମିଳିଥିଲା । ଏଥିରେ ତାଙ୍କର ଆଧାର କାର୍ଡ ଥିବାରୁ ପରିଚୟ ମିଳି ଯାଇଥିଲା । ତେଣୁ ପୁଲିସ ତାଙ୍କ ଘରକୁ ଖବର ଦେଇଥିଲା । ପରିବାର ଲୋକେ ପହଞ୍ଚି ଶରତଙ୍କ ଶବକୁ ସ୍ୱର୍ଗଦ୍ୱାର ନେଇ ଦାହ କରିଥିଲେ।