16-Jun-2025

ବଲାଙ୍ଗିର(ପ୍ରେରଣା ଖବର): ବଲାଙ୍ଗିର ବିଧାୟକ ତଥା ବିଜେଡିର ବରିଷ୍ଠ ନେତା କଳିକେଶ ନାରାୟଣ ସିଂହଦେଓ ମୁଖ୍ୟମନ୍ତ୍ରୀ ମୋହନ ଚରଣ ମାଝିଙ୍କ ବଲାଙ୍ଗିର ଗସ୍ତକୁ ନେଇ ତୀବ୍ର ପ୍ରତିକ୍ରିୟା ବ୍ୟକ୍ତ କରିଛନ୍ତି। ସେ ଏକ ଖୋଲା ଚିଠି ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ସୂଚିତ କରିଛନ୍ତି ଯେ, ନିଜ ନିର୍ବାଚିତ ମଣ୍ଡଳୀକୁ ମୁଖ୍ୟମନ୍ତ୍ରୀଙ୍କ ସରକାରି ଗସ୍ତ ହୋଇଥିବା ସତ୍ତ୍ୱେ ତାଙ୍କୁ କୌଣସି ସୂଚନା ଦିଆଯାଇନାହିଁ, ଯାହା ଗଣତନ୍ତ୍ରିକ ସମ୍ବିଧାନିକ ବ୍ଯବସ୍ଥା ଉପରେ ଏକ ଗଭୀର ଅସମ୍ମାନ। ବିଧାୟକ କଳିକେଶ ଲେଖିଛନ୍ତି ଯେ, “ମୁଁ ବଲାଙ୍ଗିରର ନିର୍ବାଚିତ ପ୍ରତିନିଧି ଭାବରେ ମୁଖ୍ୟମନ୍ତ୍ରୀଙ୍କୁ ସ୍ୱାଗତ କରିଥାନ୍ତି ଓ ଆମ ଅଞ୍ଚଳର ଲୋକଙ୍କ ସମସ୍ୟା ଉପରେ ଚର୍ଚ୍ଚା କରିଥାନ୍ତି। କିନ୍ତୁ ମୋତେ ସୂଚିତ କରାଯାଇନଥିବା ଏକ ଗଣତନ୍ତ୍ରିକ ପଦ୍ଧତି ପ୍ରତି ଅସମ୍ମାନ କରାଯାଉଛି l ମୁଖ୍ୟମନ୍ତ୍ରୀଙ୍କ ବଲାଙ୍ଗିର ଗସ୍ତ ସମୟରେ କୃଷି ବିଭାଗ ଦ୍ୱାରା ଆୟୋଜିତ କୃଷକ ସମାବେଶ କୁ ଉପହାସ କରି ବିଧାୟକ କହିଛନ୍ତି ଯେ, ସେଠାରେ କେବଳ ଚୟିତ ବ୍ୟକ୍ତିଙ୍କୁ ଡାକି ଏକ “ନାଟକିୟ ଦୃଶ୍ୟ” ସୃଷ୍ଟି କରା ଯାଉଛି।“ ଏହି ଧରଣର ଏକ ପ୍ରତୀକାତ୍ମକ ରାଜନୈତିକ ଚାଲ ଏବେ ବଲାଙ୍ଗିରରେ ସାଧାରଣ ଘଟଣା ହୋଇଯାଇଛି। ଶାସକ ଦଳର କାର୍ଯ୍ୟକର୍ତ୍ତା ମାନେ ମଞ୍ଚରେ ଥାଆନ୍ତି, କିନ୍ତୁ ଜନତାର ଅସଲ ସମସ୍ୟା ନେଇ କୌଣସି ଅନୁଭବ ନଥାଏ ବୋଲି ବିଧାୟକ ଅଭିଯୋଗ କରିଛିନ୍ତି l

 ଏହି ଅବସରରେ ବିଧାୟକ ବଲାଙ୍ଗିର ପାଇଁ ସାତ ଦଫା ବିକାଶ ଦାବୀ କରିଛନ୍ତି l ତାଙ୍କ ଚିଠିରେ ବିଧାୟକ କଳିକେଶ ନିମ୍ନଲିଖିତ ଦୀର୍ଘଦିନ ଧରି ଅପେକ୍ଷିତ ଓ ଗୁରୁତ୍ୱପୂର୍ଣ୍ଣ ବିକାଶ ଦାବୀ ଗୁଡ଼ିକ ପ୍ରସ୍ତୁତ କରିଛନ୍ତି l ବଲାଙ୍ଗିରରେ କୃଷି ବିଶ୍ୱବିଦ୍ୟାଳୟ ପ୍ରତିଷ୍ଠା କରିବା, ଦେଓଗାଁ ଚିନି ମିଲର ପୁନଃରୁଦ୍ଧାର, ଅର୍ବାନ ଡ୍ରେନେଜ ପାଇଁ ମାଷ୍ଟରପ୍ଲାନ ଅନୁଯାୟୀ ଅର୍ଥ ମଞ୍ଜୁର ,ବଲାଙ୍ଗିର ମୁନିସିପାଲିଟିର ୧୭ ଗୋଟି ଜଳାଶୟର ପୁନରୁଦ୍ଧାର, ମହାରାଣୀ ସାଗର ପ୍ରକଳ୍ପ ପାଇଁ ବିଲ୍ ମଞ୍ଜୁରୀ । ତୁଷୁରା ବିମାନବନ୍ଦର ପ୍ରକଳ୍ପର ଦୃତ କାର୍ଯ୍ଯ ସମ୍ପାଦନ (₹୬୫ କୋଟି ଅନୁମୋଦିତ)। ଆଇ ଏସ୍ଏସ୍ଓ ଓ ଅନ୍ୟାନ୍ୟ ଜଳସେଚନ ପ୍ରକଳ୍ପ ଗୁଡ଼ିକର ଦ୍ରୁତ କାର୍ଯ୍ୟାନ୍ବୟନ ,ସମଲେଶ୍ୱରୀ ମନ୍ଦିର, ଲକ୍ଷ୍ମୀନାରାୟଣ ଓ ଗୋପାଳଜୀ ମନ୍ଦିର ପରିସରରେ ପୂର୍ତ୍ତ ବିଭାଗ ଦ୍ୱାରା ଗୃହନିର୍ମାଣ କାମ ତ୍ୱରାନ୍ୱିତ କରିବା ଇତ୍ୟାଦି ରହିଛି l
“ ବଲାଙ୍ଗିରକୁ ଅଣଦେଖା କରିବା ଚାଲିବ ନାହିଁ ” ବୋଲି ବିଧାୟକ କହି ଓଡ଼ିଶା ଇତିହାସରେ ବଲାଙ୍ଗିର ଗୁରୁତ୍ୱପୂର୍ଣ୍ଣ ଅବଦାନ ରଖିଛି। ଏହି ଦାବୀଗୁଡ଼ିକ  ଜନତାଙ୍କର ଆଶା। ଏହାକୁ ରାଜନୈତିକ ଭେଦଭାବରୁ ବାହାର କରି ସତ୍ୟ ସ୍ନେହଭାବରେ ଦେଖିବା ଦରକାର,” ବୋଲି ବିଧାୟକ କଳିକେଶ ମୁଖ୍ୟମନ୍ତ୍ରୀ ଙ୍କୁ ଲେଖିଛନ୍ତି lବିଧାୟକଙ୍କ ଏହି ଖୋଲା ଚିଠି ଜିଲ୍ଲା ରାଜନୀତିରେ ଚାଞ୍ଚଲ୍ଯ ସୃଷ୍ଟି କରିଛି।