14-Nov-2026

ବରପାଲି:(ସୁଦାମ ଦୀପ)ବରଗଡ଼ ଜିଲ୍ଲା ବରପାଲି ବ୍ଲକ ଅନ୍ତର୍ଗତ ରେମତା ଗ୍ରାମର ସଚେତନ ନାଗରିକମାନେ ଏକତ୍ରିତ ହୋଇ ମଦ ବିକ୍ରି ବନ୍ଦ ପାଇଁ ବରପାଲି ଥାନାରେ ଦାବୀପତ୍ର ଦେଇଛନ୍ତି।
ଲିଖିତ ଦାବୀପତ୍ରରେ ସେମାନେ ଜଣାଇଛନ୍ତି, ଗାଁରେ ବେଆଇନ ମଦ ବିକ୍ରି ଯୋଗୁଁ ନାହିଁ ନଥିବା ଅପ୍ରୀତିକର ପରିସ୍ଥିତି ସୃଷ୍ଟି ହେଉଛି। ସ୍କୁଲପିଲା ଓ ମହିଳାମାନେ ବିଭିନ୍ନ ଅସୁବିଧାର ସମ୍ମୁଖୀନ ହେଉଛନ୍ତି। ରାସ୍ତାରେ ମଦୁଆମାନଙ୍କ ଗାଳିଗୁଲଜ, ଝଗଡ଼ା ଓ ଅଶାଳୀନ ବ୍ୟବହାର ଯୋଗୁଁ ଗାଁର ଶାନ୍ତି ଭଙ୍ଗ ହେଉଛି।
ବିଷାକ୍ତ ମଦ ଯୋଗୁଁ ମଦୁଆମାନଙ୍କ ମୃତ୍ୟୁ ଘଟୁଥିବାରୁ ଫଳରେ ସେମାନଙ୍କ ଛୁଆପିଲା ବେସାହାରା ହୋଇଯାଇଛନ୍ତି। ଅନେକ ପରିବାର ଭାଙ୍ଗି ଯାଉଛି, ଅର୍ଥିକ କ୍ଷତି ହେଉଛି। ଏଣୁ ଗାଁରେ ତୁରନ୍ତ ମଦ ବିକ୍ରି ବନ୍ଦ କରିବାକୁ ସେମାନେ ଦାବୀ କରିଛନ୍ତି।
ଗ୍ରାମର ଅନେକ ମହିଳା, ପୁରୁଷ, ୱାର୍ଡ ସଭ୍ୟ ସଭ୍ୟା ଓ ସକ୍ରିୟ ରାଜନୀତିରେ ଦଖଲ ଥିବା ବ୍ୟକ୍ତି ବିଶେଷ ମଧ୍ୟ ବରପାଲି ଥାନା ଦ୍ୱାରସ୍ଥ ହୋଇଥିଲେ। ସେମାନଙ୍କ ମଧ୍ୟରେ ସମିତି ସଭ୍ୟା ବିଜୟଲକ୍ଷ୍ମୀ ବେହେରା, ବିଜେପି ନେତା ଧିରୋଜ ପ୍ରଧାନ, ପାର୍ବତୀ ସା, ହେମକାନ୍ତି ଭୁଏ, ସନ୍ତୋଷିନି ସାହୁ ପ୍ରମୁଖ ଉପସ୍ଥିତ ଥିଲେ।
ଥାନା ପକ୍ଷରୁ ଏ ନେଇ ତଦନ୍ତ କରି କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦିଆଯାଇଥିବା ଜଣାପଡ଼ିଛି।