09-Sep-2024

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀରର ଜଣାଶୁଣା କବୟିତ୍ରୀ ନଳିନୀପ୍ରଭା ଶତପଥୀଙ୍କ ଦ୍ୱିତୀୟ କବିତା ସଂକଳନ ‘ଭକ୍ତି କୁସୁମ’ ଲୋକାର୍ପିତ  ହୋଇଯାଇଛି । କଟକର ଗାନ୍ଧି ପାଠାଗାର ଠାରେ ଗତ ୮ ତାରିଖ ଦିନ ତ୍ରୈମାସିକ ସାହିତ୍ୟ ପତ୍ରିକା 'ବୋଉ' ପକ୍ଷରୁ ଅନୁଷ୍ଠିତ ଏକ ସ୍ୱତନ୍ତ୍ର ଉତ୍ସବରେ ଶ୍ରୀମତୀ ଶତପଥୀଙ୍କ ଭକ୍ତି ରସାତ୍ମକ କବିତା ସଂକଳନ 'ଭକ୍ତି କୁସୁମ' ମୁଖ୍ୟ ଅତିଥିଙ୍କ କରକମଳରେ ଉନ୍ମିଚିତ ହୋଇଯାଇଛି । ଏହି ଉତ୍ସବରେ ମୁଖ୍ୟ ଅତିଥି ଭାବରେ ବିଶିଷ୍ଟ ସାରସ୍ୱତ ସାଧକ ଡ.ସୁରେନ୍ଦ୍ର ନାଥ ତ୍ରିପାଠୀ ଯୋଗ ଦେଇଥିବା ବେଳେ ମୁଖ୍ୟବକ୍ତା ଭାବେ ଦାର୍ଶନିକରତ୍ନ ପ୍ରଫେସର ନୀଳକଣ୍ଠ ରାଉତ ଯୋଗ ଦେଇଥିଲେ। ରାଷ୍ଟ୍ରପତି ପୁରସ୍କାରପ୍ରାପ୍ତ ସମାଜସେବୀ ପୂର୍ଣ୍ଣଚନ୍ଦ୍ର ବେହେରା ସମ୍ମାନିତ ଅତିଥି ଭାବେ ମଂଚାସୀନ ଥିଲେ । ବୋଉ ପତ୍ରିକାର ସଂପାଦକ ସଂଜୟ କୁମାର ଚୌଧୁରୀ ମଂଚାସୀନ ରହି ଭକ୍ତି କୁସୁମ ପତ୍ରିକାକୁ ଉନ୍ମୋଚନ କରିଥିଲେ । ଏହି ଅବସରରେ ସାହିତ୍ୟ ପତ୍ରିକା ବୋଉ ର ସ୍ୱତନ୍ତ୍ର ସଂଖ୍ୟାକୁ ଅତିଥି ମାନେ ଲୋକାର୍ପଣ କରିଥିଲେ । ଏହି ଉତ୍ସବରେ କଟକ ସମେତ ରାଜ୍ୟର ଅନ୍ୟାନ୍ୟ ଜିଲ୍ଲାରୁ ବହୁ କବି, ସାହିତ୍ୟିକ ଓ ସାହିତ୍ୟମନସ୍କ ବ୍ୟକ୍ତି ମାନେ ଯୋଗ ଦେଇଥିଲେ । ସୂଚନାଯୋଗ୍ୟ ଯେ, ବୋଉ ପତ୍ରିକାର ସହସଂପାଦକ ଦାୟିତ୍ୱ ତୁଲାଇ ଥିବା ବଲାଙ୍ଗୀର ଚନ୍ଦ୍ରଶେଖର ନାଗରର ନଳିନୀପ୍ରଭା ଶତପଥୀ ପିଲା ଟି ଦିନରୁ ସାହିତ୍ୟ ପ୍ରତି ଗଭୀର ରୂଚି ରଖି ଆସିଛନ୍ତି । କବିତା ଲେଖିବା, ଗୀତ ଗାଇବା ଓ ସମାଜର ଦୁଃଖୀଦରିଦ୍ର ଲୋକଙ୍କ ପାଇଁ ସେ ଜଣେ ଦରଦୀ ମହିଳା ଅଟନ୍ତି । ଲୋକାର୍ପିତ ହୋଇଥିବା ଭକ୍ତି କୁସୁମ ପତ୍ରିକାରେ କବୟିତ୍ରୀଙ୍କ କଲମମୂନରୁ ଭାସି ଆସିଥିବା ଜଗନ୍ନାଥଙ୍କ ଏକାଧିକ ମନଛୁଆଁ ଜଣାଣ ଓ ଭଜନ ପାଠକଙ୍କ ହୃଦୟରେ ଆଧ୍ୟାତ୍ମିକ ଭାବ ଜାଗ୍ରତ କରିବ ବୋଲି ଆଶା କରାଯାଉଛି ।