28-Dec-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ) ବଲାଙ୍ଗୀର ଜିଲ୍ଲାର ଆଦିବାସୀ କଲ୍ୟାଣ ବିଭାଗର ସ୍କୁଲ୍ ଓ ହଷ୍ଟେଲରେ ଗତ କିଛିଦିନ ହେଲା ବ୍ୟାପକ ଅବ୍ୟବସ୍ଥା ଲକ୍ଷ୍ୟ କରାଯାଇଛି । ଏହି ବିଭାଗର ଆଶ୍ରମ ଓ ସେବାଶ୍ରମ ସ୍କୁଲ୍ , ହଷ୍ଟେଲ ,  ଛାତ୍ରୀନିବାସ ଇତ୍ୟାଦିରେ ବିଭାଗୀୟ ଶିକ୍ଷକ / ଶିକ୍ଷୟିତ୍ରୀମାନଙ୍କ ଦ୍ବାରା ଅଧିକାରୀଙ୍କ ମିଳିତ ଦୁର୍ନୀତି ସୀମାଲଙ୍ଘନ କଲାଣି । ମୁଖ୍ୟତଃ  ଛୁଟିଦିନ , ଉପସ୍ଥାନ ଓ ଖାଦ୍ୟପେୟ ଇତ୍ୟାଦିରେ ହେରଫେର କରାଯାଇ ଉପରିସ୍ଥ ଅଧିକାରୀଙ୍କୁ ମୋଟାଅଙ୍କର ପିସି ଦେଇ ଏହା ଚାଲିଆସୁଛି । ଏତଦ୍ ବ୍ୟତୀତ ଏସବୁ ବିଦ୍ୟାଳୟ ଓ  ହଷ୍ଟେଲରେ ବ୍ୟବହାର ପାଇଁ ସ୍ଥାନୀୟ ଆବଶ୍ୟକତାର ସୁପାରିଶରେ ସେଣ୍ଟ୍ରାଲି ପରଚେଜ୍ ଆଳରେ ବଜାରଦରଠାରୁ ଯଥେଷ୍ଟ ନିମ୍ନମାନର ଖଟ , ବିଛଣା , ଉପକରଣ , ଜୋତା , ପୋଷାକପତ୍ର , ଲିଖନପଠନ ସାମଗ୍ରୀ , ଖାଦ୍ୟପେୟ ଓ ଖର୍ଚ୍ଚରୁ ପରିମାଣ ଏବଂ ମୂଲ୍ୟରେ ହେରଫେର କରାଯାଉଛି । ଅଧିକାଂଶ ସ୍କୁଲ୍ ର ପ୍ରଧାନସେବକ , ସେବକ / ସେବିକା , କର୍ମଚାରୀ ଛୁଟି ଆଳରେ ପଳାଉଛନ୍ତି ବା ବିନାଛୁଟିରେ ବା ମିଟିଂ ଆଳରେ ମିଛକହି ଓ ପ୍ରାୟତଃ ଶନିବାର ଓ ରବିବାର ଘରକୁ ପଳାଉଥିବା ଦେଖାଯାଇଛି । 

କେତେକ ସେବାଶ୍ରମସ୍କୁଲ୍ ଓ ଆଶ୍ରମସ୍କୁଲରେ ପ୍ରଧାନସେବକ, ଶିକ୍ଷକ / ଶିକ୍ଷୟିତ୍ରୀ , ସିସିଏ ଓ ଅନ୍ୟାନ୍ୟ କର୍ମଚାରୀଙ୍କ ନିଯୁକ୍ତି ଓ ବଦଳିରେ ଜିଲ୍ଲା ଅଫିସ୍ ଓ ଅଧିକାରୀଙ୍କ ମନମାନୀ ତଥା ପକ୍ଷପାତିତାର ଅଭିଯୋଗ ଉଠୁଛି ।  ବିଶେଷକରି ତୁରେକେଲା ସେବାଶ୍ରମସ୍କୁଲ୍ ରେ ଜିଲ୍ଲାରେ ବରିଷ୍ଠ ପ୍ରଧାନଶିକ୍ଷକ ରହିଥିବା ସ୍ଥଳେ ଜଣେ ପୂର୍ବରୁ ସିସିଏରୁ ପଦୋନ୍ନତି ପାଇଥିବା ଜୁନିୟର ଶିକ୍ଷକ ଗୋପାଳ ଧରୁଆଙ୍କୁ କାହିଁକି ଭାରପ୍ରାପ୍ତ ପ୍ରଧାନସେବକ ଭାବରେ ଅବସ୍ଥାପିତ  କରି ରଖାଯାଇଛି , ଏହାର ଉତ୍ତର ଜିଲ୍ଲା ଅଫିସ୍ ଓ ଡି ଡବ୍ଲୁ ଓ ଅଲେଖ ବିଶ୍ବାଳଙ୍କୁ ଜଣା ବୋଲି ବିଭାଗରେ କଥା ପଡିଛି । ସେହିପରି ଏହି ସେବାଶ୍ରମସ୍କୁଲ୍ ପରିସରରେ ସେଠାରେ ଦୀର୍ଘ ପ୍ରାୟ ପନ୍ଦରବର୍ଷ ଧରି ରହି ଅବସର ଗ୍ରହଣ କଲାପରେ ଘରଦ୍ବାର କଲାପରି ରହିଆସୁଥିବା ପୂର୍ବତନ ପ୍ରଧାନସେବିକା ସପରିବାର ରହୁଛନ୍ତି । ସ୍କୁଲ୍ କମିଟିର ସଭାପତି ମଦପିଇ ପ୍ରାୟତଃ ସ୍କୁଲ୍ ଓ ହଷ୍ଟେଲରେ ବୁଲୁଥିବା ଦେଖାଯାଉଛି । ତାଙ୍କୁ ଟଙ୍କା ଦେଇ ମଦପିଆଇ ଉକ୍ତ ଭାରପ୍ରାପ୍ତ ପ୍ରଧାନସେବକ ନିଜର ଦୁର୍ନୀତିର ସୁରକ୍ଷା ଢାଲ୍ କରି ରଖିଥିବା ଚର୍ଚ୍ଚା ଶୁଣିବାକୁ ମିଳୁଛି । ତେବେ କେବଳ ଏହି ଗୋଟିଏ ସ୍କୁଲ୍ ବା ହଷ୍ଟେଲ ନୁହେଁ , ଜିଲ୍ଲାର ବିଭିନ୍ନ ସ୍କୁଲ୍ ରେ ଏତାଦୃଶ ଅବ୍ୟବସ୍ଥା ଓ ଅନିୟମିତତା ବୃଦ୍ଧି ପାଇଛି । ପିଲାମାନଙ୍କ ମେସ୍ ଖର୍ଚ୍ଚରୁ ପ୍ରତିମାସ ସର୍ବତ୍ର ବିପୁଳ ବାଟମାରଣା ଅବ୍ୟାହତ ରହିଛି ।  ପ୍ରତିମାସର ଛାତ୍ରଛାତ୍ରୀଙ୍କ ଉପସ୍ଥାନରେ ହେରଫେର କରାଯାଇ ଆସୁଛି । ଜିଲ୍ଲାପାଳ ଏହା ସତ୍ତ୍ୱେ ଏଥିପ୍ରତି ଦୃଷ୍ଟି ଦେଉ ନଥିବା ଆଶ୍ଚର୍ଯ୍ୟର କଥା ବୋଲି ଲୋକେ କୁହାକୁହି ହେଉଛନ୍ତି ।