17-Jan-2021

(ପ୍ରେରଣା ବ୍ୟୁରୋ) : ଯେତବେଳେ ପେଟ ପୋଡି ଯାଉଛି, ସେତେବେଳେ ଲାଜ କରି କି ଲାଭ । ଭୋକର ଜ୍ୱାଳାରେ ଯେତେବେଳେ ଜୀବନ ଜଳି ଯାଉଛି, ଆଖି ଆଗରେ ପରିବାର ଲୋକେ ଆଉଟୁପାଉଟୁ ହେଉଛନ୍ତି ସେଠି ବା ଏ ଲାଜର ମାନେ କଣ ? ଲୁହ ପିଇ ଲକ୍ଷ୍ମଣରେଖା ଭିତରେ ରହିବା ଠାରୁ ବରଂ ଏରୁଣ୍ଡି ଡେଇଁ ଦିପଇସା ରୋଜଗାର କରିବା ଭଲ । ସେଇଥିପାଇଁ ଘରୁ ବାହାରି ରାସ୍ତା କଡରେ ଦହିବରା ବିକୁଛନ୍ତି ଏ ମହିଳା ଜଣଙ୍କ । ପରିବାର ପେଟରେ ଦାନାଗଣ୍ଡେ ଦେବାକୁ, ଦୁଃଖ ଭିତରେ ଭାତ ମୁଠେ ଖାଇବାକୁ ସବୁ ଲାଜକୁ ଲକଡାଉନ କରି ସାଇକେଲ ଧରି ସଙ୍ଘର୍ଷ କରୁଛନ୍ତି । ନାଁ- ଅନିତା ସାହୁ । ପୁରୀ ଛପନଛକରେ ଭଡାଘରେ ରହୁଛନ୍ତି । ସ୍ୱାମୀ ଜିତେନ୍ଦ୍ର ସାହୁ ପକ୍ଷାଘାତରେ ପୀଡିତ ହୋଇ ରୋଗଶଯ୍ୟାରେ ଶୋଇଛନ୍ତି । ସ୍ୱାମୀଙ୍କୁ ପାରାଲିସିସ ହେବା ପରେ ଏବେ ପରିବାରର ଦାୟିତ୍ୱ ଅନିତାଙ୍କ ଉପରେ । ଘରେ ଦୁଇ ଦୁଇଟି ଝିଅ, ଶାଶୁ ଶ୍ୱଶୁର ଆଉ ନିଜକୁ ମିଶାଇଲେ ମୋଟ ୬ ଜଣ । ନୟାଗଡ ଇଟାମାଟିରୁ ଆସି ପୁରୀରେ ସ୍ୱାମୀ ସାଇକେଲ ମରାମତି ଦୋକାନଟେ କରିଥିଲେ ଯେଉଁଥିରେ ପେଟକୁ ଖାଇବାକୁ ଗଣ୍ଡେ ମିଳିଯାଉଥିଲା ହେଲେ ଏବେ ସ୍ୱାମୀ ରୋଗାଗ୍ରସ୍ତ ହେବା ପରେ କେମିତି ଚଳିବ ପରିବାର, କେମିତି ବଞ୍ଚିବ ୬ଟି ଜୀବନ। ସେହି ଚିନ୍ତାରେ ଥିବା ଅନିତା ଶେଷରେ ଦହିବରାକୁ ସାହାରା କରିଛନ୍ତି। ରାତି ପାହିବା କ୍ଷଣି ରାସ୍ତାକଡୁକୁ ବାହାରି ଆସନ୍ତି ଅନିତା । ସାଇକେଲ ଆଗରେ ଦୁଇଟି ବଡ ବଡ ହାଣ୍ଡିରେ ଦହିବରା ଆଳୁଦମ ଧରି ବୁଲି ବୁଲି ବିକ୍ରି କରନ୍ତି । କେଉଁଦିନ ୧୦୦ ଟଙ୍କା ହୁଏ ତ କେଉଁଦିନ ୫୦୦ ରୋଜଗାର । ସେତିକି ଟଙ୍କାରେ ପୁରୀ ଭଳି ଜାଗାରେ ଘରଭଡା ସହ ୬ ଜଣଙ୍କୁ ଚଳାନ୍ତି ଅନିତା । ଖରାତରାରେ ନିଜକୁ ସିଝାଇ ପରିବାର ମୁହଁରେ ମୁଠେ ଖାଦ୍ୟ ଦିଅନ୍ତି ଏ ମହିଳା ଜଣଙ୍କ ।ପରିସ୍ଥିତି ସେତିକି ବାଧ୍ୟ ନକଲେ, ସମୟ ସେତିକି ନିଷ୍ଠୁର ନହେଲେ ସାଧାରଣ ଗାଁ ଗହଳିର ମହିଳା ଜଣେ ରାସ୍ତାକୁ ଓହ୍ଲାଏନି । ଯଦିଓ ଓଢଣା ଭିତରେ ରହିବାର ଜମାନା ଗଲାଣି, ମହିଳାମାନେ ସ୍ୱାବଲମ୍ବୀ ହୋଇ ଘରୁ ଗୋଡ କାଢିଲେଣି । କିନ୍ତୁ ଅନିତାଙ୍କ କ୍ଷେତ୍ରରେ ସମ୍ପୂର୍ଣ୍ଣ ଅଲଗା । ଏଠି ମହିଳାଟିଏ ଏରୁଣ୍ଡି ଡେଉଁଛି ସ୍ୱାମୀକୁ ବଞ୍ଚାଇବାକୁ, ପରିବାର ଚଳାଇବାକୁ ଆଉ ପିଲାଙ୍କ ଭବିଷ୍ୟତ ଗଢିବାକୁ…