20-Sep-2026

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ଜିଲ୍ଲାର ଦେଓଗାଁ ସିଏଚସିକୁ ଉପଖଣ୍ଡସ୍ତରୀୟ ଡାକ୍ତରଖାନା ମାନ୍ୟତା ଦେଇ ଏକ ନୂତନ ବିଲଡିଂ ପାଇଁ ସ୍ୱାସ୍ଥ୍ୟମନ୍ତ୍ରୀଙ୍କ ପାଖରେ ଦାବି ହୋଇଛି । ଦେଓଗାଁ ବ୍ଲକଅଞ୍ଚଳବାସୀଙ୍କ ପକ୍ଷରୁ ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ ସ୍ୱାସ୍ଥ୍ୟମନ୍ତ୍ରୀଙ୍କୁ ଲେଖିଥିବା ଚିଠିକୁ ନେଇ ଆଜି ପୂର୍ବତନ ବ୍ଲକଅଧ୍ୟକ୍ଷ ଲକ୍ଷ୍ମଣ କୁମାର ମେହେର ପ୍ରଦାନ କରିଛନ୍ତି । ସ୍ୱାସ୍ଥ୍ୟମନ୍ତ୍ରୀ ଡ.ମୁକେଶ ମହାଲିଙ୍ଗଙ୍କ ନଅଗାଁସ୍ଥିତ କାର୍ଯ୍ୟାଳୟରେ ଭେଟି ଆଲୋଚନା କରିବା ସହିତ ନୂତନ ସିଏଚସି ବିଲଡିଂ ନିର୍ମାଣ ପାଇଁ ଦୃଢଦାବି ରଖିଛନ୍ତି । ଦେଓଗାଁ ସିଏଚସି ଉପରେ କେବଳ ଦେଓଗାଁ ନୁହେଁ ବରଂ ଗୁଡଭେଲା,କଳାହାଣ୍ଡି ଜିଲ୍ଲାର କର୍ଲାମୁଣ୍ଡା ବ୍ଲକଅଞ୍ଚଳର ଲୋକ ମଧ୍ୟ ନିର୍ଭର କରୁଥିବା କୁହାଯାଇଛି । ବିଧାୟକ କଳିକେଶ ଦେଇଥିବା ଚିଠିରେ ଦେଓଗାଁ ବ୍ଲକଅଞ୍ଚଳର ଲୋକଙ୍କ ସ୍ୱାସ୍ଥ୍ୟସମସ୍ୟାକୁ ନେଇ ଉଦବେଗ ପ୍ରକାଶ କରାଯାଇଛି । ବିଧାୟକ ଲେଖିଛନ୍ତି ଯେ,ଦେଓଗାଁ ସିଏଚସି ଗତ ୧୯୬୨ ମସିହାରେ ନିର୍ମାଣ ହୋଇଥିଲା । ଏବେ ଏହାର ବିଲଡିଂଗୁଡିକ ପୁରାତନ ହୋଇ ଖରାପ ଅବସ୍ଥାରେ ରହିଛି । ଏହି ଡାକ୍ତରଖାନାରେ ପ୍ରତିଦିନ ୩୦୦ରୁ ଅଧିକ ରୋଗୀ ଚିକିତ୍ସିତ ହେଉଛନ୍ତି । ତେଣୁକରି ବଲାଙ୍ଗୀର ଜିଲ୍ଲା ମୁଖ୍ୟ ଚିକିତ୍ସାଅଧିକାରୀ ତଥା ଜନସ୍ୱାସ୍ଥ୍ୟ ଅଧିକାରୀ ଗତ ଅଗଷ୍ଟ ୩୧ ତାରିଖରେ ଏକ ନୂଆଁ ବିଲଡିଂ ନିର୍ମାଣ ପାଇଁ ରାଜ୍ୟସରକାରଙ୍କ ସ୍ୱାସ୍ଥ୍ୟବିଭାଗକୁ ପ୍ରସ୍ତାବ ପଠାଇଛନ୍ତି । ଏଥିପାଇଁ ଆବଶ୍ୟକ ଜମି ଦେଓଗାଁ ତହସିଲଦାର ଚିହ୍ନଟକରି ଦେଇସାରିଥିବା ବେଳେ ବିଲଡିଂ ନିର୍ମାଣ ପାଇଁ ଆବଶ୍ୟକ ୨୩କୋଟି ୧୪ଲକ୍ଷ ଟଙ୍କାର ଏପ ଡିପିଆର ସିଡିଏମଓ ତଥା ଜନସ୍ୱାସ୍ଥ୍ୟଅଧିକାରୀ ପଠାଇଛନ୍ତି । ତେଣୁ ଏହି ପ୍ରସ୍ତାବକୁ ଅନୁମୋଦନ କରି ଆବଶ୍ୟକ ଅର୍ଥ ମଞ୍ଜୁର କରିବାକୁ ସ୍ୱାସ୍ଥ୍ୟମନ୍ତ୍ରୀଙ୍କୁ ବିଧାୟକ ଚିଠି କରିଛନ୍ତି । ଆଜି ମନ୍ତ୍ରୀଙ୍କ ସହିତ ଆଲୋଚନା କାଳରେ ଦେଓଗାଁ ବ୍ଲକଅଞ୍ଚଳର ଅଜୁନପୁର ପିଏଚସିକୁ ଏକ ଆମ୍ବୁଲାନ୍ସ ଯୋଗାଇଦେବା,ବନ୍ଧପଡା ପିଏଚସିକୁ ଦିନରାତି ଖୋଲାଯିବା, ଗୌରଗୋଠ ଓ କରୁଆଁଝର ଆୟୁର୍ବେଦ ଡାକ୍ତରଖାନାରେ ଡାକ୍ତର ନିଯୁକ୍ତି କରିବା ତଥା ଦେଓଗାଁ ସିଏଚସିକୁ ଉପଖଣ୍ଡସ୍ତରୀୟ ମାନ୍ୟତା ପ୍ରଦାନ କରାଯିବାକୁ ମନ୍ତ୍ରୀଙ୍କ ପାଖରେ ପୂର୍ବବ୍ଲକ ଅଧ୍ୟକ୍ଷ ଲକ୍ଷ୍ମଣକୁମାର ମେହେର ଦୃଢଦାବି ରଖିଛନ୍ତି ।