05-Oct-2022

ପୁତଲା ପୁଡେଇ କାଏଁ ଲାଭ୍....?
  -ଆଶୁକବି ହେମନ୍ତ ଦାଶ

ଦ୍ବାପର୍ ଯୁଗେ କୁଷ୍ଟଁ ମାହାପୁରୁ
କଁସ୍ କେ କରିଥିଲେ ଧଁଶ୍,
ଛୁଆ ମାନକୁଁ ମାରିଥିନି ବଲି
ବୁଡେଇ ଦେଲେ ମୋର୍ ବଁଶ୍।
ହେଲେ ଆଏଜ୍ କାଲ୍ ସବୁ ବୁଆ ମାଁ
ପେଟେ ଦଉଛ ମାରି,
ପେଟର୍ ଛୁଆକେ ମାରିକରି ଭିଲ୍
ନିଜକେ ଭାବୁଛ ହରି।

ଯେନ୍ ଦୋଷ୍ ଗୁନା କରିଥିନି ମୁଇଁ
କରୁଛ ତମେ ସେ ପାପ୍,
ତମେ ବି ଦିନେ ଶାସତି  ପାଏବ
ନାଇଁ ପାଇପାର ମାଫ୍?
ତମର୍ ପଛ୍ ଆଡ୍ ପରଛା ମେଲା
ଜଲଦି ଜଲଦି ଢାପ୍,
ତମର୍ ଭିତରେ ତ ଅସୁର୍ ଲୁକିଛେ
ଆର୍ ପୁତଲା ପୁଡେଇ କାଏଁ ଲାଭ୍?

ତେର୍'ତା ଯୁଗେ ରାମ୍ ମାହାପୁରୁ
ମାରିଥିଲେ ବଲି ମତେ,
କଲିଯୁଗର୍ ମୁନୁଷ୍ ସେଟାକେ ହେତେଇ
ଉସତ୍ ହଉଛେ କେତେ?
ମାହାପୁରୁର୍ ହାତେ ମରବାର୍ ଲାଗି
ରଚିଥିନି ସିନା ମୁଇଁ,
ସିତା ମାଆଁ କେ ଚୁରେଇଥିନି ହେଲେ
କେଭେ ଥରେ ନାଇଁ ଛୁଇଁ।
ନାରିକେ ସନମାନ୍ କେନ୍ତା ଦେସନ୍
ମର୍ ଠାନୁ ଟିକେ ଶିଖ,
ଅଶୋକ୍ ବନେ ମାଆଁ କେ ଯତନେ
ରଖିଥିନି କିନାଇଁ ଦେଖ?
ତମର୍ ଏନ୍ତା ନାରି ନିର୍ଯ୍ୟାତନା
କରିଥିନି କେ ଭାବ୍,
ହେଲେ ଫି ବଛର୍ ମର୍ ଇଜ୍ଜତ୍ ନଉଛ
ପୁତଲା ପୁଡେଇ କାଏଁ ଲାଭ୍.....?

ପୁଡାବ ଯଧି ପୁଡେଇ ପକ ରେ
ତମର୍ ମନର୍ ରାବନ୍,
ବିଜୟା ଦଶମି ଆଏଲେ ଇଥର
ପୁଡେଇ ଦିଅ ଅସୁର୍ ପନ୍।
ନାରିକେ କଷନ୍ ନାରିକେ ଧର୍ସନ୍
ନାଇଁ କର ଆରୁ କେଭେ,
ଅସଲ୍ ରାବନ୍ ସଁସାର୍ ଭିତରୁ
ମରବା ସିନେ ଗା ତେଭେ।
କନ୍ୟା ଭୃଣ ହତ୍ୟା ନାଇଁ କରୁ ବଲି
କିରିଆ ପକ ରେ ଆଝି,
ଛାର୍ ଛିକର୍ ଯଉତୁକ୍ ଲାଗି 
ନାଇଁ ପୁଡେଁ ଆରୁ ମାହେଝି।
ଛୁଚା ପୁତଲା କେ ପୁଡେଇ କରି
ପଉଛ ରେ କାଏଁ ଲାଭ୍,
ବାୟୁ ପର୍'ଦୁସନ୍ କେ ବଢଉଛ ଖାଲି
ତର୍ ମନେ ଟିକେ ଭାବ୍,
ଇ ପୁତଲା ପୁଡେଇ କାଏଁ ଲାଭ୍ .....?
 ଛୁଚା ପୁତଲା ପୁଡେଇ କାଏଁ ଲାଭ୍ .....?

<><<<>>>==0==<<<>>><>
ସଂପାଦକ, ନିଷାନ, ତୁଷୁରା, ବଲାଙ୍ଗିର
ମୋ-୯୯୩୭୬୮୮୫୫୧