05-Nov-2026

ସୁରକ୍ଷା ସରଞ୍ଜାମ ବିନା କାମ କରୁଥିଲେ ଶତାଧିକ ଶ୍ରମିକ, କ୍ଷତିପୂରଣ ଦାବିରେ ପରିବାର

କଣ୍ଟାବାଞ୍ଜି(ମୋହନ ସୁନା): ବଲାଙ୍ଗୀର ଜିଲ୍ଲାର କଣ୍ଟାବାଞ୍ଜିରେ ନିର୍ମାଣାଧୀନ ମ୍ୟାରେଜ ପ୍ୟାଲେସରେ ଘଟିଛି ଏକ ଦୁଃଖଦ ଅଘଟଣ। କୋଠା ନିର୍ମାଣ କାମ ଚାଲିଥିବା ସମୟରେ ଉପର ମହଲାରୁ ଲୁହା ଛଡ଼ ମୁଣ୍ଡରେ ପଡ଼ି ଜଣେ ଶ୍ରମିକଙ୍କ ମୃତ୍ୟୁ ହୋଇଛି। ମୃତକ ହେଲେ ବଙ୍ଗୋମୁଣ୍ଡା ଥାନା ଅନ୍ତର୍ଗତ ବୁରୋବାହାଲ ଗ୍ରାମର ଭାବଗ୍ରାହୀ ପୁଟେଲ। ସୂଚନା ଅନୁସାରେ, କଣ୍ଟାବାଞ୍ଜି-ବଙ୍ଗୋମୁଣ୍ଡା ରାସ୍ତାରେ ନିର୍ମାଣାଧୀନ ନୂତନ ମ୍ୟାରେଜ ପ୍ୟାଲେସରେ କାମ କରୁଥିବା ସମୟରେ ଚାରି ମହଲା ଉପରୁ ଏକ ଲୁହା ଛଡ଼ ତଳେ କାମ କରୁଥିବା ଶ୍ରମିକଙ୍କ ମୁଣ୍ଡରେ ପଡ଼ିଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା। ଘଟଣା ପରେ କଣ୍ଟାବାଞ୍ଜି ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ଅନ୍ୟପଟେ ମୃତ ଶ୍ରମିକଙ୍କ ପରିବାର ପକ୍ଷରୁ ଉଚିତ କ୍ଷତିପୂରଣ ଦାବି କରାଯାଇଛି। ଏହି ଘଟଣା ପରେ ନିର୍ମାଣସ୍ଥଳରେ ଶ୍ରମିକଙ୍କ ସୁରକ୍ଷା ବ୍ୟବସ୍ଥାକୁ ନେଇ ଗମ୍ଭୀର ପ୍ରଶ୍ନ ଉଠିଛି। ପରିବାର ପକ୍ଷରୁ ଅଭିଯୋଗ ହୋଇଛି ଯେ, ନିର୍ମାଣ କାମ କରୁଥିବା ମାଲିକ ଶ୍ରମିକଙ୍କୁ ଆବଶ୍ୟକ ସୁରକ୍ଷା ସରଞ୍ଜାମ ବା ସେଫ୍ଟି କିଟ୍ ଯୋଗାଇ ଦେଇନଥିଲେ। ଏପରିକି ଶତାଧିକ ଶ୍ରମିକ ବିନା ସୁରକ୍ଷା ହେଲମେଟ୍ ଓ ଅନ୍ୟାନ୍ୟ ସରଞ୍ଜାମରେ କାମ କରୁଥିବା ଜଣାପଡ଼ିଛି। ତେବେ ଶ୍ରମିକଙ୍କ ସୁରକ୍ଷା ପ୍ରତି ଅବହେଳା ଯୋଗୁଁ ଏଭଳି ଅଘଟଣ ଘଟିଲା କି, ତାହା ପୁଲିସ ତଦନ୍ତ ପରେ ସ୍ପଷ୍ଟ ହେବ। ନିର୍ମାଣସ୍ଥଳରେ ସୁରକ୍ଷା ନିୟମ ପାଳନ ହେଉଥିଲା କି ନାହିଁ, ଏବେ ତାହା ତଦନ୍ତର ପ୍ରମୁଖ ବିଷୟ ପାଲଟିଛି।