11-Apr-2023

ସାଢ଼େ ଚାରି କୋଟି ଓଡ଼ିଆଙ୍କ ଆରାଧ୍ୟ ଦେବତା ଶ୍ରୀ ଜଗନ୍ନାଥଙ୍କ ମହିମା ଅପରମ୍ପାର ଅଟେ । ଭାବ ଓ ବିଶ୍ୱାସରେ ବନ୍ଧା ଜଗତର ନାଥ ଜଗନ୍ନାଥ ଓଡ଼ିଶାର ବିଭିନ୍ନ ସ୍ଥାନରେ ବିଭିନ୍ନ ରୂପରେ ଭକ୍ତଙ୍କ ଦର୍ଶନ ଦେଉଛନ୍ତି । ପୁରୀ ଧାମ ବ୍ୟତିତ ଶ୍ରୀ ଜଗନ୍ନାଥଙ୍କ ଆଉ ଏକ ଅଲୌକିକ ପୀଠ ରହିଛି ବଣପାହାଡ ଘେରା କୋରାପୁଟ ଅଂଚଳରେ । ପୁରୀ ଜଗନ୍ନାଥ ମନ୍ଦିରରେ ଦଇତାପତି ମାନେ ତିନି ବିଗ୍ରହଙ୍କ ପୂଜାର୍ଚ୍ଚନା ଓ ଗୁପ୍ତସେବା କରୁଥିବା ବେଳେ ଏଠାରେ ଶାବର ମାନେ ସେଇ ସମାନ ନୀତିକାନ୍ତି ଅନୁସାରେ ପ୍ରଭୁଙ୍କ ସେବା କରିଥାନ୍ତି । ଏଠାରେ ଶବର ମାନେ ହେଉଛନ୍ତି ଜଗନ୍ନାଥଙ୍କ ଆଦ୍ୟପୂଜକ । ଜଗନ୍ନାଥ ଦର୍ଶନ ଓ ଜଗନ୍ନାଥ ସଂସ୍କୃତିକୁ ଭଲ ପାଉଥିବା ବ୍ୟକ୍ତିବିଶେଷଙ୍କ ପାଇଁ ଏହି ପୀଠ ନିଶ୍ଚୟ ରୂପରେ ଅନେକ ରହସ୍ୟକୁ ଉନ୍ମୋଚନ କରିବା ସହ ଗବେଷଣାର ଖୋରାକ୍ ଯୋଗାଇବ । ଏପରି ଏକ ଅଲୌକିକ ପୀଠର ନାମ ହେଉଛି ଶାବରୀ ଶ୍ରୀକ୍ଷେତ୍ର । କୋରାପୁଟ ସହର ମଧ୍ୟରେ ଏକ ଆଧ୍ୟାତ୍ମିକ ଓ ମନଲୋଭା ପରିବେଶ ମଧ୍ୟରେ ଗଢ଼ି ଉଠିଥିବା ଏହି ନୈସର୍ଗିକ ପୀଠରେ ପାଦ ପଡିଲା ମାତ୍ରେ ଜଣେ ନାସ୍ତିକ ଭିତରେ  ମଧ୍ୟ ସ୍ୱତଃପ୍ରବୃତ୍ତ ଭାବରେ ଭକ୍ତିଭାବ ଜାଗ୍ରତ ହୋଇଯିବ । କେଉଁ ଅନାଦି କାଳରୁ ଏଠାରେ ଶାବର ମାନଙ୍କ ଦ୍ୱାରା ଶ୍ରୀ ଜଗନ୍ନାଥ ପୂଜା ପାଉଥିଲେ । ଏଠାକାର ଶବର, ପ୍ରଜା ଓ କନ୍ଧ ଆଦିବାସୀ ମାନେ ନିଘଞ୍ଚ ଜଙ୍ଗଲ  ମଧ୍ୟରେ ନିମ୍ବ ଗଛ ମୂଳେ ପତ୍ର ବେଢ଼ା କରି ସଂପୂର୍ଣ୍ଣ ନିଷ୍ଠାର ସହ ଶ୍ରୀ ଜଗନ୍ନାଥଙ୍କ ଉପାସନା କରୁଥିଲେ । ଜଙ୍ଗଲର ସ୍ୱାଦିଷ୍ଟ ଫଳମୂଳ ଓ ଭୋଗରାଗ ଅର୍ପଣ କରି   ଜଗନ୍ନାଥଙ୍କ ଚରଣାଶ୍ରିତ ହୋଇଥିଲେ ଏହି ଶବର ଓ କନ୍ଧ ମାନେ । ଦଣ୍ଡକାରଣ୍ୟ ଅଂଚଳ ଅଧୀନରେ ଥିବା ଏହି ଅନନ୍ୟ ପୀଠ ପଛରେ ରହିଛି ଏକ ରୋଚକ ତଥ୍ୟ । ଭାବ ଓ ଭକ୍ତିରେ ବନ୍ଧା ଶ୍ରୀ ଜଗନ୍ନାଥ ଦିନେ ଏହି ଶାବର ମାନଙ୍କ ଅଦମ୍ୟ ଭକ୍ତିରେ ଆକର୍ଷିତ ହୋଇଥିଲେ ।   ଏକଦା ମହାପ୍ରଭୁଙ୍କ ଶୂନ୍ୟବାଣୀ ହୋଇଥିଲା, ଏହି ପୀଠରେ ଏକ ଭବ୍ୟ ମନ୍ଦିର ନିର୍ମାଣ ହେଉ । ତା ପରେ କୋରାପୁଟ ଜିଲ୍ଲାରେ ଆବାଳବୃଦ୍ଧବନୀତାଙ୍କ ଅର୍ଥରେ ଏଠାରେ ଠିଆ ହୋଇଥିଲା ଆଜିର ଏହି ଜଗନ୍ନାଥ ମନ୍ଦିର ଯାହା ଶାବରୀ ଶ୍ରୀକ୍ଷେତ୍ର ଭାବରେ ପ୍ରସିଦ୍ଧି ଲାଭ କରିଛି । ପ୍ରତିଦିନ ଏହି ପୀଠକୁ ଜଗନ୍ନାଥ ପ୍ରେମୀ ମାନଙ୍କ ସୁଅ ଛୁଟିଥାଏ ।  ଏକଦା ବିଶ୍ୱବସୁ ଶାବର ଜଗନ୍ନାଥଙ୍କୁ ନୀଳମାଧବ ରୂପରେ ଉପାସନା କରିଥିଲା । ବିଶ୍ୱବସୁ ଜଗନ୍ନାଥଙ୍କୁ ନୀଳମାଧବ ରୂପରେ ପୂଜା କରି ନ ଥିଲେ ହୁଏ ତ  ଓଡ଼ିଶାରେ ଜଗନ୍ନାଥ ସଂସ୍କୃତିର ଆରମ୍ଭ ହୋଇ ନ ଥାନ୍ତା । ଠିକ ସେହିପରି ଜଙ୍ଗଲବେଢ଼ା କୋରାପୁଟ ଜିଲ୍ଲାର ଏହି ପୀଠକୁ ଦେଖିଲେ ଜଗନ୍ନାଥଙ୍କ ମହାତ୍ମ୍ୟ ପୁଣିଥରେ ମନେ ପଡିଯାଏ ।  ଶବର, କନ୍ଧ ଓ ପ୍ରଜା ମାନଙ୍କ ନିଷ୍କାମ ଭକ୍ତିର ମୂକସାକ୍ଷୀ ହେଉଛି  କୋରାପୁଟର ଶାବର ଶ୍ରୀକ୍ଷେତ୍ର ।