07-May-2026

ବଲାଙ୍ଗିର(ଅନ୍ତର୍ଯ୍ୟାମୀ ସାହୁ): ବଲାଙ୍ଗିର ସହରରେ ଦୀର୍ଘଦିନ ଧରି ଚାଲିଥିବା ପିଇବା ପାଣି ସମସ୍ୟା ପ୍ରତି ଅସନ୍ତୋଷ ପ୍ରକାଶ କରି ଆଜି ପୌରାଧ୍ୟକ୍ଷା ଶ୍ରୀମତୀ ଲିକା ସାହୁଙ୍କ ନେତୃତ୍ୱରେ ସର୍ବଦଳୀୟ କାଉନସିଲରମାନେ ଜନସ୍ବାସ୍ଥ୍ୟ ବିଭାଗ କାର୍ଯ୍ୟାଳୟ ଆଗରେ ଖାଲି ମାଠିଆ ନେଇ ପ୍ରତିବାଦ କରି ଥିଲେ। ଏହି ପ୍ରତିବାଦ ସମୟରେ ପୌରାଧ୍ୟକ୍ଷା ଶ୍ରୀମତୀ ସାହୁ କହିଥିଲେ ଯେ, ପୂର୍ବତନ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଙ୍କ ଅନୁଦାନରେ ନିର୍ମାଣାଧୀନ ମେଗା ପାନୀୟଜଳ ଯୋଗାଣ ପ୍ରକଳ୍ପ ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇନଥିବା ଦୁଃଖଦ ଏବଂ ଏହାର କାର୍ଯ୍ୟାନ୍ବୟନରେ କେଉଁମାନେ ବାଧା ସୃଷ୍ଟି କରୁଛନ୍ତି, ତାହା ସ୍ପଷ୍ଟ କରିବାକୁ ଦାବି କରାଯାଉଛି। ଏହା ସହ ସ୍ଥାନୀୟ ବିଧାୟକ ଶ୍ରୀଯୁକ୍ତ କଳିକେଶ ନାରାୟଣ ସିଂହଦେଓ ଅନେକ ଥର ପାନୀୟଜଳ ଯୋଗାଣ ବିଷୟରେ ସମିକ୍ଷା କରିବା ସମୟରେ କରିଦେବୁ କରିବୁ କରାଯିବ କହିକହି ଆଜି ପର୍ଯ୍ୟନ୍ତ ସମସ୍ଯାର ସମାଧାନ କରୁନାହିଁ ଜନସ୍ବାସ୍ଥ୍ଯ ବିଭାଗ ଯାହା ଫଳରେ ସାଧାରଣ ଜନତାଙ୍କ ଆକ୍ରୋଶ ଜନପ୍ରତିନିଧିଙ୍କ ଉପରେ ରହୁଛି । ନା କୌଣସି ୱାର୍ଡରେ ସିଣ୍ଟେକ୍ସ ଟାଙ୍କି ର ବ୍ଯବସ୍ଥା କରିଛନ୍ତି ନା ଗୋଟିଏ କୌଉଠି ଟିଉବୱେଲ ଖୋଳିଛନ୍ତି । କେଉଁ ସମୟରେ ପାଣି ଦିଆଯାଉଛି ତାର କିଛି ସଠିକ ସମୟ ନାହିଁ । କେଉଁ ଅଞ୍ଚଳ କୁ ଘଣ୍ଟାଏ ପାଣି ଯୋଗାଣ ତ ଆଉ କେଉଁ ଅଞ୍ଚଳ କୁ ଅଳ୍ପ ସମୟ ପାଇଁ ଜଳ ଯୋଗାଣ ହେଉଛି ଫଳରେ ଲୋକେ ହନ୍ତସନ୍ତ ହେଉଛନ୍ତି । ତେଣୁ ଆଜି ବାଧ୍ଯ ବାଧକ ହୋଇ ଜନସ୍ବାସ୍ଥ୍ଯ ବିଭାଗ କାର୍ଯ୍ଯାଳୟକୁ ଆନ୍ଦୋଳନ ବା ପ୍ରତିବାଦ କରିବାକୁ ଆସିବାକୁ ପଡିଲା। ଶିଘ୍ର ଏହାର ସମାଧାନ ନହେଲେ ବଡ ଧରଣର ଆନ୍ଦୋଳନ କରିବାକୁ ପଛାଇବୁ ନାହିଁ ବୋଲି ଚେତାବନୀ ଦେଇଛନ୍ତି । 
ବିଭିନ୍ନ ୱାର୍ଡର କାଉନସିଲର ମାନେ ମଧ୍ୟ ମତ ପ୍ରକାଶ କରିଥିଲେ ଯେ, ସହରର ବିଭିନ୍ନ ଅଞ୍ଚଳରେ ପାଇପଲାଇନ୍ ବିଛାଇ ଦିଆଯାଇଥିଲେ ମଧ୍ୟ ଅନେକ ନାଗରିକ ଏପର୍ଯ୍ୟନ୍ତ ପାଣି ସୁବିଧାରୁ ବଞ୍ଚିତ ଅଛନ୍ତି। ସେମାନେ ତୁରନ୍ତ ସମସ୍ୟାର ସମାଧାନ ଓ ନିୟମିତ ପାଣି ଯୋଗାଣ ସୁନିଶ୍ଚିତ କରିବାକୁ ଦାବି କରିଥିଲେ।
ଏହି ପରିପ୍ରେକ୍ଷିତରେ ପୌରପରିଷଦର ପ୍ରତିନିଧି ମାନେ ଜନସ୍ବାସ୍ଥ୍ୟ ବିଭାଗକୁ ଶୀଘ୍ର ପଦକ୍ଷେପ ଗ୍ରହଣ କରି ବଲାଙ୍ଗିର ସହରବାସୀଙ୍କୁ ନିୟମିତ ପିଇବା ପାଣି ଯୋଗାଇ ଦେବାକୁ ଅନୁରୋଧ କରିଛନ୍ତି। ଯଦି ସାତ ଦିନ ମଧ୍ଯରେ ଏହାର ସମାଧାନ ନହୁଏ ତାହେଲେ ହଜାର ହଜାର ସଂଖ୍ୟକ ଜନତାଙ୍କୁ ନେଇ ଆଗାମୀ ଦିନରେ ଜନସ୍ବାସ୍ଥ୍ଯ ବିଭାଗକୁ ଘେରାଉ କରାଯିବ । କୌଣସି ଅପ୍ରିତିକର ପରିସ୍ଥିତି ଉପୁଜିଲେ ଜିଲ୍ଲା ପ୍ରଶାସନ କିମ୍ବା ସରକାର ଦାୟୀ ରହିବେ ବୋଲି କଡା ଚେତାବନୀ ଦେଇଛନ୍ତି ପୌରାଧ୍ୟକ୍ଷା । ଏହି ଅଭିନଵ ପ୍ରତିବାଦ ରେ ବଲାଙ୍ଗିର ପୌରାଧ୍ୟକ୍ଷାଙ୍କ ସମେତ ଉପାଧ୍ୟକ୍ଷା ଗାୟତ୍ରୀ ଭୋଇ ସମେତ ବରିଷ୍ଠ କାଉନସିଲର ସମ୍ଭୁ ନାଗ , ଅରବିନ୍ଦ ପରୁଆ,  ନନ୍ଦିନୀ ପୋଢ , ସନ୍ତୋଷିନୀ କୁଅଁର,  ପିଙ୍କି କବାଟ , ସାଞ୍ଜୁଲତା ଦନ୍ତା , କିଶୋର କୁମ୍ଭାର,  ଗଙ୍ଗା ଚାନ୍ଦ,  ଶତୃଘନ ବାଗ,  ଲଲାଟେନ୍ଦୁ ପଟ୍ଟନାୟକ,  ପ୍ରତିମା ଛତ୍ରିଆ, ପ୍ରେମଲତା ନାଏକ , ସସ୍ମିତା ନନ୍ଦ , ରଜନୀ ବନଛୋରଙ୍କ ସମେତ ସମସ୍ତ କାଉନସିଲର ଉପସ୍ଥିତ ଥିଲେ ।