30-Sep-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ସଦର ବ୍ଲକ ଅନ୍ତର୍ଗତ କୁଟୁମଡୋଳା ପଞ୍ଚାୟତର କୁଟୁମଡୋଳା ଗ୍ରାମ ତଳିପଡ଼ାର ଗୁପ୍ତେଶ୍ୱର କୀର୍ତ୍ତନ ମଣ୍ଡଳୀ ପକ୍ଷରୁ ବୃନ୍ଦାବନ ଧାମ ଦର୍ଶନ ଓ ଧାର୍ମିକ ଯାତ୍ରା ଆୟୋଜିତ ହୋଇଥିଲା।ମଣ୍ଡଳୀର ଗୁରୁ ଶ୍ରୀ ଦିଲ୍ଲୀପ କୁମାର ପାଣ୍ଡିଆଙ୍କ ତତ୍ତ୍ୱାବଧାନରେ କୀର୍ତ୍ତନ ମଣ୍ଡଳୀର ସଦସ୍ୟ ଓ କୀର୍ତ୍ତନପ୍ରେମୀଙ୍କୁ ମିଶାଇ ମୋଟ ୬୮ ଜଣ ଏହି

ଧାର୍ମିକ ଯାତ୍ରାରେ ସାମିଲ ହୋଇଥିଲେ।
ଗତ ସେପ୍ଟେମ୍ବର ୧୯ ତାରିଖରେ ଯାତ୍ରା ଆରମ୍ଭ କରିଥିବା ଭକ୍ତମାନେ ବୃନ୍ଦାବନ ଧାମରେ ପହଞ୍ଚି ସଂକୀର୍ତ୍ତନ ମାଧ୍ୟମରେ ପଞ୍ଚକୋଶୀ ପରିକ୍ରମା କରିଥିଲେ।ଏହାସହ ଶ୍ରୀ ରାଧାରାଣୀ, ଶ୍ରୀ ବାଙ୍କେବିହାରୀଙ୍କ ସମେତ ବୃନ୍ଦାବନର ବିଭିନ୍ନ ପ୍ରସିଦ୍ଧ ମନ୍ଦିର ଦର୍ଶନ କରି ଭଗବାନଙ୍କ କୃପା ଲାଭ କରିଥିଲେ।
ଏହି ଧାର୍ମିକ ଯାତ୍ରା ଭକ୍ତମାନଙ୍କ ମନରେ ଆନନ୍ଦ,ତୃପ୍ତି ଓ ଆଧ୍ୟାତ୍ମିକ ଶାନ୍ତି ଭରିଦେଇଥିଲା।ପ୍ରଭୁଙ୍କ ଦର୍ଶନ ଓ ସଂକୀର୍ତ୍ତନ ମାଧ୍ୟମରେ ଭକ୍ତମାନଙ୍କ ମନରେ ଭକ୍ତିଭାବ

ଆହୁରି ଜାଗ୍ରତ ହୋଇଥିବା ପ୍ରକାଶ ପାଇଛି ।
ଦୀର୍ଘ ଧାର୍ମିକ ଯାତ୍ରା ପରେ ସେପ୍ଟେମ୍ବର ୨୭ ତାରିଖରେ ମଣ୍ଡଳୀର ସମସ୍ତ ସଦସ୍ୟ ନିଜ ଗ୍ରାମ କୁଟୁମଡୋଳାକୁ ପ୍ରତ୍ୟାବର୍ତ୍ତନ କରିଥିଲେ। ଗ୍ରାମରେ ପହଞ୍ଚିବା ପରେ ନଗର ଭ୍ରମଣ କରିବା ସହ ଗୁପ୍ତେଶ୍ୱର ଶିବ ମନ୍ଦିର ଓ ଶ୍ରୀ ଜଗନ୍ନାଥ ମନ୍ଦିର ଦର୍ଶନ କରିଥିଲେ। ଏହାପରେ ଧାର୍ମିକ ଭାବାବେଗ ଓ ଆନନ୍ଦମୟ ପରିବେଶ ମଧ୍ୟରେ ଯାତ୍ରାର ସମାପ୍ତି ଘଟିଥିଲା।