02-Feb-2021

ଖଲ୍ଲିକୋଟ,ଗଞ୍ଜାମ(ପ୍ରେରଣା ଖବର): ଗଞ୍ଜାମ ପୋଲିସକୁ ମିଳିଛି ବଡ ସଫଳତା। ବେଆଇନ ଅସ୍ତ୍ରଶସ୍ତ୍ର ଓ ଅପରାଧ ଯୋଜନା ଅଭିଯୋଗ ୨ଟି ଭିନ୍ନ ଘଟଣାରେ ୫ ଜଣଙ୍କୁ ଗିରଫ କରିଛି ପୋଲିସ। ଗୋଟିଏ ଘଟଣାରେ ଖଲ୍ଲିକୋଟ ବିଜେପି ମଣ୍ଡଳ ସଭାପତି ସନ୍ତୋଷ ରାଉତଙ୍କୁ ବେଆଇନ ବନ୍ଧୁକ ରଖିଥିବା ଅଭିଯୋଗରେ ଗିରଫ କରାଯାଇଥିବା ବେଳେ  ଅନ୍ୟ ୪ ଜଣ ଅଭିଯୁକ୍ତଙ୍କୁ ଡକାୟତି ଯୋଜନା ଅଭିଯୋଗରେ ଗିରଫ କରାଯାଇଛି। ଗିରଫ ବିଜେପି ମଣ୍ଡଳ ସଭାପତିଙ୍କ ସ୍ତ୍ରୀ ଖଲ୍ଲିକୋଟ ବ୍ଲକ କୈରାସି ପଞ୍ଚାୟତର ସମିତିସଭ୍ୟା ପଦରେ ଅଛନ୍ତି।

ବିଜେପି ନେତାଙ୍କ ଘରେ ନାଟକୀୟ ଢ଼ଙ୍ଗରେ ଚଢ଼ାଉ କରି ଗୋଟିଏ ବନ୍ଧୁକ ଜବତ କରିଛି। କିନ୍ତୁ ଦ୍ବିତୀୟ ଘଟଣାରେ ଗିରଫ ୪ ଅଭିଯୁକ୍ତଙ୍କଠାରୁ  ବନ୍ଧୁକ, ଗୁଳି ଓ ଖଣ୍ଡ ଜବତ କରାଯାଇଛି।  ସେମାନେ ଚୋରି ରାହାଜାନିରେ ସଂପୃକ୍ତ ଥିବା ପୋଲିସ ସୂଚନା ଦେଇଛି।  ତେବେ ପ୍ରଥମ ଘଟଣା ସହ ଦ୍ବିତୀୟ ଘଟଣାରେ ଗିରଫ ଅଭିଯୁକ୍ତମାନଙ୍କର ସଂପର୍କ ଅଛି ନା, ତାହା ପୋଲିସ ସ୍ପଷ୍ଟ କରି ନାହିଁ। ସେପଟେ ଗିରଫ ବିଜେପି ନେତାଙ୍କ ଘରୁ ଜବତ ଲାଇସେନ୍ସ ବିହୀନ ବନ୍ଧୁକ ସହ ନିକଟରେ ଘଟିଥିବା ଏକ ହତ୍ୟାକାଣ୍ଡର ସଂପର୍କ ଅଛି କି ନା, ତାହା ମଧ୍ୟ ଅସ୍ପଷ୍ଟ। ତେବେ ଘଟଣାଟି ଚର୍ଚ୍ଚା  ଲାଗି ରହିଛି।

ତେବେ ଗିରଫ ଅଭିଯୁକ୍ତମାନେ ହେଲେ  କୋଦଳାର ସନ୍ତୋଷ ଖଟେଇ, ମୁନାରାମ ଜେନା, ରାଜ ଗୋପାଳ ମହାପାତ୍ର, ଖଲ୍ଲିକୋଟର ଧୀରେନ୍ଦ୍ର ଦାସ ଓ ସନ୍ତୋଷ କୁମାର ରାଉତ | ଗିରଫ ପରେ ସେମାନଙ୍କଠୁ ୮ଟି ବନ୍ଧୁକ, ୧୨ଟି ଅଫୁଟା ଗୁଳି ଏବଂ ୨ଟି ଖଣ୍ଡା ଜବତ କରାଯାଇଛି। ଗତକାଲି ଖଲ୍ଲିକୋଟ ନିକଟ ସାନଘାଟିରୁ ୪ ଡକାୟତଙ୍କୁ ପୋଲିସ ଗିରଫ କରିଥିଲା। ଗଞ୍ଜାମ ଏସ୍‌ପିଙ୍କ ନିର୍ଦ୍ଦେଶକ୍ରମେ ଖଲ୍ଲିକୋଟ ଥାନା ଅଧିକାରୀଙ୍କ ନେତୃତ୍ବରେ ଏକ ଟିମ ଗଠନ ହୋଇଥିଲା। ପରବର୍ତ୍ତୀ ସମୟରେ ଏହି ଟିମ୍ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତମାନଙ୍କୁ ଗିରଫ କରିଥିଲା।  ପ୍ରେସମିଟ୍ କରି ଏ ସଂପର୍କରେ ଗଞ୍ଜାମ ଆଡସିନାଲ ଏସପି ଠାକୁର ପ୍ରସାଦ ପାତ୍ର ସୂଚନା ଦେଇଛନ୍ତି।