31-Aug-2024

ଭୁବନେଶ୍ୱର: ସାରା ଓଡ଼ିଶାରେ ମୁକ୍ତିଲାଭ କରିଛି ନୂଆ ଓଡ଼ିଆ ସିନେମା 'ବାବାଜୀ କା ଠୁଲୁ'। ରସୁଲଗଡ଼ ସ୍ଥିତ ଏସପ୍ଲାନେଡ ମଲର ସିନେପଲିସଠାରେ ଏହାର ପ୍ରିମିୟର ସୋ’ ଅନୁଷ୍ଠିତ ହୋଇ ଯାଇଛି । ଇଣ୍ଡଷ୍ଟ୍ରିର ବହୁ ନିର୍ମାତା ନିର୍ଦ୍ଦେଶକଙ୍କ ସମେତ କଳାକାର ଓ ଟେକନିସିଆନ ଏଥିରେ ଯୋଗ ଦେଇଥିଲେ । ଲର୍ଡ଼ ଜଗନ୍ନାଥ ଫିଲ୍ମସ ବ୍ୟାନର ର ଏହା ଦ୍ଵିତୀୟ ଚଳଚ୍ଚିତ୍ର । ବାବୁ ସିଂଙ୍କ ପ୍ରଯୋଜିତ ତଥା ରଞ୍ଜନ ମିଶ୍ରଙ୍କ ନିର୍ଦ୍ଦେଶିତ ଏହି ଛବିର ପ୍ରମୁଖ ଭୂମିକାରେ ନଜର ଆସିଛନ୍ତି ଦେବରାଜ ଓ ସ୍ୱାତୀ । ଦେବରାଜଙ୍କ ସ୍କ୍ରିନ ନେମ ରହିଛି ବଣ୍ଟି ଓ ସ୍ୱାତୀ ଅଭିନୟ କରିଛନ୍ତି ବବଲୀ ନାଁରେ। ପରଦା ଉପରେ ଏହି ବଣ୍ଟି

ବବଲି ଯୋଡିକୁ ବେଶ ପସନ୍ଦ କରିଛନ୍ତି ଦର୍ଶକ । ଅନ୍ୟାନ୍ୟ ଚରିତ୍ରରେ ଅଛନ୍ତି ମିହିର ଦାସ, ପୁଷ୍ପା ପଣ୍ଡା, ଉଷସୀ ମିଶ୍ର, ଜୀବନ ପଣ୍ଡା, ଦେବୁ ବ୍ରହ୍ମା, ସଲିଲ ମିତ୍ର, ପ୍ରଜ୍ଞା, ଦେବୀ ବାରିକ, ଶୁଭ୍ରାଂଶୁ ଓ ଅମୃତ ନନ୍ଦ। ସୃଷ୍ଟିର ନିୟମ ଅନୁସାରେ ସମଗ୍ର ମାନବ ସମାଜ ନାରୀ ଓ ପୁରୁଷକୁ ଆଧାର କରି । ହେଲେ ବେଳେ ବେଳେ ନାରୀ ଓ ପୁରୁଷର ସ୍ଵଭାଵରେ ପରିବର୍ତ୍ତନ 
ଦେଖିବାକୁ ମିଳିଥାଏ । ନାରୀ ଭିତରେ ପୁରୁଷର ଭାବନା ଓ ପୁରୁଷ ଭିତରେ ନାରୀର ଭାବନା ଏକ ବୈଚିତ୍ରମୟ ପରିବେଶ ସୃଷ୍ଟି କରିଥାଏ । ଏପରି ଏକ ଭିନ୍ନ ଧରଣର କାହାଣୀକୁ ନେଇ ନିର୍ମିତ ହୋଇଛି ନୂଆ ଓଡ଼ିଆ ସିନେମା 'ବାବାଜୀ କା ଠୁଲୁ'। କାହାଣୀ ରଚନା କରିଛନ୍ତି ବାବୁ ସିଂ। ବାପୁ ଗୋସ୍ୱାମୀ, ମୋହିତ ଚକ୍ରବର୍ତ୍ତୀ ଓ ଓଁକାରଙ୍କ ରଚିତ ଗୀତଗୁଡିକୁ ସ୍ୱରରେ ସଜାଇଛନ୍ତି ବୁବୁ-ସୌରଭ । କଣ୍ଠଦାନ କରିଛନ୍ତି ବିଭୁ କିଶୋର, ଅସୀମା ପଣ୍ଡା, ସୌରଭ, ପ୍ରୀତିନନ୍ଦା, ଇତିଶ୍ରୀ ଓ ଶକ୍ତି ମିଶ୍ର। ସଂଳାପ ରଚନା କରିଛନ୍ତି ବିଜୟ ରାଉଳ। ଗୀତଗୁଡିକ ବେଶ ଶ୍ରୁତିମଧୁର ଓ ମନଛୁଆଁ ହୋଇପାରିଛି। ଦୀର୍ଘ ବର୍ଷ ପରେ ଏପରି ଏକ ହାସ୍ୟ ରସାତ୍ମକ ଛବି ପରଦାକୁ ଆସିଥିବା ବେଳେ ଦର୍ଶକ ଏହାର ଭରପୁର ଆନନ୍ଦ ନେଇପାରିବେ ବୋଲି କହିଛନ୍ତି ନିର୍ଦ୍ଦେଶକ ରଞ୍ଜନ ମିଶ୍ର ।

(ଅମୃତ ନନ୍ଦଙ୍କ ରିପୋର୍ଟ)