25-Apr-2026

କଟକ(ତପନ ମହାନ୍ତି): ସଦର ଥାନା ଅନ୍ତର୍ଗତ ବାଲିକୁଦା ଠାରେ ରହିଛି ପୂର୍ତ୍ତ ଓ ଗୃହ ନିର୍ମାଣ ବିଭାଗ କଟକ ଡିଭିଜନ-୨ କାର୍ଯ୍ୟାଳୟ । ସମଗ୍ର ଜିଲ୍ଲାରେ ନିର୍ମାଣ ଓ କାର୍ଯ୍ୟକାରୀ ହେଉଥିବା ବୃହତ ପ୍ରକଳ୍ପ, ରାସ୍ତା, କୋଠା, ସେତୁ ଆଦିର ନକ୍ସା ଓ ଢାଞ୍ଚା ଏହିଠାରେ ପ୍ରସ୍ତୁତ ଏବଂ ନିୟନ୍ତ୍ରଣ ହୋଇଥାଏ। ୨୦୦୮ ରେ ଶିଳାନ୍ୟାସ ପରେ ନିର୍ମାଣ କାର୍ଯ୍ୟ ଆରମ୍ଭ ହୋଇ ୨୦୧୨ ଜୁନ ୧୪ ତାରିଖ ପହିଲି ରଜରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ବାରା ଉଦଘାଟିତ ହୋଇଥିବା ଏହି ୬ ମହଲା ବିଶିଷ୍ଟ ପ୍ରତିଷ୍ଠାନର ଅବସ୍ଥା ଶୋଚନୀୟ ହୋଇ ପଡ଼ିଛି। ଦୀର୍ଘ ଦିନ ଧରି କାର୍ଯ୍ୟାଳୟ ଓ ଅନ୍ୟାନ୍ୟ ବିଭାଗର କୋଠାରେ ରଙ୍ଗ ଦିଆଯାଇନଥିବାରୁ ତାହା ବିବର୍ଣ୍ଣ ଦେଖାଗଲାଣି। ପ୍ରତିଷ୍ଠାନର ମୁଖ୍ୟ ଫାଟକ କଳଙ୍କି ଲାଗି ଭାଙ୍ଗିବାକୁ ବସିଛି। ଆବଶ୍ୟକ ମରାମତି ଅଭାବରୁ ପାଚେରି ଭାଙ୍ଗିରୁଜି ଗଲାଣି । କାର୍ଯ୍ୟାଳୟକୁ ମୁଖ୍ୟ ସଂଯୋଗକାରୀ ରାସ୍ତାର ଅବସ୍ଥା ମଧ୍ୟ ତଦ୍ରୂପ ରାଜ୍ୟରେ କୋଟି କୋଟି ଟଙ୍କା ବ୍ୟୟରେ ବଡ଼ ବଡ଼ ନିର୍ମାଣ ପ୍ରକଳ୍ପ କାର୍ଯ୍ୟକାରୀ କରୁଥିବା ଏହି ପ୍ରତିଷ୍ଠାନ ନିଜକୁ ସଜାଡ଼ିବାରେ ସଫଳ ହୋଇପାରୁନାହିଁ। ପ୍ରତିଷ୍ଠାନ

ପରିସରରେ ଡ୍ରେନ ପ୍ଲାବ୍ ଭାଙ୍ଗିରୁଜି ଯାଇଛି କାର୍ଯ୍ୟାଳୟ ପରିସର ଆବର୍ଜନାରେ ପରିପୂର୍ଣ୍ଣ ହୋଇଥିଲାବେଳେ ଗୋରୁ ପଲଙ୍କ ଅବାଧ ବିଚରଣ ପ୍ରତିଷ୍ଠାନର ପରିବେଶକୁ ନଷ୍ଟ କରୁଛି। ଅପରପକ୍ଷରେ ନିର୍ମାଣ ସମ୍ପର୍କିତ ସମସ୍ତ ପ୍ରଶିକ୍ଷଣ ଉପଲବ୍ଧ କରାଇବା ନେଇ ଦକ୍ଷତା ବିକାଶ ବିଭାଗ ପକ୍ଷରୁ ଏଠାରେ ଏକ ତାଲିମ ପ୍ରତିଷ୍ଠାନ କାର୍ଯ୍ୟକାରୀ ହେଉଛି। ରାସ୍ତା ତିଆରି, ସେତୁ କାମ, ସୌର ଶକ୍ତି ଓ ଅଟ୍ଟାଳିକା ନିର୍ମାଣ ପରି ଗୁରୁତ୍ବପୂର୍ଣ୍ଣ କ୍ଷେତ୍ରରେ ଅଭିଜ୍ଞ କର୍ମଚାରୀଙ୍କୁ ପ୍ରକଳ୍ପ କାର୍ଯ୍ୟରେ ନିୟୋଜିତ କରିବା ପୂର୍ବରୁ ପ୍ରଥମେ ଏହି କେନ୍ଦ୍ରରେ

ସେମାନଙ୍କୁ ଆବଶ୍ୟକ ପ୍ରଶିକ୍ଷଣ ଦିଆଯାଏ । ବର୍ତମାନ ଏଠାରେ ୫ଶହ ପ୍ରଶିକ୍ଷାର୍ଥୀଙ୍କୁ ତାଲିମ ପ୍ରଦାନ କରାଯାଉଛି। ମାତ୍ର ଏପରି ଏକ ଗୁରୁତ୍ବପୂର୍ଣ୍ଣ ପ୍ରତିଷ୍ଠାନର ପ୍ରଶିକ୍ଷାର୍ଥୀଙ୍କ ପାଇଁ ଉଦ୍ଦିଷ୍ଟ ପୁରୁଷ ଛାତ୍ରାବାସ କୋଠା ଭାଙ୍ଗିରୁଜି ଗଲାଣି ଛାତ ଓ କାନ୍ଥରୁ ପ୍ଲାଷ୍ଟର ଖଣ୍ଡ ଖସୁଛି। ବାଲିକୁଦା-ତ୍ରିଶୂଳିଆ ମୁଖ୍ୟ ରାସ୍ତା ପାର୍ଶ୍ଵରେ ଅବସ୍ଥିତ ଏହି କାର୍ଯ୍ୟାଳୟର ଏପରି ଅବସ୍ଥା ସମ୍ପର୍କରେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଅବଗତ ଥାଇ ମଧ୍ୟ ଏହାର ପ୍ରତିକାର ନିମନ୍ତେ କୌଣସି ପଦକ୍ଷେପ ଗ୍ରହଣ ନ କରିବା ଆଶ୍ଚର୍ଯ୍ୟର ବିଷୟ ହୋଇଛି।