14-Sep-2026

ନୂଆଦିଲ୍ଲୀ(ପ୍ରେରଣା ଖବର): ୱାର୍ଲଡ୍ ଓଡ଼ିଶା ସୋସାଇଟି (ୱା ଓ ସୋ) ପକ୍ଷରୁ କିମ୍ବଦନ୍ତୀ ଗାୟକ ସ୍ବର୍ଗତଃ ଶ୍ରୀ ପ୍ରଣବ ପଟ୍ଟନାୟକଙ୍କୁ ଭବ୍ୟ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି। ୱା ଓ ସୋ ଦ୍ୱାରା ଆଭାସୀ ମଞ୍ଚରେ ଆୟୋଜିତ ଏକ ଶୋକସଭାରେ ବିଶ୍ୱବ୍ୟାପୀ ପ୍ରବାସୀ ଓଡ଼ିଆ ନେତାମାନେ ଯୋଗଦେଇ ଶ୍ରୀ ପଟ୍ଟନାୟକଙ୍କର ଦୁଃଖଦ ବିୟୋଗ ନେଇ ଗଭୀର ଶୋକ ପ୍ରକାଶ କରିଛନ୍ତି। ଏହି ଶୋକ ସମାବେଶରେ ୱା ଓ ସୋ‌ର କାର୍ଯ୍ୟକର୍ତ୍ତା, ସଦସ୍ୟ ଓ ଶୁଭେଚ୍ଛୁ ବୃନ୍ଦ  , ଦେଶ ବିଦେଶର ପ୍ରମୁଖ ଅଣନିବାସୀ ଓଡ଼ିଆ ସମ୍ପ୍ରଦାୟ ନେତୃମଣ୍ଡଳୀ ତଥା ଶ୍ରୀ ପଟ୍ଟନାୟକଙ୍କର ପ୍ରଶଂସକ ମାନେ ଯୋଗ ଦେଇଥିଲେ।
                                               ଡିଜିଟାଲ୍ ସଭାକୁ ସମ୍ବୋଧନ କରି ବିଶିଷ୍ଟ ବ୍ୟକ୍ତି ମାନେ ସ୍ବର୍ଗତଃ ଶ୍ରୀ ପ୍ରଣବ ପଟ୍ଟନାୟକ ଅସଂଖ୍ୟ କାଳଜୟୀ  ସଙ୍ଗୀତ ଗାୟନ କରି ଓଡ଼ିଶାର ସମୃଦ୍ଧ କଳା, ଉନ୍ନତ ସଂସ୍କୃତି ଓ ଉତ୍ତୁଙ୍ଗ ଐତିହ୍ୟକୁ ବିଶ୍ୱବ୍ୟାପୀ ପ୍ରଚାର, ପ୍ରସାର ଓ ଲୋକପ୍ରିୟ କରିବାରେ ବିପୁଳ ଯୋଗଦାନ ଦେଇଥିବା ଉଲ୍ଲେଖ କରିଥିଲେ ।
                                                ସଭାରେ ପୌରହିତ୍ୟ କରି ୱାର୍ଲଡ୍ ଓଡ଼ିଶା ସୋସାଇଟିର ଅଧ୍ୟକ୍ଷ ଓ ବରିଷ୍ଠ ସାମ୍ବାଦିକ କିଶୋର ଦ୍ୱିବେଦୀ ସ୍ବର୍ଗତଃ ଶ୍ରୀ ପଟ୍ଟନାୟକଙ୍କ ସହ  ୱା ଓ ସୋ‌ର ଖୁବ ଘନିଷ୍ଠ ସମ୍ପର୍କ ଥିଲା ବୋଲି କହିଥିଲେ। କୋଭିଡ୍ ସମୟରେ ଏହି ବିଶ୍ୱସଂସ୍ଥାର ଗଠନ ପର୍ଯ୍ୟାୟରେ ଶ୍ରୀ ପଟ୍ଟନାୟକ ଲଗାତର ସାହାଯ୍ୟ ଓ ନିରବଚ୍ଛିନ୍ନ ସହଯୋଗ ଯୋଗାଇ ଦେଇ ଆସିଥିବା ଶ୍ରୀ ଦ୍ୱିବେଦୀ ପ୍ରକାଶ କରିଥିଲେ।
                                                       ଏହି ଅବସରରେ ସ୍ବର୍ଗତଃ ଶ୍ରୀ ପ୍ରଣବ ପଟ୍ଟନାୟକ ଙ୍କର ପତ୍ନୀ କସ୍ତୁରିକା ପଟ୍ଟନାୟକ  ୱା ଓ ସୋର ସଦସ୍ୟ ବୃନ୍ଦ ଏବଂ ଓଡ଼ିଶାର ଅଗଣିତ ଜନସାଧାରଣ ତାଙ୍କ ପରିବାର ପ୍ରତି  ପ୍ରଦର୍ଶନ କରିଥିବା ଅଜସ୍ର ସମବେଦନା ଓ ଅପାର ସ୍ନେହ ଶ୍ରଦ୍ଧାକୁ ସେ  କେବେ ଭୁଲି ପାରିବେ ନାହିଁ ବୋଲି ସୂଚାଇ ଥିଲେ ।
                                                   ପ୍ରଣବ ପଟ୍ଟନାୟକ ଜଣେ ବ୍ୟକ୍ତି ନୁହେଁ,  ଏକ ଅନୁଷ୍ଠାନ ଥିଲେ ବୋଲି ଦର୍ଶାଇ, ସମ୍ଭାବନାର ସମ୍ପାଦକ ଦେବ ପ୍ରସାଦ ପରିଜା ଓଡ଼ିଶାର ସଙ୍ଗୀତ ଜଗତକୁ ସମୃଦ୍ଧ କରିବାରେ ତାଙ୍କର ବ୍ୟାପକ ଅବଦାନକୁ ସରକାର ସ୍ୱୀକୃତି ଦେଇପାରିନଥିବାରୁ କ୍ଷୋଭ ପ୍ରକାଶ କରିଥିଲେ।
                                                        ପ୍ରଖ୍ୟାତ ଗାୟିକା ଅନିନ୍ଦିତା ଦାସ ,       ୱା ଓ ସୋର ସାଧାରଣ ସମ୍ପାଦକ ପୁଷ୍ପାଞ୍ଜଳି ବାରିକ, ଏବଂ  ୱା ଓ ସୋ  ମହିଳା ଶାଖାର ଉପ-ସଭାପତି ରୀତା ପାତ୍ର ଶ୍ରୀ ପଟ୍ଟନାୟକଙ୍କର ଅନେକ ସୁମଧୁର ଓ ମର୍ମସ୍ପର୍ଶୀ   ଲୋକପ୍ରିୟ ଗୀତ ଗାଇ ତାଙ୍କୁ ସଙ୍ଗୀତାତ୍ମକ ଶ୍ରଦ୍ଧାଞ୍ଜଳି ପ୍ରଦାନ କରିଥିଲେ।
                                         ଅନ୍ୟମାନଙ୍କ ମଧ୍ୟରେ ଦିଲ୍ଲୀ ଉତ୍କଳ ଅସ୍ମିତା ଫାଉଂଡେସନର ପ୍ରତିଷ୍ଠାତା ସଭାପତି ଡ଼ଃ ଅନୀତା ପଣ୍ଡା,ବରିଷ୍ଠ ପ୍ରଶାସକ ବିଭୂତି ଭୂଷଣ ପଟ୍ଟନାୟକ, ଆକାଶବାଣୀର ନିର୍ଦ୍ଦେଶିକା ସୁଭଶ୍ରୀ ମହାପାତ୍ର, ୱା ଓ ସୋର ଉପାଧ୍ୟକ୍ଷ ଡଃ ନଳିନୀ ପତି, ‌ୱା ଓ ସୋ ର ମହାସଚ୍ଚିବ  ଶିବ ରଞ୍ଜନ ବିଶ୍ୱାଳ, ୱା ଓ ସୋ ମହିଳା ଶାଖାର ସଭାପତି ଡଃ ସୁନନ୍ଦା ମିଶ୍ର ପଣ୍ଡା, ୱା ଓ ସୋ‌ର ସାଂସ୍କୃତିକ ସାଧାରଣ ସମ୍ପାଦକ ଡଃ କାବେରୀ ବେହେରା, ୱା ଓ ସୋ‌ର ଯୁଗ୍ମ ମହାସଚ୍ଚିବ ଡଃ ସୀତାଂଶୁ ଶେଖର ନନ୍ଦ, ‌ ୱା ଓ ସୋର ସାଧାରଣ ସମ୍ପାଦକ ଉମାକାନ୍ତ ଜେନା, ୱା ଓ ସୋର କୁୱେତ ଅଧ୍ୟାୟର  ସଭାପତି ବିଶ୍ୱ ରଞ୍ଜନ ସାହୁ ଏବଂ  ୱା ଓ ସୋ‌ର ସୁସ୍ଥତା ବିଭାଗର ଯୁଗ୍ମ ସାଧାରଣ ସମ୍ପାଦକ ସୁଶାନ୍ତ ଚାନ୍ଦ ପ୍ରମୁଖ ସ୍ବର୍ଗତଃ ଆତ୍ମା ପ୍ରତି ଶ୍ରଦ୍ଧା ସୁମନ ଅର୍ପଣ କରି ତାଙ୍କ ବିୟୋଗରେ ଓଡ଼ିଶାର ସଙ୍ଗୀତ ଜଗତରେ ଏକ ଅପୂରଣୀୟ ଶୂନ୍ୟତା ସୃଷ୍ଟି ହୋଇଥିବା କହିଥିଲେ। ଆରମ୍ଭରେ ଦିଲ୍ଲୀ ସତସଙ୍ଗ କେନ୍ଦ୍ରର ପ୍ରତିଷ୍ଠାତା ସମ୍ପାଦକ ସ୍ବର୍ଗତଃ ଯତୀନ୍ଦ୍ର ନାଥ ମହାନ୍ତିଙ୍କ ଆତ୍ମାର ସଦଗତି କାମନା କରି ଏକ ମିନିଟ ନୀରବତା ଅବଲମ୍ବନ କରାଯାଇଥିଲା   । ସଭା ଶେଷରେ ୱା ଓ ସୋ ର ମହାସଚ୍ଚିବ  ଶିବ ରଞ୍ଜନ ବିଶ୍ୱାଳ ଧନ୍ୟବାଦ ପ୍ରଦାନ କରିଥିଲେ।
                                                       ୱାର୍ଲଡ୍ ଓଡ଼ିଶା ସୋସାଇଟିର ଆନ୍ତର୍ଜାତିକ ସଂଯୋଜକ ଅକ୍ଷୟ ମହାନ୍ତି, ସୁନାମଧନ୍ୟ ସମାଜସେବୀ ମମତା ବେବର୍ତ୍ତା ପଟ୍ଟନାୟକ, ଅପରାହ୍ନର ସମ୍ପାଦକ ବଂଶୀଧର ଜେନାଏବଂ ସ୍ବର୍ଗତଃ ଶ୍ରୀ ପ୍ରଣବ ପଟ୍ଟନାୟକଙ୍କର ପୁତ୍ର ଅନୁଭବ ପଟ୍ଟନାୟକ ଉପସ୍ଥିତ ଥିଲେ। ୱା ଓ ସୋର ଯୁବ ଶାଖା ସଦସ୍ୟ ନନ୍ଦନ ଦ୍ୱିବେଦୀ ଡିଜିଟାଲ୍ ନିୟନ୍ତ୍ରଣ କକ୍ଷକୁ ଦକ୍ଷତାର ସହ ସଂଚାଳନା କରିଥିଲେ।