20-May-2026

କଟକ (ତପନ ମହାନ୍ତି): ବିଜେପି ଶାସିତ ରାଜସ୍ଥାନରେ ଏକ ମର୍ମାନ୍ତିକ ନାରୀ ଧର୍ଷଣ ଓ ପୀଡ଼ିତା ମାନଙ୍କ ଜଣଙ୍କ ପରେ ଜଣେ ଆତ୍ମହତ୍ୟା ଘଟଣା ଦେଶରେ ଚହଳ ପକାଇଛି। ପ୍ରଥମେ ବଡ଼ ଭଉଣୀଙ୍କୁ ଗଣ ଦୁଷ୍କର୍ମ କରି ତାର ଭିଡିଓ ଉତ୍ତୋଳନ କରି ସେହି ଭିଡିଓ ବଳରେ ତାଙ୍କୁ  ବର୍ଷାଧିକ କାଳ ଦୁଷ୍କର୍ମ କରାଯାଇଥିଲା। ଉପାୟଶୂନ୍ୟ ହୋଇ ସେ ଆତ୍ମହତ୍ୟାର ରାସ୍ତା ବାଛି ନେବାକୁ ବାଧ୍ୟ ହୋଇଥିଲେ। ତା ପରେ ସାନ ଭଉଣୀଙ୍କୁ ମଧ୍ୟ ସମାନ ଭାବରେ ଲଗାତର ଗଣ ଦୁଷ୍କର୍ମ କରାଯାଇଥିଲା । ଫଳରେ ସେ ମଧ୍ୟ କିଛି ମାସ ପରେ ଆତ୍ମହତ୍ୟା କରିଥିଲେ। ଉଭୟ ଘଟଣାରେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରି ଧର୍ଷଣକାରୀ ମାନଙ୍କୁ ସୁରକ୍ଷା ଦେଇଥିଲା।ରାଜ୍ୟ ସରକାର ମଧ୍ୟ ଅପରାଧୀ ମାନଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ। ଏହି ଘଟଣାରେ ସଂପୃକ୍ତ ସମସ୍ତ ଅପରାଧୀ ମାନଙ୍କୁ ଦୃଷ୍ଟାନ୍ତମୂଳକ ଦଣ୍ଡ ବିଧାନ ଦାବିରେ ଏସୟୁସିଆଇ ( କମ୍ୟୁନିଷ୍ଟ) ପାର୍ଟି ପକ୍ଷରୁ ଆହୂତ ସାରା ଭାରତ ପ୍ରତିବାଦ ଦିବସରେ ଆଜି କଟକ କଲେଜ ଛକ ଠାରେ ପାର୍ଟି ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି। ଏହି ବିକ୍ଷୋଭରେ ଜିଲ୍ଲା ସମ୍ପାଦକ ବିଶ୍ୱାବସୁ ଦାସ , ଖଗେଶ୍ବର ସେଠୀ, ରାଜକିଶୋର ମଲ୍ଲିକ, ବବି ବଳବନ୍ତରାୟ, ମାଳବିକା ସାମଲ, ବସନ୍ତ ନାୟକ, ଭାଗ୍ୟରବି ଦାସ, ବିନୋଦ ସେଠୀ,  ତରୁଣସେନ ନାୟକ, ଦୀପକ ଦାସ, ଶିବାନୀ ସାହୁ, ଶୁଭସ୍ମିତା ସାହୁ, ପ୍ୟାଭେଲ ପ୍ରିୟଦର୍ଶନ, ଅକ୍ଷୟ ରାଉଳ, ଆଇନଜୀବୀ ପ୍ରତାପ ଚନ୍ଦ୍ର ମିଶ୍ର, ସ୍ୱାଧିନୀ ବେହେରା, ସିପ୍ରା ମହାନ୍ତି, ଜୋତ୍ସାରାଣୀ ଦାସ, ଭାଗ୍ୟଶ୍ରୀ ପ୍ରଧାନ, ଝରଣା ଦାସ ପ୍ରମୁଖ ନେତୃତ୍ୱ ନେଇଥିଲେ।