16-Sep-2024

ଅତାବିରା-ଜାତୀୟ ରାଜପଥ (୬) କୁ ପ୍ରଶସ୍ତିକରଣ କରି (୫୩) ରେ ରୂପାନ୍ତରିତ କରି ଟୋଲଟେକ୍ସ ଅସୁଲି କରିବାର ଦୀର୍ଘ ବର୍ଷ ବିତିଯାଇଥିଲେ ମଧ୍ୟ ଅତାବିରାରେ ନୂତନ ଭାବେ ଯାତ୍ରୀ ପ୍ରତିକ୍ଷାଳୟ ଟିଏ ତିଆରି ହୋଇପାରି ନାହିଁ।ଯାହା ଫଳରେ ଗୁରୁତ୍ୱପୂର୍ଣ୍ଣ ବସଷ୍ଟାଣ୍ଡ ଛକ, କଲେଜ ଛକ ଓ ଟେଲିକମ ଅଫିସ ଛକରେ ନିତିଦିନ କଲେଜ ଛାତ୍ରଛାତ୍ରୀ, ବୁର୍ଲା ହସ୍ପିଟାଲ ଯିବା ଅପେକ୍ଷାରତ ରୋଗୀ, ତଥା କୃଷକ, ବ୍ୟବସାୟୀ ଓ କଟକ,ପୁରୀ, ଭୁବନେଶ୍ୱର, ବ୍ରହ୍ମପୁର ଭଳି ଗସ୍ତରେ ଥିବା ଯାତ୍ରୀମାନେ ନାହିଁ ନଥିବାର ହଇରାଣ ହୋଇ ରାସ୍ତା କଡରେ ବାଧ୍ୟ ହୋଇ ଛିଡା ହେଉଛନ୍ତି।ଗ୍ରୀଷ୍ମପ୍ରବାହ ଦାଉରୁ ରକ୍ଷା ପାଇବା ପାଇଁ ରାସ୍ତା କଡରେ ଗଛର ଛାଇ ଟିକିଏ ମିଳି ପାରୁନାହିଁ କି ବର୍ଷା ଦାଉରୁ ରକ୍ଷା ପାଇବା ଛାତ ବାରଣ୍ଡା ଟିକିଏ ନାହିଁ।ଯତଦ୍ୱାରା ଉଭୟ ଖରା, ବର୍ଷାକୁ ସହ୍ୟ କରି ବସ ଯାତ୍ରା କରିବାକୁ ବାଧ୍ୟ ହେଉଛନ୍ତି।ଏହାର ପ୍ରଭାବରେ ସୁସ୍ଥ ଯାତ୍ରୀମାନେ ଜର କାଶ ଭଳି ରୋଗରେ ପ୍ରଭାବିତ ହେଉଛନ୍ତି ଓ ରୋଗୀମାନେ ଆହୁରି ଅଧିକ କଷ୍ଟ ସହ୍ୟ କରୁଛନ୍ତି।ଏପରିକି କିଛି ସମୟରେ ବସକୁ ଅପେକ୍ଷା କରିଥିବା ଛାତ୍ରଛାତ୍ରୀ ଅଚାନକ ବର୍ଷାର ପ୍ରଭାବରେ ଭିଜି ଯାଉଛନ୍ତି ଓ ଘରକୁ ଫେରିବାକୁ ବାଧ୍ୟ ହେଉଛନ୍ତି।ସୂଚନାଯୋଗ୍ୟ ଯେ ଜାତୀୟ ରାଜପଥ(୬) ହୋଇ ରହିଥିବା ସମୟରେ ବସଷ୍ଟାଣ୍ଡ ଛକରେ ଗୋଟିଏ ଯାତ୍ରୀ ପ୍ରତିକ୍ଷାଳୟ ରହିଥିଲା।ଏହା ସହ ରାସ୍ତା କଡରେ ନିମ୍ବ, ପିପଲ ଭଳି ଗଛ ଗୁଡିକ ରହିଥିଲା।ରାସ୍ତା ପ୍ରଶାସ୍ତିକରଣ ହେବା ଦ୍ୱାରା ପ୍ରତିକ୍ଷାଳୟକୁ ଭାଙ୍ଗି ଦିଆଗଲା ଓ ଵିଶାଲ ରାସ୍ତା କଡରେ ଛାଇ ପ୍ରଦାନ କରୁଥିବା ଗଛ ଗୁଡିକୁ କାଟି ଦିଆଗଲା।ହେଲେ ଆଜି ପର୍ଯ୍ୟନ୍ତ ଯାତ୍ରୀ ମାନଙ୍କ ପାଇଁ କୌଣସି ବ୍ୟବସ୍ଥା ହୋଇପାରି ନାହିଁ।ଅପରପକ୍ଷରେ ଜାତୀୟ ରାଜପଥକୁ ସଂଲଗ୍ନ ଥିବା ଅତାବିରା ଅଞ୍ଚଳର ବ୍ୟବସାୟିକ କେନ୍ଦ୍ରବିନ୍ଦୁ ଅଟେ ଓ ଏହି ସ୍ଥାନରୁ ଯାତ୍ରୀମାନେ ବସ ଯୋଗେ ଜିଲ୍ଲା ତଥା ରାଜ୍ୟରେ ଥିବା ଶିକ୍ଷାନୁଷ୍ଠାନ,ସ୍ୱାସ୍ଥ୍ୟ କେନ୍ଦ୍ର, ସମ୍ପର୍କୀୟ ଘରକୁ ଯାତାୟାତ କରିଥାନ୍ତି।ଯାହା ଫଳରେ ଯାତ୍ରୀମାନଙ୍କ ଭିଡ଼ ପରିଲକ୍ଷିତ ହୋଇ ରହିଥାଏ।ହେଲେ ଏଭଳି ଗୁରୁତ୍ୱପୂର୍ଣ୍ଣ ସହରରେ ଯାତ୍ରୀଙ୍କ ପାଇଁ କୌଣସି ପ୍ରକାର ସୁବିଧା ନାହଁ।ତୁରନ୍ତ ବିଭାଗୀୟ ଅଧିକାରୀ ଏହାକୁ ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବା ପାଇଁ ଦାବି ହେଉଛି।