15-Oct-2022

ବଲାଙ୍ଗୀର(ପ୍ରେରଣା ଖବର)-ଆଜି ରାଜ୍ୟସରକାରଙ୍କ ଉଚ୍ଚଶିକ୍ଷାମନ୍ତ୍ରୀ ଇଂ.ରୋହିତ ପୂଜାରୀ ବଲାଙ୍ଗୀର ଗସ୍ତସମୟରେ ରାଜେନ୍ଦ୍ର ବିଶ୍ୱବିଦ୍ୟାଳୟକୁ ପରିଦର୍ଶନରେ ଯାଇ ସେଠାରେ ବିଶ୍ୱବିଦ୍ୟାଳୟ ପାଇଁ ରାଜ୍ୟସରକାର ମଞ୍ଜୁର କରିଥିବା ୫୦.୪୩୭ ଏକର ଜମିର ପଟ୍ଟାପ୍ରଦାନ କରିଛନ୍ତି । କିଛିଦିନ ପୂର୍ବରୁ ବଲାଙ୍ଗୀର ଜିଲ୍ଲାର ଛାତ୍ରବିଜେଡି ତରଫରୁ ମନ୍ତ୍ରୀଙ୍କୁ ଭେଟି ବିଶ୍ୱବିଦ୍ୟାଳୟର ସମସ୍ୟାଗୁଡିକ ବିଷୟରେ ଆଲୋଚନା କରାଯାଇଥିଲା । ଆଜି ମନ୍ତ୍ରୀ ବଲାଙ୍ଗୀର ଜିଲ୍ଲାକୁ ଜିଲ୍ଲା ଯୋଜନାବୋର୍ଡ ଅଧ୍ୟକ୍ଷ ହେଲାପରେ ପ୍ରଥମ ପରିଦର୍ଶନରେ ହିଁ ରାଜେନ୍ଦ୍ର ବିଶ୍ୱବିଦ୍ୟାଳୟକୁ ପହଞ୍ଚିଥିଲେ । ଗତମାସରେ ରାଜ୍ୟ କ୍ୟାବିନେଟ ବିଶ୍ୱବିଦ୍ୟାଳୟକୁ ୫୦.୪୩୭ ଏକର ଜମି ଦେବାକୁ ମଞ୍ଜୁରି ଦେଇଥିଲେ । ଆଜିର ତାହାର ପଟ୍ଟା ବିଶ୍ୱବବିଦ୍ୟାଳୟର କୁଳପତିଙ୍କୁ ମନ୍ତ୍ରୀ ପ୍ରଦାନ କରିଛନ୍ତି । ମନ୍ତ୍ରୀ ଶ୍ରୀ ପୂଜାରୀଙ୍କ ଏହି ପରିଦର୍ଶନ ସମୟରେ ମନ୍ତ୍ରୀ,ବିଶ୍ୱବିଦ୍ୟାଳୟ କତ୍ତୃପକ୍ଷ ଓ ଜିଲ୍ଲାପ୍ରଶାସନ ମଧ୍ୟରେ ଏକ ବୈଠକବସି ତ୍ରୀପାକ୍ଷୀକ ଆଲୋଚନା ଅନୁଷ୍ଠିତ ହୋଇଥିଲା । ବିଶ୍ୱବିଦ୍ୟାଳୟ କତ୍ତୃପକ୍ଷ ଆଲୋଚନାକାଳରେ ଅଧ୍ୟକ୍ଷ/ଅଧ୍ୟକ୍ଷା ଓ କର୍ମଚାରୀ ସମସ୍ୟା ବିଷୟ ସହିତ ବିଶ୍ୱବବିଦ୍ୟାଳୟ ପାଇଁ ଆଉ ଅନ୍ୟୁନ ୫୦ଏକର ଜମିର ଆବଶ୍ୟକତା ଥିବା କହିଥିଲେ । ଏବେ ରାଜ୍ୟସରକାର ଦେଇଥିବା ୨୫କୋଟି ଟଙ୍କାରେ ବିଶ୍ୱବିଦ୍ୟାଳୟର ପ୍ରଶାସନିକ କୋଠା ନିର୍ମାଣ ଚାଲିଥିବା ବେଳେ ଅଡିଟୋରିୟମ ପାଇଁ ଅନୁଦାନ ଆସିଥିବା ସୂଚନା ଦିଆଯାଇଥିଲା ।  ମନ୍ତ୍ରୀ ତାଙ୍କ ବୈଠକରେ ବିଶ୍ୱବିଦ୍ୟାଳୟକୁ ଆସିଥିବା ଅନୁଦାନ ଓ ଏହାର ଉପଯୋଗ ସହିତ ଆଗକୁ କେଉଁସବୁ ପ୍ରକଲ୍ପ ଓ ଉନ୍ନୟନକାମକୁ ପ୍ରାଧାନ୍ୟ ଦିଆଯିବ ସେଉପରେ  ଆଲୋଚନା କରିଥିଲେ । ଏହି ଆଲୋଚନାରେ ମନ୍ତ୍ରୀ ଇଂ.ରୋହିତ ପୂଜାରୀ,ବିଶ୍ୱବିଦ୍ୟାଳୟର କୁଳପତି ପ୍ରଫେସର ଡ.ଉମାବଲ୍ଲଭ ମହାପାତ୍ର,ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣା,ବିଶ୍ୱବିଦ୍ୟାଳୟର ରେଜିଷ୍ଟାର ଯୁଧିଷ୍ଠୀର ନାୟକ ଓ ଅନ୍ୟାନ୍ୟ ଅଧିକାରୀ ଉପସ୍ଥିତ ରହିଥିଲେ । ଜମିପଟ୍ଟା ଦେବାରେ ବଲାଙ୍ଗୀର ଅତିରିକ୍ତ ଜିଲ୍ଲାପାଳ ମହେନ୍ଦ୍ର ମହାପାତ୍ର,ତହସିଲଦାର ପୁଷ୍ପାଞ୍ଜଳି ପଣ୍ଡା ସହଯୋଗ କରିଥିଲେ । ଏହି ଅବସରରେ ଛାତ୍ରବିଜେଡିଦଳର ଜିଲ୍ଲା ସଭାପତି ସୁମନ ନନ୍ଦ,ରାଜ୍ୟ ସଂପାଦକ ଗୁଞ୍ଜ ଖାନ,ଜିଲ୍ଲାପରିଷଦ ସଭାପତି ଦେବକୀ ସାହୁ,ପୌରାଧ୍ୟକ୍ଷା ଲିକା ସାହୁ,ସଦରବ୍ଲକ ଅଧ୍ୟକ୍ଷା ସରିତା ବାଗ,ଯୁବବିଜେଡି ସଭାପତି ରାଜେନ୍ଦ୍ର ହୋତା.ମହିଳା ବିଜେଡିର ଜିଲ୍ଲାସଭାନେତ୍ରୀ ଦମୟନ୍ତି ବାଗ ପ୍ରମୁଖ ମନ୍ତ୍ରୀଙ୍କ ସହିତ ବିଶ୍ୱବିଦ୍ୟାଳୟର ସମସ୍ୟା ବିଷୟରେ ଆଲୋଚନା କରିଥିଲେ ।