14-Oct-2020

ବଲାଙ୍ଗିର, (ସନ୍ତୋଷ ଠାକୁର): ନିକଟରେ ସର୍ବଭାରତୀୟ ସ୍ତରରେ ଅନୁଷ୍ଠିତ ହୋଇଥିବା କମନ ଲ ଏଡ୍‌ମିସନ ଟେଷ୍ଟ(କ୍ଲାଟ୍‌)ରେ ବଲାଙ୍ଗୀରର ଛାତ୍ର ହ୍ରିତିକ ଷଡଙ୍ଗୀ ସଫଳତା ହାସଲ କରି ଜିଲ୍ଲା ପାଇଁ ଗୌରବ ଆଣି ଦେଇଛନ୍ତି । ହ୍ରିତିକ କ୍ଲାଟ୍ ପରୀକ୍ଷାରେ ସର୍ବଭାରତୀୟ ସ୍ତରରେ ୨୮ଠ ନମ୍ବର ରେଙ୍କ୍‌ରେ ରହିଥିବା ବେଳେ ଓଡିଶାରେ ୩ନମ୍ବର ରେଙ୍କ୍‌ରେ ରହିଛନ୍ତି । ହ୍ରିତିକ ଛୋଟ ସମୟରୁ ଜଣେ ମେଧାବୀ ଛାତ୍ର ଭାବରେ ଜଣାଶୁଣା ଥିଲେ । ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ସେ ବଲାଙ୍ଗୀର ଲିଟିଲ ଫ୍ଲାୱାର ସ୍କୁଲରେ ଅଧ୍ୟୟନ କରି ସବୁବେଳେ ଟପ୍ପର ରହି ଆସୁଥିଲେ । କ୍ଲାଟ୍ ପରୀକ୍ଷାରେ ଉତ୍ତିର୍ଣ୍ଣ ହେବା ପୂର୍ବରୁ ହ୍ରିତିକ ବନାରସ ହିନ୍ଦୁ ବିଶ୍ୱବିଦ୍ୟାଳୟ ପକ୍ଷରୁ ଅନୁଷ୍ଠିତ ସର୍ବଭାରତୀୟ ପରୀକ୍ଷାରେ ୫ଠତମ ସ୍ଥାନରେ ରହି ନିଜର ସ୍ୱକୀୟ ପ୍ରତିଭାର ପରିଚୟ ଦେଇଥିଲେ ।  ହ୍ରିତିକ ଭିଲାଇ ଦିଲ୍ଲୀ ପବ୍ଲିକ ସ୍କୁଲରେ ଯୁକ୍ତ ୨ ଶିକ୍ଷା ସମାପ୍ତ କରି କ୍ଲାଟ ପରୀକ୍ଷା ପାଇଁ ନିଜକୁ ପ୍ରସ୍ତୁତ କରିଥିଲେ । ଏବେ କ୍ଲାଟ ପରୀକ୍ଷାରେ ସଫଳାତାର ସହ ଉତ୍ତୀର୍ଣ୍ଣ ହେବା ଖବର ପାଇବା ପରେ ଷଡଙ୍ଗୀ ପରିବାର ମଧ୍ୟରେ ଖୁସିର ମାହୋଲ ଦେଖାଯାଇଛି । ବଲାଙ୍ଗୀରରେ ଏଲ୍‌ଆଇସି ଅଫିସରେ ସିନିୟର ଇନସ୍ୟୁରେନ୍ସ ଏଡ୍‌ଭାଇଜର ଭାବେ କାମ କରୁଥିବା ସୁଶାନ୍ତ ଷଡଙ୍ଗୀ ଓ ଗୃହିଣୀ ତୃପ୍ତିମୟୀ ଷଡଙ୍ଗୀଙ୍କ ଏକମାତ୍ର ପୁତ୍ର ହେଉଛନ୍ତି ହ୍ରିତିକ । ହ୍ରିତିକ ବର୍ତ୍ତମାନ ରାଜସ୍ଥାନର ଯୋଧପୁର ଜାତୀୟ ଆଇନ ମହାବିଦ୍ୟାଳୟରେ ନାମ ଲେଖାଇ ସାରିଛନ୍ତି ।  ହ୍ରିତିକଙ୍କ ଏହି ସଫଳତା ପାଇଁ ବିଭିନ୍ନ ମହଲରୁ ତାଙ୍କୁ  ଶୁଭେଚ୍ଛା ଓ ଉଜ୍ୱଳ ଭବିଷ୍ୟତ କାମନା କରାଯାଇଛି ।