18-Mar-2026

(ରାମନାଥ ପଣ୍ଡା )
ନୂଆପଡ଼ା ଜିଲ୍ଲାପାଳଙ୍କ ଅଧ୍ୟକ୍ଷତାରେ ଖଡ଼ିଆଳ ବ୍ଲକ କେନ୍ଦୁପାଟି ପଞ୍ଚାୟତରେ ଝିଅ ପାଇଁ ଗଛଟିଏ ଓ ଗର୍ଭସ୍ଥ ଶିଶୁ ପାଇଁ ଦିନଟିଏ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।ଜିଲ୍ଲାପାଳଙ୍କ ସହିତ ଜିଲ୍ଲା ସ୍ତରୀୟ ସମସ୍ତ ଅଧିକାରୀ,ସରପଂଚ ଚନ୍ଦ୍ର ଷଣ୍ଢ,ବ୍ଲକ ଅଧ୍ୟକ୍ଷା ପୁଷ୍ପାଞ୍ଜଳି ନନ୍ଦ,ବି ଡି ଓ ମିଳନ କୁମାର ଝାଙ୍କର, ତହସିଲଦାର ନରସିଂହ ଗଦବା,ଡି ଏସ ଡବ୍ଲୁ ଓ ଏସ ଗୀତା,ସି ଡି ପି ଓ ଲତା ଦିଗଲ, ଅତିରିକ୍ତ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ରମାକାନ୍ତ ବିଶ୍ୱାସ,ମହିଳା ପରି ଦର୍ଶିକା ବୈଜୟନ୍ତୀ ମହାନ୍ତି ପ୍ରମୁଖ ଉପସ୍ଥିତ ଥିଲେ ।ଜିଲ୍ଲାପାଳ ମଧୁସୂଦନ ଦାସ ନବ ଜାତକ ଶିଶୁ କନ୍ୟା ପୂଜା ପୋଢ଼ଙ୍କୁ କୋଳରେ ଧରି ତଥା ଦୋଳିରେ ଝୁଲାଇ  ତାହାର ଉଜ୍ଜଳ ଭବିଷ୍ୟତ କାମନା କରିଥିଲେ ।ଶିଶୁର ପିତା ମାତାଙ୍କୁ ଉପହାର ସହିତ ନୂତନ ବୃକ୍ଷ ଚାରା ପ୍ରଦାନ କରିଥିଲେ ଏବଂ ଗର୍ଭସ୍ଥ ଶିଶୁ ପାଇଁ ଦିନଟିଏ କାର୍ଯ୍ୟକ୍ରମରେ ପ୍ରସୂତି ମାଆ ଡାଳିମ୍ବ ବାଗ ଏବଂ ଅନ୍ୟ ତିନି ଗର୍ଭବତୀ ମହିଳା କୁମୁଦିନୀ ନିଆଲ,ଦିବ୍ୟା ବତି ପହରିଆ ଓ ଚନ୍ଦ୍ରିକା କେତକୀଙ୍କୁ ଫଳମୂଳ,ପନିପରିବା,ପୁଷ୍ଟିକର ଖାଦ୍ୟ ସହିତ ବିଭିନ୍ନ ଉପହାର ଅତିଥିମାନେ ପ୍ରଦାନ କରିଥିଲେ।ଜିଲ୍ଲାପାଳ ସମସ୍ତଙ୍କୁ ଉଦବୋଧନ ଦେଇ କହିଲେ ଯେ ଆମ ପାଇଁ ମାଆ ହେଉଛନ୍ତି ବଡ଼,ଝିଅ ଆମ ପାଇଁ ସବୁକିଛି ।ଆମ ସମସ୍ତଙ୍କ କର୍ତ୍ତବ୍ୟ ହେଉଛି ଗର୍ଭସ୍ଥ ଶିଶୁର ଯତ୍ନ ନେବା ।ପରିବେଶ ପ୍ରତି ଦୃଷ୍ଟି ଦେବା ।ଝିଅ ହେଉଛନ୍ତି ଦୁହିତା,ଦୁଇ କୁଳର ହିତ ସାଧନ କରନ୍ତି ।ପ୍ରତ୍ୟେକ ମାଆ ବାପା ଝିଅର ଯତ୍ନ ନେବା ସହିତ ସମସ୍ତେ ବୃକ୍ଷର ମଧ୍ୟ ଯତ୍ନ ନେବା ଅତି ଜରୁରୀ ।ଝିଅ ଆଉ ଗଛ ଆମ ପାଇଁ ସଂସ୍କୃତି ଓ ସଂସ୍କାର ସହିତ ସମାନ ।ପୁଣି କହିଲେ କି ସରକାରଙ୍କ ପକ୍ଷରୁ ଆପଣ ମାନଙ୍କ ପାଇଁ ବହୁ କର୍ମ ନିଯୁକ୍ତି ଯୋଜନା ଅଛି,ପ୍ରବାସୀ ଶ୍ରମିକ ଭାବରେ ଅନ୍ୟତ୍ର ନ ଯାଇ ନିଜ ଗାଁରେ ରହି କାମ କରନ୍ତୁ,ଛୋଟ ପିଲାଙ୍କୁ ଶିଶୁ ଶ୍ରମିକ ରୂପେ ନିୟୋଜିତ ନ କରି ବିଦ୍ୟାଳୟକୁ ପଠାଇବାକୁ ଅନୁରୋଧ କରିଥିଲେ ,ନିଜ ଗାଁକୁ ଏକକ ବ୍ୟବହୃତ ପ୍ଲାଷ୍ଟିକ ମୁକ୍ତ ରଖିବାକୁ ଆହ୍ଵାନ ଦେଇଥିଲେ ।ଆଜିର ଏହି ଝିଅ ପାଇଁ ଗଛଟିଏ,ଗର୍ଭସ୍ଥ ଶିଶୁ ପାଇଁ ଦିନଟିଏ,ପ୍ରବାସୀ ଶ୍ରମିକ ସଚେତନତା ଶିବିର, ପକ୍ଷୀ ପାଇଁ ଦିନଟିଏ କାର୍ଯ୍ୟକ୍ରମର ସମସ୍ତ ପ୍ରକାର ଆୟୋଜନରେ ପଞ୍ଚାୟତ ନିର୍ବାହୀ ଅଧିକାରୀ କ୍ଷିରୋଦ୍ର ମେହେର, ଏ ଡି ଇ ଓ ସନ୍ଦୀପ ପାଣିଗ୍ରାହୀ,ମହିଳା ପରି ଦର୍ଶିକା ବୈଜୟନ୍ତୀ ମହାନ୍ତି ଓ ଅଙ୍ଗନୱାଡ଼ି କର୍ମୀ ସହଯୋଗ କରିଥିଲେ।