14-Sep-2026

ବଲାଙ୍ଗୀର:ସ୍ଥାନୀୟ ଗାନ୍ଧୀନଗର ପଡ଼ା ସ୍ଥିତ ପିଏମ୍‌ ଶ୍ରୀ ସରକାରୀ ବାଳିକା ଉଚ୍ଚ ବିଦ୍ୟାଳୟ ପରିସରରେ ଭକ୍ତି ଓ ଉତ୍ସାହର ପରିବେଶ ମଧ୍ୟରେ ଶ୍ରୀଗଣେଶ ପୂଜା ପାଳିତ ହୋଇଯାଇଛି।ବିଦ୍ୟା,ବୁଦ୍ଧି ଓ ଜ୍ଞାନର ଆରାଧ୍ୟ ଦେବତା ଶ୍ରୀଗଣେଶଙ୍କ ଆରାଧନାରେ ସମଗ୍ର ବିଦ୍ୟାଳୟ ପରିସର ଆଧ୍ୟାତ୍ମିକ ପରିବେଶରେ ପରିପୂର୍ଣ୍ଣ ହୋଇଉଠିଥିଲା।ସକାଳ ୧୧ଟାରୁ ପାରମ୍ପରିକ ରୀତିନୀତି ଓ ବିଧିବିଧାନ ଅନୁଯାୟୀ ପୂଜାବିଧି ଆରମ୍ଭ ହୋଇଥିଲା।ପୂଜକ ଭାବେ ହିମାଂଶୁ ନନ୍ଦ ପୂଜାକାର୍ଯ୍ୟ ସମ୍ପାଦନ କରିଥିବା ବେଳେ ଦଶମ ଶ୍ରେଣୀର ଛାତ୍ରୀ ଶ୍ରୀୟା ସାହୁ କର୍ତ୍ତା ଭାବେ ଦାୟିତ୍ୱ ତୁଲାଇଥିଲେ।ମନ୍ତ୍ରୋଚ୍ଚାରଣ ଓ ପୂଜାର୍ଚ୍ଚନାରେ ବିଦ୍ୟାଳୟ ପରିବେଶ ଭକ୍ତିମୟ ହୋଇଉଠିଥିଲା।ଏହି ପୂଜା ଅବସରରେ ବିଦ୍ୟାଳୟର ଶିକ୍ଷକ ଡ. ସୁରେଶ ଚନ୍ଦ୍ର ବାରିକଙ୍କ ଦ୍ୱାରା ପ୍ରସ୍ତୁତ ସ୍ୱତନ୍ତ୍ର ସାଜସଜ୍ଜା ବିଶେଷ ଆକର୍ଷଣର କେନ୍ଦ୍ର ପାଲଟିଥିଲା।ହିମାଳୟ ପର୍ବତର ଅବଧାରଣାକୁ ଆଧାର କରି ପୂଜା ମଣ୍ଡପକୁ ସୁନ୍ଦର ଭାବେ ସଜାଯାଇଥିଲା।ପର୍ବତ,ପ୍ରକୃତି ଓ ପରିବେଶର ଅନନ୍ୟ ସମନ୍ୱୟରେ ତିଆରି ଏହି ସାଜସଜ୍ଜା ଛାତ୍ରୀ,ଶିକ୍ଷକ ଓ ଅତିଥିମାନଙ୍କ ମନ ମୋହିଥିଲା।ପୂଜାର ସମସ୍ତ ଦାୟିତ୍ୱ ଶିକ୍ଷୟିତ୍ରୀ ସ୍ୱରୂପା ହୋତା ନିଷ୍ଠାର ସହ ତୁଲାଇଥିଲେ। ତାଙ୍କ ତତ୍ତ୍ୱାବଧାନରେ ପୂଜାସାମଗ୍ରୀ ପ୍ରସ୍ତୁତି,ମଣ୍ଡପ ପରିଚାଳନା ଓ ଅନ୍ୟାନ୍ୟ ବ୍ୟବସ୍ଥା ସୂଚାରୁ ଭାବେ ସମ୍ପନ୍ନ ହୋଇଥିଲା।କାର୍ଯ୍ୟକ୍ରମର ଅନ୍ୟତମ ବିଶେଷ ଆକର୍ଷଣ ଥିଲା ପୂର୍ବତନ ଛାତ୍ରୀମାନଙ୍କ ଯୋଗଦାନ।ବିଦ୍ୟାଳୟର ଗତବର୍ଷ ଅଧ୍ୟୟନ କରିଥିବା ଛାତ୍ରୀମାନେ ନିଜ ପୁରୁଣା ବିଦ୍ୟାଳୟ ପ୍ରତି ଭଲପାଇବା ଓ ଆତ୍ମୀୟତାର ସହ ପୂଜାରେ ଯୋଗଦେଇଥିଲେ।ଏହା ବିଦ୍ୟାଳୟ ଓ ପୂର୍ବତନ ଛାତ୍ରୀମାନଙ୍କ ମଧ୍ୟରେ ଥିବା ଆତ୍ମିକ ସମ୍ପର୍କକୁ ଆହୁରି ମଜବୁତ କରିଥିଲା।ଏହି ଅବସରରେ ଅବସରପ୍ରାପ୍ତ ଶିକ୍ଷକ ସରୋଜ ନାୟକଙ୍କ ସମେତ ଶିକ୍ଷୟିତ୍ରୀ ଅନୁପମା ଉଦ୍ଗାତା,ଶୋଭନା ଚାନ୍ଦ ଓ ସୁପ୍ରଭା ମିଶ୍ର ଯୋଗଦେଇ ପୂଜାର ଶୋଭା ବଢ଼ାଇଥିଲେ।ପୂର୍ବତନ ଶିକ୍ଷକ,ଶିକ୍ଷୟିତ୍ରୀଙ୍କ ଉପସ୍ଥିତି ଛାତ୍ରୀ ଓ ଶିକ୍ଷକମାନଙ୍କ ମଧ୍ୟରେ ଏକ ଆତ୍ମୀୟ ଭାବ ସୃଷ୍ଟି କରିଥିଲା।ଅନ୍ୟପକ୍ଷରେ,ଦଶମ ଶ୍ରେଣୀ ଛାତ୍ରୀ ଅମନ୍ନାଲାଲ ଶତପଥୀ ଓ ଶିଖା ମିଶ୍ର ନିକଟସ୍ଥ ବିଦ୍ୟାଳୟଗୁଡ଼ିକୁ ନିମନ୍ତ୍ରଣ କରିବାର ଦାୟିତ୍ୱ ନେଇଥିଲେ।ସେମାନଙ୍କ ଉଦ୍ୟମରେ ଅନ୍ୟ ବିଦ୍ୟାଳୟର ଛାତ୍ରୀ ଓ ଶିକ୍ଷକମାନଙ୍କ ସହ ଉତ୍ସବର ଭାବ ବିନିମୟର ସୁଯୋଗ ସୃଷ୍ଟି ହୋଇଥିଲା।ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସେବାଶ୍ରୀ ଭୋଇ ଓ ଭାରପ୍ରାପ୍ତ ପ୍ରଧାନ ଶିକ୍ଷୟିତ୍ରୀ ସ୍ୱରୂପା ମଞ୍ଜରୀ ସାମନ୍ତରାଙ୍କ ମାର୍ଗଦର୍ଶନରେ ସମଗ୍ର ପୂଜା କାର୍ଯ୍ୟକ୍ରମ ସୁଚାରୁ ଭାବେ ପରିଚାଳିତ ହୋଇଥିଲା। ଶିକ୍ଷକ,ଶିକ୍ଷୟିତ୍ରୀ,ଛାତ୍ରୀ ଓ ପୂର୍ବତନ ଛାତ୍ରୀଙ୍କ ସାମୂହିକ ସହଯୋଗରେ ଗଣେଶ ପୂଜା ଏକ ମିଳନ ଉତ୍ସବର ରୂପ ନେଇଥିଲା।ପୂଜା ଅବସରରେ ବିଦ୍ୟାର୍ଥୀମାନଙ୍କ ଜ୍ଞାନ,ବୁଦ୍ଧି ଓ ବିବେକର ବିକାଶ ସହ ବିଦ୍ୟାଳୟର ସର୍ବାଙ୍ଗୀଣ ଉନ୍ନତି ପାଇଁ ଶ୍ରୀଗଣେଶଙ୍କ ନିକଟରେ ପ୍ରାର୍ଥନା କରାଯାଇଥିଲା।ଏହି ଗଣେଶ ପୂଜା ଛାତ୍ରୀମାନଙ୍କ ମନରେ ଆନନ୍ଦ,ଉତ୍ସାହ ଓ ଏକତାର ଭାବ ସୃଷ୍ଟି କରିବା ସହ ବିଦ୍ୟାଳୟର ପୁରୁଣା ଓ ନୂଆ ପିଢ଼ିକୁ ଏକ ସୂତ୍ରରେ ବାନ୍ଧିଥିଲା।