22-Apr-2026

ବଲାଙ୍ଗୀର/ସୁନ୍ଦରଗଡ଼(ପ୍ରେରଣା ଖବର): ନକଲି ଫେସବୁକ୍ ଆକାଉଣ୍ଟ ଖୋଲି ମହିଳାଙ୍କ ସହ ସଂପର୍କ ଯୋଡିଲେ । ବିଶ୍ୱାସ ଜିଣିବା ପରେ ମହିଳାଙ୍କ ପୁଅଝିଅଙ୍କୁ ବାଣିଜ୍ୟ ବିଭାଗରେ ଚାକିରି କରାଇ ଦେବାକୁ କହି ନେଇଗଲେ ୧୫ଲକ୍ଷ ଟଙ୍କା। ଦିନ ଗଡିବା ପରେ ଧରାଛୁଆଁ ଦେଲେନି। ଓଲଟା ଅଶ୍ଲୀଳ ଭାଷାରେ ଗାଳିଗୁଳଜ କଲେ । ଏଭଳି ଏକ ସାଇବର ଠକେଇ ଘଟଣା ସୁନ୍ଦରଗଡ଼ ଜିଲ୍ଲା ଭଷ୍ମା ଥାନା ଅଂଚଳରୁ ଆସିଛି। ସଂପୃକ୍ତ ମହିଳାଙ୍କ ଅଭିଯୋଗ ଆଧାରରେ  ପୋଲିସ ଏକ ମାମଲା ରୁଜୁ କରି ସାଇବର ଠକକୁ ଗିରଫ୍ କରିଛି।  ଅଭିଯୁକ୍ତ ହେଲା ବଲାଙ୍ଗୀର ପେଲେସ ଲାଇନ୍ ରେ ଭଡାରେ ରହୁଥିବା ବରଗଡ଼ ଜିଲ୍ଲା ଗାଇସିଲେଟ ଥାନା କନ୍ଦାଗାଡର ସରୋଜ କୁମାର @ ସରୋଜ କୁମ୍ଭାର(୩୨) । ଗତ ୧୭ ତାରିଖ ଦିନ ବଲାଙ୍ଗୀର ଭାଗିରଥୀ ଛକରୁ ସରୋଜକୁ ଗିରଫ କରିଛି ପୋଲିସ । ତା ପାଖରୁ ଏକ ହୁଣ୍ଡାଇ କାର, ୮ଟି ମୋବାଇଲ, ସାମସଙ୍ଗ ଟାବଲେଟ, ବିଭିନ୍ନ ବ୍ୟାଙ୍କର ୭ଟି ପାସ୍‌ବୁକ୍ , ୫ଟି ଏଟିଏମ୍‌, ଚେକ୍ ବହି ଆଦି ଜବତ ହୋଇଛି। ଭଷ୍ମା ଥାନାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଉପଖଣ୍ଡ ପୋଲିସ ଅଧିକାରୀ ନିର୍ମଳ ମହାପାତ୍ର ଏହି ମାମଲାର ବିସ୍ତୃତ ସୂଚନା ଦେଇଛନ୍ତି। ଏହାପୂର୍ବରୁ ସରୋଜ ଠକାମୀ କରି କିଛି ବର୍ଷ ଧରି ଲୋଇସିଂହା କଲେଜରେ ଅଧ୍ୟାପକ ଭାବରେ କାମ ମଧ୍ୟ କରୁଥିଲା । ସରୋଜର ଆଚରଣ, ଛାତ୍ରଛାତ୍ରୀଙ୍କ ଅଭିଯୋଗ ଓ  ପାଠପଢ଼ା ଶୈଳୀ ପ୍ରତି ସନ୍ଦେହ ହେବା ପରେ କଲେଜ ଷ୍ଟାଫ୍ ତାକୁ ଚିକରିରୁ ବିଦା କରି ଦେଇଥିଲେ। ଏପରିକି ଜମି କିଣାବିକାରେ ସରୋଜ ଠକାମୀ କରି କୋଟି କୋଟି ଟଙ୍କା ଲୋକଙ୍କ ଠାରୁ ଠିକଥିବା ଅଭିଯୋଗ ହୋଇଛି।
    ସରୋଜଙ୍କ ଠକେଇର ଶୀକାର ହୋଇଥିବା ମହିଳା ଜଣକ ହେଲେ ଭଷ୍ମା ଥାନା ଭାଲୁଗାଡର ରଂଜିତା କାଲୋ । ସରୋଜ କୁମାର ନାମକ ଜଣେ ଯୁବକ ରିତେଶ ତ୍ରିପାଠୀ ନାମରେ ଏକ ନକଲି ଫେସ୍‌ବୁକ୍ ଆଇଡି ଖୋଲି ୧୯.୧୧.୨ଠ୨୪ରେ ଉକ୍ତ ମହିଳାଙ୍କ ସହ ସଂପର୍କ ରଖିଥିଲା। କିଛି ମାସ ପରେ ବାଣିଜ୍ୟ ବିଭାଗରେ ପୁଅଝିଅଙ୍କୁ ଚାକିରୀ କରାଇ ଦେବାକୁ କହିଥିଲେ। ଏହାପରେ ଯୁବକ ଜଣକ ମହିଳାଙ୍କୁ ୧୫ଲକ୍ଷ ଟଙ୍କା ଦାବି କରି ଥିଲେ। ମହିଳା ଜଣକ ତାଙ୍କ ଫୋନ୍ ପେ ରେ ୧୨.୪୫ଲକ୍ଷ ଟଙ୍କା, ବ୍ୟାଙ୍କ ମାଧ୍ୟମରେ ୫୫ହଜାର ଟଙ୍କା ଓ ନଗଦ ଭାବରେ ୨ଲକ୍ଷ ଟଙ୍କା ଦେଇଥିଲେ। କିଛି ଦିନ ପରେ ଅଭିଯୁକ୍ତ ଜଣକ ପୁଣି ୧ଠଲକ୍ଷ ଟଙ୍କା ଦାବି କରିଥିଲେ। ମହିଳା ସନ୍ଦେହ କରି ଚାକିରି ବିଷୟରେ ପଚାରିବା ପରେ ସେ ଅଭଦ୍ର ଭାଷାରେ ଧମକ ଦେବା ସହ ଟଙ୍କା ଫେରାଇବାକୁ ମନା କରିଥିଲେ। ଶେଷରେ ମହିଳା ଜଣକ ଠକାମୀରେ ପଡିଥିବା ଜାଣି ତା.୨୭.ଠ୮.୨ଠ୨୫ରେ   ଭଷ୍ମା ଥାନାରେ ମହାଠକ ସରୋଜ ଙ୍କ ନାମରେ ଏତଲା ଦେଇଥିଲେ । ତତ୍କାଳୀନ ଥାନା ଅଧିକାରୀ ସୁଶାନ୍ତ ପରିଡା ଭାରତୀୟ ନ୍ୟାୟ ସଂହିତା ଧାରା ୩୧୯(୨), ୩୧୫(୪) ଓ ୨୯୭ରେ ମାମଲା ରୁଜୁ କରିଥିଲେ। ଅଭିଯୁକ୍ତକୁ ପୋଲିସ ୧୭ ତାରିଖରେ ବଲାଙ୍ଗୀରରୁ ଗିରଫ୍ କରି ଶୁକ୍ରବାର କୋର୍ଟ ଚାଲାଣ କରିଛି।  ସରୋଜ ଜଣେ  ପ୍ରଫେସନାଲ ଠକ ଓ ବିଭିନ୍ନ ସମୟରେ ସେ ପରିସ୍ଥିତି ଦେଖି ନିଜକୁ ବିଭିନ୍ନ ପ୍ରକାର ପରିଚୟ ଦେଇ ନିରୀହ ଲୋକଙ୍କ ଠାରୁ ଟଙ୍କା ଠକାମୀ କରିଥାଏ ବୋଲି ତାର ଗାଁ କନ୍ଦାଗାଡ଼ର କିଛି ଲୋକ କହିଛନ୍ତି।