28-Dec-2022

ବଲାଙ୍ଗୀର// ବଲାଙ୍ଗୀର ରୋଟାରି କ୍ଲବ ଅଫ୍ ଏଲାଇଟ୍ ପକ୍ଷରୁ ଆଜି ସ୍ଥାନୀୟ ଟାଉନ ବାଏଜ୍ ହାଇସ୍କୁଲ ପଡିଆରେ ଉଡାନ ମିଟ୍ ୨ଠ୨୨ ଉଦ୍‌ଘାଟିତ ହୋଇଯାଇଛି । ଏଥିରେ ମୁଖ୍ୟ ଅତିଥି ଭାବରେ ଓଡ଼ିଶାର ମହାମହିମ ରାଜ୍ୟପାଳ ପ୍ରଫେସର ଗଣେଶୀଲାଲ ଯୋଗ ଦେଇ ଉଡାନ ମିଟ୍ ୨ଠ୨୨  କୁ ଉଦ୍‌ଘାଟନ କରିଥିଲେ । ରାଜ୍ୟପାଳ ଗଣେଶୀ ଲାଲ ବଲାଙ୍ଗୀର ଜିଲ୍ଲାରେ ମହିଳା ଶିକ୍ଷାର ବିକାଶ ଦିଗରେ ଉଡାନର ନିସ୍ୱାର୍ଥପର ସେବାକୁ ଭୁରିଭୁରି ପ୍ରଶଂସା କରିଥିଲେ । ସେବା ହିଁ ମୁକ୍ତିର ଏକମାତ୍ର ବୋଲି କହି ଶ୍ରୀ ଗଣେଶୀଲାଲ ଭାରତର ଅନ୍ୟ ରାଜ୍ୟ ମାନଙ୍କ ତୁଳନାରେ ଓଡ଼ିଶାର ସଂସ୍କୃତି ଓ ଚାଲିଚଲଣ ମହାନ ବୋଲି କହିଥିଲେ । ଏହି ରାଜ୍ୟରେ ରଜ ପର୍ବ ପାଳନ କରାଯାଇଥାଏ ଯାହା ମାତୃଶକ୍ତିର ମହନୀୟତାକୁ ଉଜାଗର କରେ ବୋଲି କହିଥିଲେ ।

ପ୍ରଭୁ ଜଗନ୍ନାଥଙ୍କ ରାଜ୍ୟରେ ଧନୁଯାତ୍ରା ପରି ପର୍ବ ପାଳନ କରାଯାଇଥାଏ ଯାହା ଧର୍ମ ଓ ଅଧର୍ମର ବ୍ୟାଖ୍ୟା କରିଥାଏ ବୋଲି କହିଥିଲେ l ବିଭିନ୍ନ କ୍ଷେତ୍ରରେ ଆମ ରାଜ୍ୟ ବର୍ତ୍ତମାନ ବିକାଶର ନୁଆଁ ଆଲୁଅ ଦେଖୁଛି । ଓଡ଼ିଶାର ମହନୀୟ ପରମ୍ପରାକୁ ବ୍ୟାଖ୍ୟା କରିବାକୁ ଯାଇ ଓଡ଼ିଶା  ବର୍ତ୍ତମାନ ଏକ ଭାରତ ହେବାକୁ ଯାଉଛି ବୋଲି ଶ୍ରୀ ଗଣେଶୀଲାଲ କହିବା ସହ ଏକତା ଓ ସମନ୍ୱୟ  ସ୍ଥାପନ ହିଁ ଆମକୁ ବିକାଶର ମାର୍ଗରେ ନେଇ ପାରିବ ବୋଲି କହିଥିଲେ । ଛାତ୍ରଛାତ୍ରୀ ମାନଙ୍କ ଉଦ୍ଦେଶ୍ୟରେ ରାଜ୍ୟପାଳ ନିଜ ଭାଷଣରେ  ପ୍ରଥମେ ନିଜକୁ ଭଲ ପାଇଲେ ହିଁ ଅନ୍ୟ ମାନଙ୍କ ଭଲ ପାଇବା ଶିଖି ପାରିବ ବୋଲି କହିଥିଲେ । ରୋଟାରି କ୍ଲବ ଅଫ୍ ଏଲାଇଟ୍  ସଭାପତି ରିଙ୍କୁ ପାତ୍ର ଙ୍କ ପରିଚାଳନାରେ ଆୟୋଜିତ ଏହି ଉତ୍ସାବରେ ସମ୍ମାନିତ ଅତିଥି ଭାବରେ ବଲାଙ୍ଗୀର ବିଧାୟକ ନରସିଂହ ମିଶ୍ର, ବଲାଙ୍ଗୀର ଜିଲ୍ଲାପାଳ ଚଂଚଳ ରାଣା ଓ ପ୍ରଫେସର ମଧୁସୂଦନ ପତି ଯୋଗ ଦେଇ ଆର୍ଥିକ ଅନଗ୍ରସର ସ୍କୁଲ ଛାତ୍ରୀ ମାନଙ୍କ ଶୈକ୍ଷିକ ବିକାଶ ଦିଗରେ ଉଡାନ୍ ର ପ୍ରୟାସକୁ ଅଭିନନ୍ଦନ ଜଣାଇ ଏହାର କର୍ମକର୍ତ୍ତା ମାନଙ୍କୁ ଆହୁରି ନିଷ୍ଠାର ସହ କାମ କରିବାକୁ ପରାମର୍ଶ ଦେଇଥିଲେ । ସ୍କୁଲ ଛାତ୍ରଛାତ୍ରୀ ମାନଙ୍କ ଦ୍ୱାରା ଅନୁଷ୍ଠିତ ବିଭିନ୍ନ

ପ୍ରତିଯୋଗିତାର କୃତୀ ପ୍ରତିଯୋଗୀ ମନାନଙ୍କୁ ମେଡାଲ ଓ ସାଟିର୍ଫିକେଟ ପ୍ରଦାନ କରାଯାଇଥିଲା । ଏହି ଅବସରରେ ମହାମହିମ ରାଜ୍ୟପାଳ ଓ ଅନ୍ୟାନ୍ୟ ଅତିଥି ମାନଙ୍କ ଦ୍ୱାରା  ଉଡାନ ପକ୍ଷରୁ ଶିକ୍ଷା ସଂପର୍କିତ ଏକ ସ୍ମରଣିକା ଉନ୍ମୋଚିତ ହୋଇଥିଲା ।  ଶେଷରେ  ରୋଟାରି କ୍ଲବ ଅଫ୍ ଏଲାଇଟ୍ ର ସଂପାଦିକା ମମତା ପରମାର ସମସ୍ତଙ୍କୁ ଧନ୍ୟବାଦ ଜ୍ଞାପନ କରିଥିଲେ । ଏହି ସମାରୋହରେ ସହରର ବହୁ ବୁଦ୍ଧିଜୀବୀ, ଶିକ୍ଷକ, ଅଭିଭାବକ, ଛାତ୍ରଛାତ୍ରୀ ଓ ସାମ୍ବାଦିକ ଯୋଗ ଦେଇଥିଲେ ।

     ଉଡାନ ମିଟ୍ ୨ଠ୨୨ର ଦ୍ୱିତୀୟ ଅଧିବେଶନ ଆଜି ସଂଧ୍ୟା ସାଢ଼େ ୬ଟାରେ ଅନୁଷ୍ଠିତ ହେବ । ଏଥିରେ ମୁଖ୍ୟ ଅତିଥି ଭାବରେ ଜିଏମ୍ ବିଶ୍ୱିଦ୍ୟାଳୟର ଭାଇସ୍ ଚାନସେଲର୍ ପ୍ରଫେସର ଏନ୍‌. ନାଗାରାଜୁ ଓ ସମ୍ମାନିତ ଅତିଥି ଭାବରେ ବଲାଙ୍ଗୀର ବିଧାୟକ ନରସିଂହ ମିଶ୍ର, ପ୍ରଫେସର ମଧୁସୂଦନ ପତି ଜିଏମ୍ ବିଶ୍ୱିଦ୍ୟାଳୟର ରେଜିଷ୍ଟାର ଶ୍ରୀମତୀ ଯୁଗଳେଶ୍ୱରୀ ଦାଶ, ଓ ସୋଆ ବିଶ୍ୱବିଦ୍ୟାଳୟର ନିର୍ଦ୍ଦେଶକ ପ୍ରଫେସର ନଚିକେତା କେ. ଶର୍ମା ଯୋଗ ଦେବାର କାର୍ଯ୍ୟକ୍ରମ ରହିଛି । ସଭା ପରେ ଉଡାନ୍ ଛାତ୍ରଛାତ୍ରୀ ଓ ଆଲୁମୁନି ଙ୍କ ଦ୍ୱାର ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିବେଷିତ ହେବ ବୋଲି ଜଣାପଡିଛି ।