23-Dec-2020

ବଲାଙ୍ଗୀର,(ପ୍ରେରଣା ଖବର)- ବଲାଙ୍ଗୀର ମାଟିରୁ ନିର୍ମିତ ତଥା ବଲାଙ୍ଗୀର ଜିଲ୍ଲାର କଳାକାର ମାନଙ୍କୁ ନେଇ ସଂପୂର୍ଣ୍ଣ ନିଜସ୍ୱ ଜ୍ଞାନ କୌଶଳରେ ନିର୍ମିତ ହୋଇଛି ସର୍ଟ ଫିଲ୍ମ ‘ଆତ୍ମନ- ଦ ଓଣ୍ଡର ବୟ’ । ଗୋଟିଏ ଛୋଟ ଶିଶୁର ମନସ୍ତତ୍ତ୍ୱ ଏବଂ ତାହାକୁ ଏକ ସ୍ୱୟଂସଂପୂର୍ଣ୍ଣ ଭାବେ ଗଢ଼ି ତୋଳିବାରେ ବାପା ମାଁ ଙ୍କ ଭୂମିକାକୁ ଏହି ସିନେମାରେ ପ୍ରଦର୍ଶନ କରାଯାଇଛି । ଅନେକ ଘାତପ୍ରତିଘାତ ଦେଇ ଦୀର୍ଘ ଦୁଇ ବର୍ଷ ଧରି ବଲାଙ୍ଗୀର ଜିଲ୍ଲାର ବିଭିନ୍ନ ଲୋକେସନରେ ଏହି ଚଳଚ୍ଚିତ୍ରର ସୁଟିଂ  ଚାଲିଥିଲା । ଆଜି ଏହି ଚଳଚ୍ଚିତ୍ର ର ପୋଷ୍ଟର ରିଲିଜ ସହ ପ୍ରିମିୟର ସୋ ଅନୁଷ୍ଠିତ ହୋଇଯାଇଛି । ପ୍ରିମିୟର ସୋ ଅବସରରେ ସ୍ଥାନୀୟ ସାମ୍ବାଦିକ ଭବନ ଠାରେ ଅନୁଷ୍ଠିତ ଏକ ସଭାକୁ ସଂସ୍କୃତି ପ୍ରେମୀ ତଥା ସଙ୍ଗୀତ ନିର୍ଦ୍ଦେଶକ ମୁରଲିଧାରୀ ପତି ସଂଯୋଜନା କରିଥିଲେ । ଏଥିରେ ମୁଖ୍ୟ ଅତିଥି ଭାବରେ ଜିଲ୍ଲା ସଂସ୍କୃତି ଅଧିକାରୀ ବିଜୟ ଶତପଥୀ ଯୋଗ ଦେଇ ନିଜ ବକ୍ତବ୍ୟରେ ଏହି ମାଟିରେ ମଧ୍ୟ ଉନ୍ନତ ମାନର ଚଳଚ୍ଚିତ୍ର ନିର୍ମାଣ ହୋଇ ପାରିବ ବୋଲି କହିବା ସହ ଏହା ଦର୍ଶକଙ୍କ ଦ୍ୱାରା ଉଚ୍ଚାଦୃତ ହୋଇପାରିବ ବୋଲି ଆଶା ପ୍ରକଟ କରିଥିଲେ । ଅନ୍ୟ ମାନଙ୍କ ମଧ୍ୟରେ ଏହି ଚଳଚ୍ଚିତ୍ରର ନିର୍ଦ୍ଦେଶକ ହିମାଂଶୁ ଖମାରୀ ଚଳଚ୍ଚିତ୍ର ନିର୍ଦ୍ଦେଶନା ସମୟରେ ସାମ୍‌ନା କରିଥିବା ବିଭିନ୍ନ ବାଧାବିଘ୍ନ ସଂପର୍କରେ ନିଜର ଅଭିଜ୍ଞତା ବଖାଣିବା ସହ କିପରି ଏହି ବାଧାବିଘ୍ନକୁ ଏଡାଇ ଦେଇ ପୁରା ଟିମ୍ ନିଷ୍ଠାର ସହ କାମ କରି ଆଜି ଚଳଚ୍ଚିତ୍ରକୁ ଦର୍ଶକଙ୍କ ପାଖରେ ପହଞ୍ଚାଇ ପାରିଛନ୍ତି ସେ ସଂପର୍କରେ ନିଜର ଅନୁଭୂତି କହିଥିଲେ । ଚଳଚ୍ଚିତ୍ରର ପ୍ରଯୋଜକ ତଥା ସଂଳାପ ଲେଖକ ଗୋବର୍ଦ୍ଧନ ଭୋଇ ଚଳଚ୍ଚିତ୍ରର ବିଷୟବସ୍ତୁ ଉପରେ ସାମ୍ୟକ ସୂଚନା ଦେଇଥିଲେ । ଆଜକୁ ୪ ବର୍ଷ ପୂର୍ବେ ନିଜ ପୁଅ ଆତ୍ମନର କାହାଣୀକୁ ନେଇ ତା ନାମରେ ଏହି ଚଳଚ୍ଚିତ୍ର ନିର୍ମାଣ ହୋଇଛି  l ଆତ୍ମନ ଏଥିରେ ମୁଖ୍ୟ ଭୂମିକାରେ ଅଭିନୟ ମଧ୍ୟ କରିଥିବା ପ୍ରଯୋଜକ ଶ୍ରୀ ଭୋଇ ସୂଚନା ଦେଇଥିଲେ ।  ସଂସ୍କୃତି ପ୍ରେମୀ ତଥା ସାଇଟ୍‌ର ପ୍ରତିଷ୍ଠାତା ଡ. ଶ୍ରୀକର ମିଶ୍ର, ରିଲାଏନ୍ସ ଏଜୁକେସନାଲ କଂପ୍ଲେକ୍ସର ନିର୍ଦ୍ଦେଶକ ମନୋଜ କୁମାର ମିଶ୍ର ପ୍ରମୁଖ ମଞ୍ଚାସୀନ ରହି ଚଳଚ୍ଚିତ୍ର ନିର୍ମାଣ ସମୟର ବିଭିନ୍ନ ଘଟଣାକୁ ଅବତାରଣା କରିଥିଲେ । ପରେ ଏହି ସିନେମାର ପ୍ରିମିୟର ସୋ ଅନୁଷ୍ଠିତ ହୋଇଥିଲ । ଉପସ୍ଥିତ ଦର୍ଶକ ଓ କଳାପ୍ରେମୀ ତଥା ଏଥିରେ ଅଭିନୟ କରିଥିବା ସମସ୍ତ କଳାକାର ଉପସ୍ଥିତ ରହି ଚଳଚ୍ଚିତ୍ରକୁ ଉପଭୋଗ କରିଥିଲେ । ଅନ୍ୟ ମାନଙ୍କ ମଧ୍ୟରେ ଅଭିନେତା ରତନ  ମେହେର , ନର୍ଦ୍ଦେଶକ  ଅଶୋକ ମିଶ୍ର, ଗୋପାଳ ପ୍ରଧାନ, କପିଳ ଖମାରୀଙ୍କ ସମେତ ଏହି ଚଳଚ୍ଚିତ୍ର ସହ ଜଡିତ ବହୁ ଅଭିନେତା, ଅଭିନେତ୍ରୀ ଯୋଗ ଦେଇଥିଲେ ।