07-May-2026

କଟକ(ତପନ ମହାନ୍ତି): ବୟାଳିଶମୌଜା କଳପଡ଼ା ବଜାରରୁ ଗତ ୨୭ତାରିଖ ସନ୍ଧ୍ୟାରୁ ଅଂଶୁମାନ ପରିଡ଼ା (୧୨) ନାମକ ନାବାଳକ ନିଖୋଜ ଥିବାବେଳେ ପୁଲିସ ଏପର୍ଯ୍ୟନ୍ତ ତାଙ୍କୁ ଖୋଜିବାରେ ସଫଳ ହୋଇପାରି ନାହିଁ। ସିସିଟିଭି ଯାଞ୍ଚ ଓ ସନ୍ଧାନୀ କୁକୁର ଦ୍ବାରା ତଦନ୍ତ ସହ ଖୋଦ ଡିସିପି ଓ ଏସିପି ବାରମ୍ବାର ଅନୁଧ୍ୟାନ କରିଥିଲେ ହେଁ ଅଂଶୁମାନଙ୍କ ସନ୍ଧାନ ମିଳିପାରି ନାହିଁ। କଳପଡ଼ା ଗ୍ରାମର ସ୍ୱର୍ଗତ ସୁରେଶ ପରିଡ଼ାଙ୍କ ପୁଅ ସପ୍ତମ ଶ୍ରେଣୀରେ ପଢ଼ୁଥିବା ଅଂଶୁମାନ ଗତ ୨୭ତାରିଖରେ ନିଖୋଜ ହୋଇଯାଇଥିଲା। ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି ପରେ ମଧ୍ୟ ସନ୍ଧାନ ନ ମିଳିବାରୁ ତା' ପରଦିନ ୨୮ ତାରିଖରେ ନାବାଳକର ବଡ଼ବାପା ରଞ୍ଜନ ପରିଡ଼ା ଥାନାରେ ଅଭିଯୋଗ କରିଥିଲେ। ବୟାଳିଶମୌଜା ପୁଲିସ ମୁଖ୍ୟ ରାସ୍ତାରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିବା ସହ ସନ୍ଧାନୀ କୁକୁର ଆଣି ତଦନ୍ତ କରିଥିଲେ ମଧ୍ୟ କୌଣସି ସଫଳତା ମିଳିନାହିଁ । ଏପରିକି ନିଜେ ଡିସିପି ଓ ଏସିପି ଏକାଧୂକ ଥର ଘଟଣାସ୍ଥଳ ବୁଲି ଅନୁଧ୍ୟାନ

କରିଛନ୍ତି। ବୟାଳିଶମୌଜା ଥାନା ପକ୍ଷରୁ ନିଖୋଜ ପିଲାର ସୂଚନାଦାତାଙ୍କ ପାଇଁ ୫୦ ହଜାର ଟଙ୍କାର ପୁରସ୍କାର ରାଶି ଘୋଷଣା କରିବା ସହିତ ସୂଚନାଦାତାଙ୍କ ତଥ୍ୟ ସମ୍ପୂର୍ଣ୍ଣ ଗୋପନୀୟ ରଖାଯିବ କହି ଏକ ସୂଚନା ମଧ୍ୟ ଜାରି କରିଛି। ଅଂଶୁମାନର ବାପା ଜୀବିତ ଥିବାବେଳେ ସେମାନେ ରାଜ୍ୟ ବାହାରେ ରହୁଥିଲେ। ତେବେ ୭ମାସ ପୂର୍ବେ ବାପାଙ୍କ ମୃତ୍ୟୁ ପରେ ମା' ପୁଅ ବୟାଳିଶମୌଜା ଚାଲିଆସିଥିଲେ। ଅଂଶୁମାନ ଓ ମା' ତାଙ୍କ ବଡ଼ବାପା ଓ ବଡ଼ ମା'ଙ୍କ ସହିତ ରହୁଥିଲେ। ଅଂଶୁମାନ ଭଲଭାବେ ହିନ୍ଦୀ କହି ପାରୁଥିବାରୁ

 ବାହାରକୁ ଯିବା ତାଙ୍କ ପକ୍ଷରେ  ସହଜ ହୋଇଥିବ ବୋଲି ସ୍ଥାନୀୟ ବାସିନ୍ଦା ସନ୍ଦେହ କରୁଛନ୍ତି। ଅନ୍ୟପଟେ ଯଦି ଏହା ଅପହରଣ ତେବେ ଅପହରଣ ପଛର କାରଣ କ'ଣ? ଏଭଳି ଅନେକ ଆଶଙ୍କା ସୃଷ୍ଟି ହେଉଛି ବୟାଳିଶମୌଜା ଜନସାଧାରଣଙ୍କ ମନରେ । ତେବେ ୧୨ ବର୍ଷ ବୟସର ପିଲାଟି ଏକା କୁଆଡ଼େ ପଳାଇବ ଏକଥା ବି ଗ୍ରହଣୀୟ ନୁହେଁ। । ତେବେ ପିଲାଟି ହଜିଯିବା ଆଉ ଅପହରଣ  କଥା ଠାରୁ ଆଗକୁ ଯାଇ ପୁଲିସ ଘଟଣାକୁ ଅନ୍ୟ ଅନ୍ୟ ଦୃଷ୍ଟିରୁ ତର୍ଜମା କରିବାର ଆବଶ୍ୟକ‌ତା ରହିଛି ବୋଲି ଜଣେ ଅବସରପ୍ରାପ୍ତ ପୁଲିସ କର୍ମଚାରୀ ମତ ରଖୁଛନ୍ତି। ଛନ୍ତି । ଅନ୍ୟପଟେ ପିଲା ହଜିବା ଘଟଣାକୁ ସହଜରେ ଗ୍ରହଣ କରୁ ନ ଥିବା ବୟାଳିଶ ମୌଜା ବାସୀ ଏବଂ ବିଭିନ୍ନ  ସାମାଜିକ ସଂଗଠନ ମନରେ ଅସନ୍ତୋଷ ଦାନା ନା ବାନ୍ଧୁଛି । ଘଟଣା ପରଠାରୁ ଛୋଟ ପିଲାଙ୍କୁ ବାହାରକୁ ଛାଡ଼ିବାକୁ ସ୍ଥାନୀୟ ଲୋକେ ଭୟ କରୁଛନ୍ତି। ତେଣୁ ପିଲାଟିକୁ ଯଥାଶୀଘ୍ର ଖୋଜି ଆଣିବା ପାଇଁ ତଦନ୍ତ ତ୍ବରାନ୍ବିତ କରିବାକୁ ପୁଲିସ ମହାନିର୍ଦେଶକଙ୍କ ନିକଟରେ   ଅଞ୍ଚଳବାସୀ     ଦାବି କରିଛନ୍ତି।