16-Oct-2026

ବଲାଙ୍ଗୀର(ପ୍ରେରଣା ଖବର):ବଲାଙ୍ଗୀର ରେଳ ଷ୍ଟେସନରେ ଯାନବାହନ ପାର୍କିଂ ପାଇଁ ଅତ୍ୟଧିକ ଫି’ ଆଦାୟକୁ ବିରୋଧ କରି ଆଜି ବିଭିନ୍ନ ସାମାଜିକ ସଂଗଠନ, ଶ୍ରମିକ ଓ ଚାଷୀ ସଂଗଠନ, ସମାଜସେବୀ ଏବଂ ରାଜନୈତିକ ଦଳର ନେତୃବୃନ୍ଦ ବିଭୁଦତ୍ତ ମିଶ୍ର ଙ୍କର ନେତୃତ୍ୱ ରେ ଏକତ୍ରିତ ହୋଇ ପ୍ରତିବାଦ ଜଣାଇଛନ୍ତି। ଏହି ଅବସରରେ ରେଳବାଇର ଡିଭିଜନାଲ ରେଳ ପ୍ରବନ୍ଧକ (DRM)ଙ୍କ ଉଦ୍ଦେଶ୍ୟରେ ଏକ ଦାବିପତ୍ର ବଲାଙ୍ଗୀର ରେଳ ଷ୍ଟେସନର ସିନିୟର ଷ୍ଟେସନ ମ୍ୟାନେଜରଙ୍କୁ ପ୍ରଦାନ କରାଯାଇଥିଲା।  

  
ପ୍ରତିବାଦକାରୀଙ୍କ ଅଭିଯୋଗ ଅନୁଯାୟୀ, ବଲାଙ୍ଗୀର ରେଳ ଷ୍ଟେସନର ପାର୍କିଂ ସ୍ଥଳରେ ଯାତ୍ରୀ ଓ ସେମାନଙ୍କୁ ଛାଡ଼ିବାକୁ ଆସୁଥିବା ଲୋକଙ୍କ ପାଇଁ ଆବଶ୍ୟକୀୟ ମୌଳିକ ସୁବିଧାର ଅଭାବ ରହିଛି। ଅନେକ ସ୍ଥାନରେ ପାର୍କିଂ ପାଇଁ ଉପଯୁକ୍ତ ଛାତ କିମ୍ବା ଅନ୍ୟାନ୍ୟ ଆବଶ୍ୟକୀୟ ସୁବିଧା ନଥିବା ସତ୍ତ୍ୱେ ପାର୍କିଂ ଫି’ ଅତ୍ୟଧିକ ରହିଥିବାରୁ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।  
  
ରେଳ ଷ୍ଟେସନ ହେଉଛି ସାଧାରଣ ଜନତାଙ୍କ ଯାତାୟାତର ଏକ ପ୍ରମୁଖ ମାଧ୍ୟମ। ପ୍ରତିଦିନ ଅନେକ ଯାତ୍ରୀ ନିଜ ପରିବାର ସଦସ୍ୟଙ୍କୁ ଟ୍ରେନ୍‌ରେ ଛାଡ଼ିବା କିମ୍ବା ଷ୍ଟେସନରୁ ନେବା ପାଇଁ ଆସିଥାନ୍ତି। ଏପରି ସ୍ଥିତିରେ ପାର୍କିଂ ଫି’ ସାଧାରଣ ଲୋକଙ୍କ ଆର୍ଥିକ ବୋଝ ବଢ଼ାଉଥିବା ବେଳେ ଆବଶ୍ୟକୀୟ ସୁବିଧାର ଅଭାବ ଏହି ସମସ୍ୟାକୁ ଆହୁରିବଢ଼ାଇଛି   | ଯେଉଁଠାରେ ଯାତ୍ରୀଙ୍କୁ ଆବଶ୍ୟକୀୟ ମୌଳିକ ସୁବିଧା ମିଳୁନାହିଁ, ସେଠାରେ ଏତେ ଅଧିକ ପାର୍କିଂ ଫି’ ଆଦାୟ କରିବା କେତେ ଯୁକ୍ତିସଙ୍ଗତ?  
  
ଏହି ପ୍ରତିବାଦ କେବଳ ପାର୍କିଂ ଫି’ ବିରୋଧରେ ନୁହେଁ; ବରଂ ଯାତ୍ରୀଙ୍କ ଅଧିକାର, ସ୍ୱଚ୍ଛତା, ମୌଳିକ ସୁବିଧା ଏବଂ ଜନସାଧାରଣଙ୍କ ପ୍ରତି ରେଳବାଇର ଦାୟିତ୍ୱବୋଧ ସହ ଜଡ଼ିତ ଏକ ଜନସ୍ୱାର୍ଥର ପ୍ରସଙ୍ଗ।  
  ବଲାଙ୍ଗୀରବାସୀଙ୍କ ନ୍ୟାୟସଙ୍ଗତ ଦାବିକୁ ଗୁରୁତ୍ୱ ଦେଇ ରେଳବାଇର ଉଚ୍ଚ କର୍ତ୍ତୃପକ୍ଷ ଏହି ପ୍ରସଙ୍ଗରେ ତୁରନ୍ତ ହସ୍ତକ୍ଷେପ କରିବା ସହ ପାର୍କିଂ ଫି’ର ଯୁକ୍ତିସଙ୍ଗତତା

ଯାଞ୍ଚ କରି ଆବଶ୍ୟକ ସଂଶୋଧନ କରନ୍ତୁ ବୋଲି ପ୍ରତିବାଦକାରୀମାନେ ଦାବି କରିଛନ୍ତି।  ଜନସାଧାରଣଙ୍କ ଉପରେ ଅଯଥା ଆର୍ଥିକ ବୋଝ ଲଦିବା ପରିବର୍ତ୍ତେ, ଉପଯୁକ୍ତ ସୁବିଧା ସହ ନ୍ୟାୟସଙ୍ଗତ ପାର୍କିଂ ବ୍ୟବସ୍ଥା କରିବା ରେଳବାଇର ଦାୟିତ୍ୱ। ଜନସ୍ୱାର୍ଥର ଏହି ପ୍ରସଙ୍ଗରେ ରେଳବାଇ କର୍ତ୍ତୃପକ୍ଷ ଶୀଘ୍ର ସକାରାତ୍ମକ ପଦକ୍ଷେପ ନେବେ ବୋଲି ଆନ୍ଦୋଳନକାରୀମାନେ ଆଶା ପ୍ରକାଶ କରିଛନ୍ତି। ଏହି ପ୍ରତିନିଧି ମଣ୍ଡଳୀ ରେ ଆମ ଆଦମୀ ପାର୍ଟି ର ଜିଲ୍ଲା ସଭାପତି ତଥା ରାଷ୍ଟ୍ରୀୟ ପରିଷଦ ର ସଭ୍ୟ ଆଶିଷ ପାଣ୍ଡେ, ପଶ୍ଚିମ ଓଡିଶା ସେବା ସଙ୍ଘ ର ସଭାପତି ରାଜେଶ ବଗର୍ତ୍ତୀ, ଆବାହକ ଦେଓଗାଁ ଚିନି କଳ ସଂଘର୍ଷ ସମିତି, ଶଙ୍କର ପ୍ରସାଦ ପାଣିଗ୍ରାହୀ ଜିଲ୍ଲା ସମ୍ପାଦକ ଓଡିଶା ସୂଚନା ଅଧିକାର ଅଭିଯାନ, ପ୍ରଦ୍ୟୁମ୍ନ କୁମାର ବାବୁ ସମ୍ପାଦକ କୃଷକ ସଂଘର୍ଷ ସମିତି, ପରମେଶ୍ୱର ବାବୁ, ପିଣ୍ଟୁ ସାହୁ ଦେଓଗାଁ ଚିନିକଳ ସଂଘର୍ଷ ସମିତି ଓ ଆକାଶ କୁମାର ସାହୁ ASAP (ଛାତ୍ର ବିଭାଗ )ଆଦି ପ୍ରମୁଖ ଯୋଗ ଦେଇ ଦାବି ପତ୍ର ପ୍ରଦାନ କରି ଥିଲେ |