20-Apr-2023

ବଲାଙ୍ଗୀର(ପ୍ରେରଣା ଖବର)-ନିଜକୁ ଜଣେ ଶିକ୍ଷିତ ଓ ଦଳିତଙ୍କ ପାଇଁ କାମକରୁଥିବା ସୋସିଆଲ ମିଡିଆରେ କହିବୁଲୁଥିବା ଓଏଭି ଶିକ୍ଷକ ଜଣେ ଯୁବତୀକୁ ବିବାହର ପ୍ରତିଶୃତଦେଇ ପ୍ରତାରଣା କରିଥିବା ଲାଠୋରଥାନାରେ ଅଭିଯୋଗ ହୋଇଛି । ଖପ୍ରାଖୋଲ ବ୍ଲକର ମାଲପଡା ନିବାସୀ ତଥା ପୁଇଁତଳା ବ୍ଲକର ମହିମୁଣ୍ଡା ଆଦର୍ଶ ବିଦ୍ୟାଳୟରେ ଶିକ୍ଷକଥିବା ଗଜମଣୀ ବାଗଙ୍କ ନାମରେ ପ୍ରେମପ୍ରତାରଣାର ଅଭିଯୋଗ ଆଣିଛନ୍ତି ତାଙ୍କର ବାନ୍ଧବୀ ସୁଭଦ୍ରା ସୁନା । ଗଜମଣୀ ମାଲପଡାର ହୋଇଥିବା ବେଳେ ସୁଭଦ୍ରା ସେହି ଗାଁ ପାଖର ଝାଙ୍କରୀପାଲି ଗାଁର ଅଟନ୍ତି । ଦୁହେଁ ଦୀର୍ଘବର୍ଷ ହେଲା ଲିଭଇନ ରିଲେସନରେ ରହିଆସୁଥିଲେ । ଉଭୟେ ପତି ପତ୍ନୀ ଭଳି ରହିଆସୁଥିବା ବେଳେ  ବିବାହର ପ୍ରତିଶୃତି ଦେଇ ଗଜମଣୀ ସୁଭଦ୍ରା ସାଙ୍ଗରେ ଶାରୀରିକ ସଂମ୍ପର୍କ ମଧ୍ୟ ରଖିଥିଲା । କିନ୍ତୁ ଏବେ ଗଜମଣୀ ସୁଭଦ୍ରାଙ୍କୁ ଧୋକାଦେଇ ଅନ୍ୟଏକ ଝିଅକୁ ବିବାହ କରିବାକୁ ନିର୍ବନ୍ଧ କରିସାରିଛନ୍ତି । ଫଳରେ ଅସହାୟ ସୁଭଦ୍ରା ବାଧ୍ୟ ହୋଇ ନ୍ୟାୟ ପାଇବାକୁ ଥାନାର ଦ୍ୱାରସ୍ଥ ହୋଇଛନ୍ତି । ଗତକାଲି ସୁଭଦ୍ରା ତାଙ୍କ ପରିବାର ଲୋକଙ୍କ ସହିତ ଲାଠୋର ଥାନାରେ ପହଞ୍ଚି ଏତଲା ଦେଇଛନ୍ତି । ସୁଭଦ୍ରାଙ୍କ ଏତଲାକୁ ଭିତ୍ତିକରି ଲାଠୋରଥାନାରେ ମାମଲା ନମ୍ବର ୪୮/୨୦୨୩ରେ ରୁଜୁ ହୋଇ ତଦନ୍ତ ଚାଲିଛି । ଆଜି ପାଟଣାଗଡ ଉପଖଣ୍ଡ ଡାକ୍ତରଖାନାରେ ସୁଭଦ୍ରାଙ୍କର ଡାକ୍ତରୀମାଇନା କରାଯାଇଛି । ସେପଟେ ଥାନାରେ ମାମଲା ରୁଜୁ ହେବାପରେ ଗଜମଣୀଙ୍କ କିଛି ଶୁୁଭେଚ୍ଛୁ ଲାଠୋରଥାନାରେ ପହଞ୍ଚି ମାମଲାକୁ ରଫାଦଫା କରିବାକୁ ଉଦ୍ୟମ କରି ବିଫଳ ହୋଇଥିଲେ । ଅଭିଯୁକ୍ତ ଶିକ୍ଷକ ଗଜମଣୀ ଏବେ ଫେରାର ଥିବା ପୋଲିସ କହିଛି । ଖୁବଶୀଘ୍ର ତଦନ୍ତ କରାଯାଇ ଅଭିଯୁକ୍ତକୁ ଧରାଯିବ ବୋଲି ପାଟଣାଗଡ ଏସଡିପିଓ ଜ୍ୟୋତିର୍ମୟ ଭୁକ୍ତା କହିଛନ୍ତି । ଏହି ଅଭିଯୋଗ ନେଇ ଗଜମଣୀଙ୍କୁ ଫୋନରେ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ହେଁ ଫୋନ ବନ୍ଦଥିବାରୁ ଯୋଗାଯୋଗ ହୋଇପାରିନଥିଲା ।