-+91-9937148622 |
prerana_bgr@rediffmail.com |
Tuesday 17th November 2026 |
R.N.I. Regd No. ODIODI/2010/46693
Breaking News
16-Nov-2026
ଭୁବନେଶ୍ୱର (ମୁରଲୀଧର ମିଶ୍ର ): ଓଡ଼ିଶାର କୃଷି ଯାନ୍ତ୍ରିକୀକରଣ, ବୈଷୟିକ ଶିକ୍ଷା ଓ ଗବେଷଣା କ୍ଷେତ୍ରରେ ଏକ ଅଗ୍ରଣୀ ପ୍ରତିଷ୍ଠାନ ଭାବେ କଲେଜ ଅଫ୍ ଏଗ୍ରିକଲଚରାଲ୍ ଇଞ୍ଜିନିୟରିଂ ଆଣ୍ଡ ଟେକ୍ନୋଲୋଜି (CAET), ଓୟୁଏଟି, ଭୁବନେଶ୍ୱର ୧୯୬୬ ମସିହାରେ ପ୍ରତିଷ୍ଠିତ ହୋଇଥିଲା। ଏହି ମହାବିଦ୍ୟାଳୟ ତାହାର ୬୦ ବର୍ଷର ଗୌରବମୟ ଯାତ୍ରା ପୂରଣ କରି ୧୫ ନଭେମ୍ବର ୨୦୨୬ରେ ହୀରକ ଜୟନ୍ତୀ (୧୯୬୬–୨୦୨୬) ମହାସମାରୋହରେ ପାଳନ କରିଛି। ଏହି ଉଦ୍ଘାଟନୀ ସମାରୋହରେ ଓଡ଼ିଶାର ମାନ୍ୟବର ଉପମୁଖ୍ୟମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହଦେଓ, କୃଷି ଓ କୃଷକ ସଶକ୍ତିକରଣ ବିଭାଗର ଆୟୁକ୍ତ-ତଥା-ଶାସନ ସଚିବ ଶ୍ରୀ ସଚିନ ରାମଚନ୍ଦ୍ର ଯାଦବ, ଆଇ.ଏ.ଏସ୍., ଓୟୁଏଟିର ମାନ୍ୟବର କୁଳପତି ପ୍ରଫେସର (ଡଃ) ପ୍ରଭାତ କୁମାର ରାଉଳ ଏବଂ ଅତିଥି ସମ୍ମାନିତ ଭାବେ CAET ଆଲୁମ୍ନି ଆସୋସିଏସନ୍ର ସଭାପତି ଇଞ୍ଜିନିୟର ପି. କେ. ମହାପାତ୍ର ଯୋଗଦାନ କରିଥିଲେ। ଏହି ଅବସରରେ ଡିନ୍ CAET ପ୍ରଫେସର ଅମ୍ବିକା ପ୍ରସାଦ ସାହୁ ଅତିଥିମାନଙ୍କୁ ସ୍ୱାଗତ କରିବା ସହ ମହାବିଦ୍ୟାଳୟର ଷାଠିଏ ବର୍ଷର ଯାତ୍ରା, ମାନବ ସମ୍ବଳ ବିକାଶ ଏବଂ ଗବେଷଣା ଓ ପ୍ରଯୁକ୍ତିବିଦ୍ୟା କ୍ଷେତ୍ରରେ ଏହାର ଅବଦାନ ବିଷୟରେ ଆଲୋକପାତ କରିଥିଲେ। CAETରୁ ଶିକ୍ଷାଲାଭ କରିଥିବା ଅନେକ କୃଷି ଇଞ୍ଜିନିୟର, ବୈଜ୍ଞାନିକ ଓ ବୈଷୟିକ ବିଶେଷଜ୍ଞ ଦେଶବିଦେଶରେ ଅବଦାନ ରଖୁଥିବା ସହ ଏହି ମହାବିଦ୍ୟାଳୟରେ ବିକଶିତ କୃଷି ଯନ୍ତ୍ରପାତି, ଜଳ ଓ ମୃତ୍ତିକା ସଂରକ୍ଷଣ ପ୍ରଯୁକ୍ତି ଏବଂ ପ୍ରକ୍ରିୟାକରଣ କୌଶଳ ଓଡ଼ିଶାର କୃଷକ ସମାଜ ଦ୍ୱାରା ବ୍ୟବହୃତ ହୋଇ ଉପକୃତ କରୁଥିବା ସେ ଉଲ୍ଲେଖ କରିଥିଲେ।
ଏହି ଅବସରରେ ଅତିଥିମାନେ ମହାବିଦ୍ୟାଳୟ ପରିସରରେ ନିର୍ମିତ ହୀରକ ଜୟନ୍ତୀ ସ୍ମାରକୀ ଉଦ୍ଘାଟନ କରିବା ସହ କୃଷି ଇଞ୍ଜିନିୟରିଂର ନୂତନ ଉଦ୍ଭାବନ ଓ ଜ୍ଞାନକୌଶଳ ଆଧାରିତ ଟେକ୍ନୋଲୋଜି ପ୍ରଦର୍ଶନୀ ଉଦ୍ଘାଟନ ଏବଂ ସ୍ୱତନ୍ତ୍ର ସ୍ମରଣିକା 'Confluence' ଉନ୍ମୋଚନ କରିଥିଲେ। ଏହି ଉତ୍ସବରେ ୧୦୦୦ରୁ ଊର୍ଦ୍ଧ୍ୱ ପୁରାତନ ଛାତ୍ରଛାତ୍ରୀ, ବର୍ତ୍ତମାନର ଛାତ୍ରଛାତ୍ରୀ, ଅଧ୍ୟାପକ, ବୈଜ୍ଞାନିକ, ଶିକ୍ଷାବିତ୍ ଓ ଶିଳ୍ପ ପ୍ରତିନିଧି ଯୋଗଦେଇଥିଲେ। ଦିନବ୍ୟାପୀ କାର୍ଯ୍ୟକ୍ରମରେ ହୀରକ ଜୟନ୍ତୀ ସେମିନାର, ଛାତ୍ରଛାତ୍ରୀ-ଆଲୁମ୍ନି ଭାବ ବିନିମୟ କାର୍ଯ୍ୟକ୍ରମ ଏବଂ ସନ୍ଧ୍ୟାରେ ଛାତ୍ରଛାତ୍ରୀଙ୍କ ଦ୍ୱାରା ସାଂସ୍କୃତିକ ପରିବେଷଣ ଆୟୋଜିତ ହୋଇଥିଲା।ଉତ୍ସବରେ କୃଷି ଯାନ୍ତ୍ରିକୀକରଣର ବିକାଶ, କ୍ଷୁଦ୍ର ଓ ନାମମାତ୍ର ଚାଷୀଙ୍କ ପାଇଁ ସୁଲଭ କୃଷି ଯନ୍ତ୍ରପାତି, ମହିଳା-ଅନୁକୂଳ ଉପକରଣ, ଡ୍ରୋନ୍ ପ୍ରଯୁକ୍ତି, କୃତ୍ରିମ ବୁଦ୍ଧିମତ୍ତା (AI), IoT ଓ ସେନ୍ସର୍ ଆଧାରିତ କୃଷିର
ପ୍ରସାର ଉପରେ ଆଲୋଚନା ହୋଇଥିଲା। ଆଗାମୀ ଦିନରେ CAET କୃଷି ଯାନ୍ତ୍ରିକୀକରଣ, ମୃତ୍ତିକା ଓ ଜଳ ସଂରକ୍ଷଣ, ଜଳସେଚନ ଓ ନିଷ୍କାସନ, ଅକ୍ଷୟ ଶକ୍ତି, ଅମଳ ପରବର୍ତ୍ତୀ ପ୍ରକ୍ରିୟାକରଣ, ସ୍ମାର୍ଟ ଓ ଡିଜିଟାଲ୍ କୃଷି କ୍ଷେତ୍ରରେ ଗବେଷଣା ଓ ନବସୃଜନକୁ ଅଧିକ ଗତିଶୀଳ କରି ଓଡ଼ିଶାର କୃଷକ ସମାଜର ଉନ୍ନତିରେ ଅଗ୍ରଣୀ ଭୂମିକା ଗ୍ରହଣ କରିବାର ସଂକଳ୍ପ ନେଇଛି।
କାର୍ଯ୍ୟକ୍ରମର ଶେଷ ଭାଗରେ CAET ଆଲୁମ୍ନି ଆସୋସିଏସନ୍ର ସଭାପତି ଇଞ୍ଜିନିୟର ପି. କେ. ମହାପାତ୍ର କୃଷି ଇଞ୍ଜିନିୟରିଂ କ୍ୟାଡର୍ର ପୁନର୍ଗଠନ (Agricultural Engineering Cadre Restructuring) ଏବଂ କୃଷି, ଉଦ୍ୟାନକୃଷି, ମୃତ୍ତିକା ସଂରକ୍ଷଣ ଓ ଜଳବିଭାଜିକା ଉନ୍ନୟନ ବିଭାଗରେ ପ୍ରତ୍ୟେକ ବ୍ଲକ୍ ସ୍ତରରେ କୃଷି ଇଞ୍ଜିନିୟରଙ୍କ ନିଯୁକ୍ତି ଓ ପଦସ୍ଥାପନ ନିମନ୍ତେ ଦାବି ଉପସ୍ଥାପନ କରିଥିଲେ। ଏହାଦ୍ୱାରା କୃଷି ଯାନ୍ତ୍ରିକୀକରଣ ଯୋଜନାର ସଫଳ କାର୍ଯ୍ୟାନ୍ୱୟନ, ଆଧୁନିକ କୃଷି ଯନ୍ତ୍ରପାତିର ପ୍ରସାର, ଜଳ ଓ ମୃତ୍ତିକା ସମ୍ପଦର ସୁପରିଚାଳନା ଏବଂ ତୃଣମୂଳ ସ୍ତରରେ କୃଷକଙ୍କୁ ବୈଷୟିକ ସହାୟତା ପ୍ରଦାନ ଅଧିକ ସୁଗମ ହୋଇପାରିବ ବୋଲି ସେ ମତବ୍ୟକ୍ତ କରିଥିଲେ।