22-Jul-2021

ନୟାଗଡ଼ (ପ୍ରଦୀପ କୁମାର ପଣ୍ଡା): ନୟାଗଡ଼ ଜିଲ୍ଲା ଶ୍ରମ ବିଭାଗ କାର୍ଯ୍ୟକୁ ନେଇ ବିଭିନ୍ନ ଶ୍ରମିକ ସଂଗଠନ ପକ୍ଷରୁ ଅସନ୍ତୋଷ ପ୍ରକାଶ ପାଇବା ସହ ଆଜି ବିଭିନ୍ନ ସଂଗଠନ ପକ୍ଷରୁ ଶ୍ରମ ଅଧିକାରୀ ଏବଂ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି । ୧୦ ଦିନ ମଧ୍ୟରେ ଦାବି ପୁରଣ ନହେଲେ ଆସନ୍ତା ୨ ତାରିଖରୁ ଗଣଧାରଣା ପାଇଁ ଚେତାବନୀ ଦିଆଯାଇଛି । ଗତ ୧୩ ତାରିଖରେ ଶ୍ରମ ବିଭାଗ ଏବଂ ସଂଗଠନ ମଧ୍ୟରେ ହୋଇଥିବା ଦ୍ୱିପାକ୍ଷିକ ଆଲୋଚନାକୁ କାର୍ଯ୍ୟକାରୀ କରାନଯିବାକୁ ନେଇ ଅସନ୍ତୋଷ ସୃଷ୍ଟି ହୋଇଛି । ୪ ବର୍ଷ ହେବ ପରିଚୟ ପତ୍ର ପାଇଁ ଦରଖାସ୍ତ କରିଥିବା ଶ୍ରମିକମାନଙ୍କୁ ତୁରନ୍ତ ଶ୍ରମିକ ପରିଚୟ ପତ୍ର ପ୍ରଦାନ କରିବା ପାଇଁ ଦାବି ହୋଇଥିଲା । ଏଥିସହିତ ୨0୧୭ ମସିହାରୁ ବିବାହ, ଶିକ୍ଷା, ମୃତ୍ୟୁ ସହାୟତା ପାଇଁ ପଡ଼ି ରହିଥିବା ଆବେଦନକୁ ତଦନ୍ତ କରି ସହୟତା ପ୍ରଦାନ ପାଇଁ ଆଲୋଚନାରେ ନିଷ୍ପତ୍ତି ହୋଇଥିଲା । ସଂଗଠନ ପ୍ରତି ଶ୍ରମ ଅଧିକାରୀ ହେୟଜ୍ଞାନ ମନେ କରୁଥିବା ଅଭିଯୋଗ ହୋଇଛି । ଯାହାକୁ ନେଇ ଆଜି ବିଜୁ ଶ୍ରମିକ ସାମ୍ମୁଖ୍ୟ ରାଜ୍ୟ ସହ ସମ୍ପାଦକ ଶ୍ରୀକାନ୍ତ ପଟ୍ଟନାୟକଙ୍କ ନେତୃତ୍ୱରେ ୧୨ଟି ସଂଗଠନର କର୍ମକର୍ତ୍ତା ବାସୁଦେବ ମହାନ୍ତି, ପ୍ରମୋଦ ମହାରଣା, ପ୍ରକାଶ ଚନ୍ଦ୍ର ମହାନ୍ତି, ରମେଶ ଚନ୍ଦ୍ର ପଣ୍ଡା, ମନୋଜ କୁମାର ନାୟକ, ବିନୋଦ କୁମାର ସ୍ୱାଇଁ, ହରିହର ଦଳବେହେରା ପ୍ରମୂକ ଆଜି ଜିଲ୍ଲା ଶ୍ରମ ଅଧିକାରୀଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି।