08-May-2026

କଟକ(ତପନ ମହାନ୍ତି): ଚାଉଳିଆଗଞ୍ଜ ସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସା ଅବହେଳାରୁ ରୋଗୀ ମୃତ୍ୟୁକୁ ନେଇ ଉତ୍ତେଜନା ଦେଖାଦେଇଛି। ଏ ନେଇ ଶତାଧିକ ଲୋକ ହସ୍ପିଟାଲ ଆଗରେ ଧାରଣା ଦେଇଛନ୍ତି। ଚାଉଳିଆଗଞ୍ଜ ଥାନାରେ ମୃତକଙ୍କ ପୁଅ ଏ ନେଇ ଏତଲା ଦେଇଛନ୍ତି। ସୂଚନା ଅନୁସାରେ, କଟକ ମହାନଗର ନିଗମ ଅନ୍ତର୍ଗତ ୱାର୍ଡ ନଂ ୫୫ ଭଦିମୂଳର ପର୍ଶୁରାମ ଭୋଇଙ୍କ ପରିବାର ଲୋକେ ଗତମାସ ୯ ତାରିଖରେ ଉକ୍ତ 

ହସ୍‌ପିଟାଲ୍‌ରେ ଭର୍ତି କରାଇଥିଲେ। ତାଙ୍କୁ ଆଇସିୟୁରେ ରଖାଯାଇଥିଲା। ପରିବାର ଲୋକେ ଅଭିଯୋଗ କରିଛନ୍ତି ଯେ, ପ୍ରଥମେ ସେମାନଙ୍କୁ ଦେଢ ଲକ୍ଷ ଟଙ୍କା ଦେବାକୁ କୁହାଯାଇ ଥିଲା। ପରେ ଆୟୁଷ୍ମାନ କାର୍ଡରେ ତାଙ୍କର ଚିକିତ୍ସା କରାଯାଇ ଥିଲା। ଗତକାଲି ଆୟୁଷ୍ମାନ୍ କାର୍ଡରୁ ଟଙ୍କା ସରିଗଲା ବୋଲି ହସ୍‌ପିଟାଲ୍ କର୍ତ୍ତୃପକ୍ଷ ସେମାନଙ୍କୁ କହିବା ସହ ଅନ୍ୟତ୍ର ସ୍ଥାନାନ୍ତର କରିବାକୁ କୁହାଯାଇଥିଲା। ତେବେ ଗତକାଲି ଅପରାହ୍ନରେ ରୋଗୀଙ୍କ ମୃତ୍ୟୁ ଘଟିଛି ବୋଲି ସେମାନଙ୍କୁ ସୂଚନା ଦିଆଯାଇ ଥିଲା। ଏହାକୁ ନେଇ ପ୍ରବଳ ଉତ୍ତେଜନା ପ୍ରକାଶ ପାଇଥିଲା । ୫୫ ନଂ ୱାର୍ଡ କର୍ପୋରେଟର ବିଶ୍ଵବନ୍ଦିତା ପଣ୍ଡା ଓ ଭଦିମୂଳ ଗ୍ରାମବାସୀ ଘଟଣାସ୍ଥଳରେ ପହଞ୍ଚି ଧାରଣାରେ ବସିଥିଲେ।

ପୂର୍ବରୁ ମଧ୍ୟ ଉକ୍ତ ହସ୍‌ପିଟାଲ ନାମରେ ରୋଗୀ ମୃତ୍ୟୁକୁ ନେଇ ଅଭିଯୋଗ ରହିଛି। ଖବରପାଇ ୫ ନଂ ଜୋନ୍ ଏସିପି ସୁଧାଂଶୁ ମୋହନ ଜେନା, ଚାଉଳିଆଗଞ୍ଜ ଥାନା ଅଧିକାରୀ ବିଉଟି ମହାନ୍ତି ଓ ଥାନା କର୍ମଚାରୀମାନେ ପହଞ୍ଚି ବୁଝାମୁଝା କରିବାରୁ ଲୋକେ ଧାରଣାରୁ ଉଠିଥିଲେ। ଅନ୍ୟପଟେ ମୃତକଙ୍କ ପରିବାର ପକ୍ଷରୁ ଏତଲା ଭିତ୍ତରେ ମାଲିକଙ୍କ ନାମରେ ମାମଲା ରୁଜୁ ହୋଇଛି। ଏହି ନର୍ସିଂହୋମ ନାଁରେ ବାରମ୍ବାର ଅଭିଯୋଗ ହୁଉଥିଲେ ହେଁ କାର୍ଯ୍ୟାନୁଷ୍ଠାନ ଶୂନ।