30-Jun-2026

ବରପାଲି :(ସୁଦାମ ଦୀପ)ବରଗଡ଼ ଜିଲ୍ଲା ବରପାଲି ବ୍ଲକ ଅନ୍ତର୍ଗତ ସତଲମା ଉଚ୍ଚ ବିଦ୍ୟାଳୟ ପରିସରରେ ଅବସରକାଳୀନ ସମ୍ବର୍ଦ୍ଧନା ସମାରୋହ ଅନୁଷ୍ଠିତ ହୋଇଯାଇଛି। ବିଦ୍ୟାଳୟର ପ୍ରଧାନ ଶିକ୍ଷକ ଭବାନୀଶଙ୍କର ଗଡ଼ତିଆଙ୍କ ସଭାପତିତ୍ୱରେ ଆୟୋଜିତ ଏହି ସମାରୋହରେ ଶିକ୍ଷକ, ପୂର୍ବତନ ଛାତ୍ରଛାତ୍ରୀ, ଅଭିଭାବକ ଓ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।କାର୍ଯ୍ୟକ୍ରମରେ ଜିଲ୍ଲା ପରିଷଦ ସଭ୍ୟା ସଂଯୁକ୍ତା ସାହୁ, ବିଦ୍ୟାଳୟ ପରିଚାଳନା କମିଟିର ଚେୟାରମ୍ୟାନ ରୀନା ଡୁଙ୍ଗୁରି, ଆଲୁମିନି କମିଟିର ସଭାପତି ଡ଼. ଘନଶ୍ୟାମ ପାଣିଗ୍ରାହୀ, ପୂର୍ବତନ ଶିକ୍ଷକ ରଘୁନାଥ ବିଶି, ଫଗୁନୁ ଚାଉଁର, ଭିକାରୀ ପଧାନ, ଗଙ୍ଗାଧର ସାହୁ, ମକରନ୍ଦ ସାହୁ, ସମିତିସଭ୍ୟା ଶାନ୍ତି ନାଏକ ଓ ଗ୍ରାମର ସଂଜୀବ ପଣ୍ଡା, ଚଞ୍ଚଳ ପଧାନ ପ୍ରମୁଖ ଅତିଥି ଭାବେ ଯୋଗଦେଇ ଶିକ୍ଷକମାନଙ୍କ ନିଷ୍ଠାପୂର୍ଣ୍ଣ ସେବାର ଉଚ୍ଚ ପ୍ରଶଂସା କରିଥିଲେ। ସେମାନେ କହିଥିଲେ, ଜଣେ ଶିକ୍ଷକ କେବଳ ପାଠ ପଢ଼ାନ୍ତି ନୁହେଁ, ବରଂ ସମାଜ ଗଠନର ମୂଳଦୁଆ ସୃଷ୍ଟି କରନ୍ତି।ଅବସର ଗ୍ରହଣ କରୁଥିବା ପୂର୍ବତନ ପ୍ରଧାନ ଶିକ୍ଷକ ଡୋଳାମାଣି ପଟେଲ ବିଦାୟୀ ଅଭିଭାଷଣରେ ଭାବବିହ୍ୱଳ ହୋଇପଡ଼ିଥିଲେ। ସେ କହିଥିଲେ ଯେ, ୧୯୯୦ ମସିହାରେ ସତଲମା ଉଚ୍ଚ ବିଦ୍ୟାଳୟରୁ ହିଁ ତାଙ୍କ ଶିକ୍ଷକତା ଜୀବନର ଆରମ୍ଭ ହୋଇଥିଲା। ଦୀର୍ଘ ବର୍ଷର କାର୍ଯ୍ୟକାଳ ମଧ୍ୟରେ ବିଦ୍ୟାଳୟ, ଛାତ୍ରଛାତ୍ରୀ ଓ ସହକର୍ମୀଙ୍କ ସହ ତାଙ୍କର ଅନେକ ସ୍ମୃତି ଜଡ଼ି ରହିଛି ବୋଲି ସେ ପ୍ରକାଶ କରିଥିଲେ।ଅନ୍ୟ ଅବସରପ୍ରାପ୍ତ ଶିକ୍ଷକ ଜୟନ୍ତ କୁମାର ଦର୍ଜୀ ମଧ୍ୟ ବିଦାୟ ବେଳାରେ ନିଜର ଦୀର୍ଘ ଶିକ୍ଷକତା ଜୀବନର ବିଭିନ୍ନ ଅନୁଭୂତି ଓ ପୁରୁଣା ସ୍ମୃତିକୁ ସମସ୍ତଙ୍କ ସହ ବାଣ୍ଟିଥିଲେ। ଉଭୟ ଶିକ୍ଷକଙ୍କ ଅବଦାନକୁ ସ୍ମରଣ କରି ସେମାନଙ୍କୁ ଉତ୍ତରୀୟ, ପୁଷ୍ପଗୁଚ୍ଛ, ମାନପତ୍ର ଓ ସ୍ମାରକ ପ୍ରଦାନ କରି ସମ୍ବର୍ଦ୍ଧିତ କରାଯାଇଥିଲା। ଆଜିର କାର୍ଯ୍ୟକ୍ରମ କୁ ହିନ୍ଦୀ ଶିକ୍ଷକ ପ୍ରଦୀପ କୁମାର ଷଡ଼ଙ୍ଗୀ, ପରିଚାଳନା କରିଥିବାବେଳେ ବିଜ୍ଞାନ ଶିକ୍ଷୟତ୍ରୀ ସରିତା ସାହୁ ଧନ୍ୟବାଦ ଅର୍ପଣ କରିଥିଲେ l