05-Jun-2024

ବଲାଙ୍ଗୀର, ବଲାଙ୍ଗୀର ବିଧାନସଭା କ୍ଷେତ୍ରରୁ ବିଧାୟକ ଭାବରେ ବିଜୟୀ ହେବାପରେ ଆଜି କଳିକେଶ ନାରାୟଣ ସିଂଦେଓ ସପତ୍ନୀକ ମାଁ ସମଲେଶ୍ୱରୀମନ୍ଦିରକୁ ପହଞ୍ଚି ଦେବୀମାଁଙ୍କ ଆଶୀର୍ବାଦ ନେଇଥିଲେ। ବଲାଙ୍ଗୀରକୁ ଏକ ସୁସ୍ଥ, ସବୁଜ ଓ ଅପରାଧମୁକ୍ତ ସହର ଭାବରେ ଗଢିତୋଳିବାକୁ ବଲାଙ୍ଗୀରବାସୀ ସହଯୋଗ କରିଥିବାରୁ ତାଙ୍କର ବିଜୟର ଶ୍ରେୟ ବଲାଙ୍ଗୀରବାସୀଙ୍କୁ ଦେଇଛନ୍ତି । ଏହା ସହିତ ବଲାଙ୍ଗୀରର ବିକାଶ ପ୍ରକଲ୍ପଗୁଡିକୁ ଆଗେଇ ନେବାକୁ ସମସ୍ତଙ୍କର ସହଭାଗିତା ପାଇଁ ଆହ୍ୱାନ ଦେଇଥିଲେ। ଆଜି ପ୍ରାୟ ୯.୩୦ରେ କଳିକେଶ ତାଙ୍କ ପତ୍ନୀ ମେଘନା ସିଂଦେଓ, ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ, ଜିଲ୍ଲାପରିଷଦ ଅଧ୍ୟକ୍ଷା ଦେବକୀ ସାହୁ, ପୂର୍ବତନ ପୌରାଧ୍ୟକ୍ଷା ସନ୍ତୋଷିନୀ ବେହେରା, ବଲାଙ୍ଗୀର ବିଜେଡିର ନଗର ସଭାପତି ଶମ୍ଭୁ ନାଗ, ଗୁଲାବ ବାଗ, ଶିବ ବେହେରା ପ୍ରମୁଖଙ୍କୁ ସାଙ୍ଗରେ ନେଇ ସମଲେଶ୍ୱରୀ ମନ୍ଦିର ଓ ପାଟଣେଶ୍ୱରୀ ମନ୍ଦିରକୁ ଯାଇ ଦେବୀମାଁଙ୍କ ଦର୍ଶନ କରିଥିଲେ । ବଲାଙ୍ଗୀର ଜିଲ୍ଲାରେ ଚଳିତ

ନିର୍ବାଚନରେ ବିଜେପିର ସୁନାମୀ ଆସି ବିଜେଡିର କଳିକେଶଙ୍କ ଛାଡି ବାକି ସମସ୍ତେ ହାରିଯାଇଛନ୍ତି । ଏପରିକି କଣ୍ଟାବାଞ୍ଜିରେ ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ହାରିଯାଇଛନ୍ତି । ଫଳରେ କଳିକେଶଙ୍କ ବିଜୟ ମଧ୍ୟ ଫିକା ପଡିଯାଇଛି । ରାଜ୍ୟରେ ସରକାର ମଧ୍ୟ ବଦଳିଯାଇଛି। ସେହି କାରଣରୁ ବିଜେପି ଦଳରେ ଆଉ ଉତ୍ସାହ ନାହିଁ । ତେବେ ଗତ ୨୦୧୪ ଓ ୨୦୧୯ରେ ବଲାଙ୍ଗୀର ରାଜପରିବାର ନିର୍ବାଚନରେ ହାରିଯାଇଥିଲେ । ସେଥିପାଇଁ ବଲାଙ୍ଗୀରର ବିଜେଡି କର୍ମୀଙ୍କ ମଧ୍ୟରେ ନିରାଶା ରହିଥିଲା । ଏବେ କଳିକେଶଙ୍କ ବିଜୟ ପରେ ବିଜେଡିର କର୍ମୀ ମାନେ ବହୁ ପରିମାଣରେ ଉତ୍ସାହିତ ରହିଛନ୍ତି ।