-+91-9937148622 |
prerana_bgr@rediffmail.com |
Monday 16th November 2026 |
R.N.I. Regd No. ODIODI/2010/46693
Breaking News
12-Nov-2026
ବଲାଙ୍ଗୀର, (ପ୍ରେରଣା ଖବର) ୧୨ତମ ଭୀମପାହାଡ଼ ମହୋତ୍ସବର ଦ୍ୱିତୀୟ ରଜନୀ ଜନସମାଗମ, ଉତ୍ସାହ ଓ ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମରେ ବେଶ୍ ଉତ୍ସବମୁଖର ହୋଇଉଠିଥିଲା। ଏହି ଅବସରରେ ‘ଉଦିଆଁ ଜହ୍ନ’ ସାଂସ୍କୃତିକ ଅନୁଷ୍ଠାନର କଳାକାରମାନଙ୍କ ଚିତ୍ତାକର୍ଷକ ପରିବେଷଣ ଦର୍ଶକମାନଙ୍କ ମନ ମୋହିଥିଲା l ମହୋତ୍ସବର ଅନ୍ୟତମ ଆକର୍ଷଣ କଂସ ଦରବାର ସହିତ ‘ଉଦିଆଁ ଜହ୍ନ’ର ସାଂସ୍କୃତିକ ପରିବେଷଣ ସମଗ୍ର ପରିବେଶକୁ ରଙ୍ଗିନ କରିଦେଇଥିଲା। ବିଶେଷକରି ରସରକେଲି, ମାଏଲା ଜଡ଼ ଓ ଡାଲଖାଇ ଭଳି ପାରମ୍ପରିକ ସମ୍ବଲପୁରୀ ଲୋକଗୀତର ତାଳେ ତାଳେ କଳାକାରମାନଙ୍କ ଆକର୍ଷଣୀୟ ନୃତ୍ୟ ଓ ସଙ୍ଗୀତ ପରିବେଷଣ ଦର୍ଶକଙ୍କୁ ବିମୋହିତ କରିଥିଲା। ଦର୍ଶକମାନେ ମଧ୍ୟ ଏହି ଲୋକକଳାର ମନମତାଣିଆ ସୁର ଓ ତାଳରେ ଝୁମି ଉଠିଥିଲେ। ଏହା କେବଳ ଏକ ସାଂସ୍କୃତିକ ପରିବେଷଣ ନଥିଲା, ବରଂ ପଶ୍ଚିମ ଓଡ଼ିଶାର ସମୃଦ୍ଧ ଲୋକସଂସ୍କୃତି ଓ ପରମ୍ପରାର ଏକ ସୁନ୍ଦର ଝଲକ ଥିଲା l ଏହି ଅବସରରେ ଅନୁଷ୍ଠାନର ପ୍ରତିଷ୍ଠାତା ଶ୍ରୀ ଶାନ୍ତନୁ କୁମାର ବାରିକ ମୁଖ୍ୟ ଅତିଥିଙ୍କ ଠାରୁ ପୁଷ୍ପଗୁଚ୍ଛ, ଟ୍ରଫି ଓ ପ୍ରମାଣପତ୍ର ଗ୍ରହଣ କରିଥିଲେ। ଅନ୍ୟ କଳାକାର ମାନଙ୍କ ମଧ୍ୟରେ ଶାନ୍ତନୁ କୁମାର ବାରିକ, ମନୋରଞ୍ଜନ ପଟେଲ, ପ୍ରଦୀପ ବାରିକ, କୁନୁ ସୁନା, ରଘୁନାଥ ସାହୁ, ପୁରୁଷୋତ୍ତମ, କ୍ଷମାନିଧି, ଶ୍ରୀକାନ୍ତ, ବିନୋଦ, ବିକାଶ, ପ୍ରଦୀପ, ସୁମନ୍ତ, ଅସୀମା, ଏନିମା, ଅପର୍ଣ୍ଣା, ରୋଶନୀ, ସ୍ତୁତି, ନିତୁ, ଶ୍ରୁତି ପ୍ରମୁଖ ନିଜର କଳା ପରିବେଷଣ କରିଥିଲେ l ନିଜ ପ୍ରତିକ୍ରିୟାରେ ସେ କହିଥିଲେ, “ଉଦିଆଁ ଜହ୍ନ ସାଂସ୍କୃତିକ ଅନୁଷ୍ଠାନକୁ ଏତେ ବଡ଼ ମଞ୍ଚରେ ନିଜର କଳା ଓ ସଂସ୍କୃତି ପରିବେଷଣ କରିବାର ସୁଯୋଗ ଦେଇଥିବାରୁ ଭୀମପାହାଡ଼ ମହୋତ୍ସବର ସମସ୍ତ କର୍ମକର୍ତ୍ତାଙ୍କୁ ଅଶେଷ ଅଶେଷ ସହୃଦୟ ଧନ୍ୟବାଦ ଜଣାଉଛି l ଏହି ସଫଳ ପରିବେଷଣ ‘ଉଦିଆଁ ଜହ୍ନ’ର କଳାକାରମାନଙ୍କ ପାଇଁ ଏକ ଅବିସ୍ମରଣୀୟ ଅନୁଭୂତି ହୋଇ ରହିବା ସହିତ ସମ୍ବଲପୁରୀ ଲୋକକଳାର ପ୍ରଚାର ଓ ପ୍ରସାର ଦିଗରେ ଏକ ସୁନ୍ଦର ପ୍ରୟାସ ହୋଇପାରିଛି l