17-Mar-2025

ଅମ୍ବାଭୋନା:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ଅମ୍ବାଭୋନା ତହସିଲ ଅଧୀନସ୍ଥ ଲେଥେର ଗ୍ରାମରେ ମିଶନ ଶକ୍ତି ଗୃହ ନିର୍ମାଣକୁ ନେଇ ବିବାଦ ବଢ଼ିବାରେ ଲାଗିଛି।ଦିର୍ଘ ୪୦ ବର୍ଷରୁ ଉର୍ଦ୍ଧ୍ବ ହେବ ସେହି ଗ୍ରାମର କନ୍ଦର୍ପ ସା ଙ୍କ ବସ୍ତି ପ୍ଳଟରେ ଥିବା ବାସଗୃହ ସମ୍ମୁଖସ୍ଥ ରାସ୍ତା ଉପରେ ପ୍ରଶାସନିକ ଅଧିକାରୀଙ୍କ ବିନା ଅନୁମତିରେ ବେଆଇନଭାବେ ତାଙ୍କ ଷୌଚାଳୟ କୁ ଭାଙ୍ଗି ବଳପୂର୍ବକ କିଛି ମୁଷ୍ଟିମେୟ ଲୋକଙ୍କ ପ୍ରରୋଚନାରେ ପଡି ଆକ୍ରୋଶମୂଳକ ଭାବେ ଗ୍ରାମବାସୀ ଗୃହ ନିର୍ମାଣ କରୁଥିବାରୁ ଏବଂ ତାଙ୍କ ବାସଗୃହ ଓ ଖଲାବାରିକୁ ରାସ୍ତା ଅବରୋଧ କରୁଥିବାରୁ ଏହାକୁ ଅଭିଯୋଗ ନେଇ ପୁର୍ବରୁ କନ୍ଦର୍ପ ସା ଙ୍କ ପରିବାର ଲୋକେ ଅମ୍ବାଭୋନା ଥାନାଧିକାରୀ,ତହସିଲଦାର, ଗୋଷ୍ଠୀ ଉନ୍ନୟନ ଅଧିକାରୀ, ଆରକ୍ଷୀ ଅଧିକାରୀ,ବରଗଡ ଜିଲ୍ଲାପାଳ ଓ ବିଧାୟକ ଙ୍କୁ ଲିଖିତ ଅଭିଯୋଗ କରିଥିଲେ।କାଳେ ହିଂସାକାଣ୍ଡ ଘଟିବାର ସମ୍ଭାବନା ଥିବା ଦର୍ଶାଇ ଉଭୟ ପକ୍ଷ ଙ୍କ ବିରୁଦ୍ଧରେ ଅମ୍ବାଭୋନା ତହସିଲଦାର କାର୍ଯ୍ୟାନୁଷ୍ଠାନ ନେଇଥିଲେ। ମାତ୍ର ମୂଳ ସମସ୍ୟାର ସମାଧାନ ହୋଇ ନ ଥିଲା।୧୪ ଜଣ ସଦସ୍ୟଙ୍କୁ ନେଇ କନ୍ଦର୍ପ ସା ଙ୍କ ବଡ ପରିବାର ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦର୍ଶାଇ ନ୍ୟାୟ ଆଶାରେ ପ୍ରଶାସନିକ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ମାତ୍ର ଏଥିରେ ବିଫଳ ହେବାରୁ ସେମାନେ ସୋମବାର ଦିନ ସକାଳ ୧୦ ଟାରୁ ଅନିର୍ଦ୍ଦିଷ୍ଟ କାଳ ପାଇଁ ଅମ୍ବାଭୋନା ତହସିଲ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନରେ ବସିଛନ୍ତି। ଅମ୍ବାଭୋନା ତହସିଲଦାର ରଘୁନାଥ ପାଣିଗ୍ରାହୀ ଅନଶନକାରୀ ଙ୍କୁ ଭେଟି ବୁଝାସୁଝା କରିଥିଲେ। ମାତ୍ର ସେମାନେ ନ୍ୟାୟ ନ ପାଇବା ପର୍ଯ୍ୟନ୍ତ ଅନଶନରେ ବସିବାକୁ ଜିଦ ଧରିଥିଲେ ।ଖବର ଲେଖା ଯିବା ପର୍ଯ୍ୟନ୍ତ ଅନଶନ ଜାରି ରହିଛି। ଏହି ଆମରଣ ଅନଶନରେ କନ୍ଦର୍ପ ସା ଙ୍କ ଦୁଇପୁଅ ପୁରନ୍ଦର ସା, ଶ୍ବେତରାଜ ସା ବସିଥିବା ବେଳେ ବଡ଼ପୁଅ ଭାସ୍କର ସା ଙ୍କ ସମେତ ପୁତ୍ରବଧୂ ପଦ୍ମୀନି ସା, ସାବିତ୍ରୀ ସା, ରୀନା ସା ପ୍ରମୁଖ ସମର୍ଥନରେ ବାହାରିଛନ୍ତି। ଫଳରେ ତାଙ୍କ ପରିବାରର ୨୧ବର୍ଷିୟ ଶାରୀରିକ ଭିନ୍ନକ୍ଷମ ଛତ୍ରପତି ସା, ସୁନିତା ସା, ଯୁବରାଜ ସା, ପ୍ରତିମା ସା, ସସ୍ମିତା ସା,ଛବିର ସା ପ୍ରମୁଖ ବହୁ ଅସୁବିଧାରେ ଦିନ ଗଣୁଛନ୍ତି।ଆହୁରି ମଧ୍ୟ କନ୍ଦର୍ପ ସା ଙ୍କ କହିବା ଅନୁସାରେ ଏହି ଘଟଣା କୁ ନେଇ ୧୦୭ ଧାରା ଲାଗିଥିବା ସତ୍ୱେ ତରବରିଆ ଭାବେ ଗୃହ ନିର୍ମାଣ କରିଥିବା ଜଣାଇଛନ୍ତି। ଯଦି ଏହି ସା ପରିବାର ଙ୍କୁ ନ୍ୟାୟ ନ ମିଳିଲେ ଆତ୍ମହୂତି କରିବେ ବୋଲି ଜଣାଇଛନ୍ତି। ତେବେ ଦେଖିବାକୁ ରହିଲା ଏମାନଙ୍କୁ କେବେ ନ୍ୟାୟ ମିଳୁଛି? ନ୍ୟାୟ ଅପେକ୍ଷାରେ କନ୍ଦର୍ପ ସା ଙ୍କ ପରିବାର।