09-Jan-2025

ସୋନପୁର/ମେଣ୍ଡା(ପ୍ରେରଣା ଖବର): ମେଣ୍ଡା ଅଞ୍ଚଳର ଅନେକଗୁଡିଏ ବିକାଶ କାମ କରାଯାଇଛି । ଆଗକୁ ଆହୁରି ଗୁଡିଏ ପ୍ରକଲ୍ପ କାମ ଆରମ୍ଭ କରାଯିବ। ମେଣ୍ଡା ଅଞ୍ଚଳର ଲୋକଙ୍କ ସହିତ ମୁଁ ଅଛି ଓ ତାଙ୍କର ଦାବିଗୁଡିକୁ ମୋର ସମର୍ଥନ ରହିଛି ବୋଲି ସୋନପୁର ଜିଲ୍ଲା ତରଭାବ୍ଲକ ଅନ୍ତର୍ଗତ ମେଣ୍ଡାଠାରେ ତୃତୀୟ ଆଞ୍ଚଳିକ ବାରାପାହାଡ ମହୋତ୍ସବରେ ମୁଖ୍ୟଅତିଥି ଭାବରେ ଯୋଗଦେଇ ସୋନପୁର ବିଧାୟକ ନିରଂଜନ ପୂଜାହାରୀ କହିଛନ୍ତି। ଅଧ୍ୟାପକ ରାଜୀବ କୁମାର ଯୋଷୀଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ବିଧାୟକ ଶ୍ରୀ ପୁଝାରୀ, ସମ୍ମାନୀତ ଅତିଥି ଭାବରେ ଜିଲ୍ଲାପରିଷଦ ସଭ୍ୟା ଅଞ୍ଚଳି କମ୍ପ,ମେଣ୍ଡା ସରପଞ୍ଚ ଲିଜାରାଣୀ ଦଣ୍ଡସେନା,ରାଣୀସର୍ଡା ସରପଞ୍ଚ ଗୋପାଳ, ଦେଉଳପଦର ସମିତିସଭ୍ୟ ରାଜକିଶୋର ଭୁଏ, ପୁଆ ସମିତି ସଭ୍ୟ ହେମନ୍ତ ମାଝୀ ଓ ମୁଖ୍ୟବକ୍ତା ଭାବରେ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଯୋଗ ଦେଇଥିଲେ । ଏହି ଅବସରରେ ସୁକତେଲ ନଦୀରେ ଏକ ବ୍ୟାରେଜ ନିର୍ମାଣ ଓ ମୁଖ୍ୟଦାବି ଭାବରେ ମେଣ୍ଡାକୁ ବ୍ଲକ ଘୋଷଣା କରିବାକୁ ଦାବି କରାଯାଇଛି । ଗତ ତିନିବର୍ଷ ଧରି ଚାଲିଥିବା ଏହି ମହୋତ୍ସବ ଅବସରରେ ସୋନପୁର ବିଧାୟକ ନିରଂଜନ ପୂଜାହାରୀ ଯୋଗଦେଇ ଅଞ୍ଚଳକୁ ଅନେକଗୁଡିଏ ଉନ୍ନୟନପ୍ରକଲ୍ପ ଦେଇଛନ୍ତି। ଏହି ଧାରା ଆଗକୁ ମଧ୍ୟ ଚାଲୁରହିବ ବୋଲି ଉପସ୍ଥିତ ଜନସାଧାରଣ ଙ୍କୁ ବିଧାୟକ ପ୍ରତିଶୃତି ଦେଇଛନ୍ତି। ବାରପାହାଡ ମହୋତ୍ସବ ଅବସରରେ ପ୍ରତ୍ୟହ କଂସଦରବାର ଆୟୋଜିତ ହେଉଛି। ବଲାଙ୍ଗୀର ଜିଲ୍ଲା ଫଟକରା ଗ୍ରାମର କଳାକାର ଅନୀଳ ନାଏକ ଓ ତାଙ୍କ ଟିମ କଂସଦରବାର ସହ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରୁଛନ୍ତି । ମେଣ୍ଡା,ଦେଉଳପଦର,ପାଇକବାହାଲ,ପୁଆ ଇତ୍ୟାଦି ଗ୍ରାମ ପଞ୍ଚାୟତ ଅଞ୍ଚଳର ହଜାର ହଜାର ଲୋକ ଏହି କଂସଦରବାର ଙ୍କୁ ଉପଭୋଗ କରୁଛନ୍ତି । ମହୋତ୍ସବ ଆୟୋଜକ କମିଟିରେ ରାଜେନ୍ଦ୍ର ପଣ୍ଡା, ରାମଶଙ୍କର ମହାପାତ୍ର, ହୃଷିକେଶ ପାତ୍ର, ହରିଶଙ୍କର ପୁରୋହିତ, ଡୁବୁଲୋ ଦଣ୍ଡସେନା, ଚକ୍ରଧର ସା, ଗଣନାଥ ସାହୁ, ତରଭା ବ୍ଲକଅଧ୍ୟକ୍ଷ ସରୋଜ କୁମାର କମ୍ପ ପ୍ରମୁଖ ରହିଛନ୍ତି ।