24-Oct-2026

ଟିଟିଲାଗଡ଼(ପ୍ରେରଣା ଖବର)- ଟିଟିଲାଗଡ଼ ସହରରେ ରାଧାକୃଷ୍ଣ ମନ୍ଦିର ନିକଟସ୍ଥ ଅଣ୍ଡରବ୍ରିଜ୍ ଦେଇ ଯାଇଥିବା ଗୁରୁତ୍ୱପୂର୍ଣ୍ଣ ରାସ୍ତାକୁ ବନ୍ଦ କରିବା ପ୍ରସ୍ତାବକୁ ନେଇ ଜନସାଧାରଣଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହି ରାସ୍ତାକୁ ବନ୍ଦ ନ କରି ଏକ ବକ୍ସ-ଟାଇପ୍ ଅଣ୍ଡରପାସ୍ ରାସ୍ତା ନିର୍ମାଣ କରିବା ଦାବିରେ ‘ଟିଟିଲାଗଡ଼ ନାଗରିକ ମଞ୍ଚ’ ପକ୍ଷରୁ ବଲାଙ୍ଗୀର ସାଂସଦ ଶ୍ରୀମତୀ ସଙ୍ଗୀତା କୁମାରୀ ସିଂହଦେଓଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି।  

ଦାବିପତ୍ର ଅନୁଯାୟୀ, ରେଳ ଲାଇନ୍ ଟିଟିଲାଗଡ଼ ସହରକୁ ଦୁଇ ଭାଗରେ ବିଭକ୍ତ କରିଛି। ଦୀପକ ସମାଦ୍ଦାରଙ୍କ ବାସଭବନ ନିକଟରୁ ରାଧାକୃଷ୍ଣ ମନ୍ଦିର ଅଣ୍ଡରବ୍ରିଜ୍ ଆଡ଼କୁ ଯାଇଥିବା ଏହି ରାସ୍ତାଟି ସହରର ଦୈନନ୍ଦିନ ଯାତାୟାତ ସହିତ ମହାଶିବରାତ୍ରି, ଜନ୍ମାଷ୍ଟମୀ ଭଳି ପ୍ରମୁଖ ପର୍ବପର୍ବାଣିରେ ଟ୍ରାଫିକ୍ ନିୟନ୍ତ୍ରଣ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ।  ଯଦି ଏହି ରାସ୍ତାଟିକୁ ବନ୍ଦ କରିଦିଆଯାଏ, ତେବେ ସହରର ପ୍ରାୟ ଅର୍ଦ୍ଧେକ ଜନସଂଖ୍ୟା ଗୁରୁତର ସମସ୍ୟାର ସମ୍ମୁଖୀନ ହେବେ ଏବଂ ଜରୁରୀକାଳୀନ ଯାତାୟାତ ବାଧାପ୍ରାପ୍ତ ହୋଇ ତୀବ୍ର ଜନଅସନ୍ତୋଷ ସୃଷ୍ଟି ହେବାର ଆଶଙ୍କା ରହିଛି।  
ତେଣୁ ଜନସ୍ୱାର୍ଥକୁ ଦୃଷ୍ଟିରେ ରଖି ସାଂସଦ ତୁରନ୍ତ ଏଥିରେ ହସ୍ତକ୍ଷେପ କରି ରେଳବାଇ ଓ ସମ୍ପୃକ୍ତ କର୍ତ୍ତୃପକ୍ଷଙ୍କ ସହ ଆଲୋଚନା କରିବାକୁ ମଞ୍ଚ ଅନୁରୋଧ କରିଛି। ରାସ୍ତା ବନ୍ଦ ନ କରି ସେଠାରେ ଏକ ବକ୍ସ-ଟାଇପ୍ ଅଣ୍ଡରପାସ୍ ନିର୍ମାଣ କରାଗଲେ ସୁଗମ ଯାତାୟାତ ସହ ଟ୍ରାଫିକ୍ ସମସ୍ୟାର ସ୍ଥାୟୀ ସମାଧାନ ହୋଇପାରିବ ବୋଲି ନାଗରିକ ମଞ୍ଚ ପକ୍ଷରୁ ସଂଗଠନ ସମ୍ପାଦକ ମନୋଜ କୁମାର ହାତୀ ଦର୍ଶାଇଛନ୍ତି।  ଏହି ପତ୍ରର ନକଲ ବଲାଙ୍ଗୀର ଜିଲ୍ଲାପାଳ, ଟିଟିଲାଗଡ଼ ଉପଜିଲ୍ଲାପାଳ, ପୂର୍ବତଟ ରେଳପଥ ମହାପ୍ରବନ୍ଧକ (ଭୁବନେଶ୍ୱର) ଏବଂ ସମ୍ବଲପୁର ଡିଭିଜନାଲ୍ ରେଲୱେ ମ୍ୟାନେଜରଙ୍କ ଉଦ୍ଦେଶ୍ୟରେ ମଧ୍ୟ ପ୍ରେରଣ କରାଯାଇଛି।