21-Jun-2026

ନବରଙ୍ଗପୁର :(ପ୍ରିୟଦର୍ଶିନୀ ପାତ୍ର)
-ପାପଡ଼ା ହାଣ୍ଡି ବ୍ଲକ ଅନ୍ତର୍ଗତ ନାକଟିଗୁଡ଼ା ଗ୍ରାମ ପଞ୍ଚାୟତର ଶ୍ରୀମତୀ ଶୁକଳ ଭତ୍ରା ଜଣେ ବିଧବା ଓ ଭିନ୍ନକ୍ଷମ ମହିଳା। ସ୍ୱାମୀଙ୍କ ମୃତ୍ୟୁ ପରେ ସେ ଅତ୍ୟନ୍ତ ଦୟନୀୟ ପରିସ୍ଥିତିରେ ଜୀବନ ବିତାଉଛନ୍ତି। ଚାଲିବାରେ ଅସମର୍ଥ ହୋଇଥିବାରୁ ସେ ନିଜର ଦୈନନ୍ଦିନ ଜୀବନ ମଧ୍ୟ ସ୍ୱାବଳମ୍ବୀ ଭାବେ ଚଳାଇ ପାରୁନାହାନ୍ତି। ପଡ଼ୋଶୀ ମାନଙ୍କ ସହଯୋଗରେ ପ୍ରତିଦିନ ଖାଦ୍ୟ ପାଇ ତାଙ୍କର ଜୀବନ କଷ୍ଟେମଷ୍ଟେ ଚାଲିଛି।ତାଙ୍କର ୧୦ ବର୍ଷ ବୟସର ଝିଅ ଚତୁର୍ଥ ଶ୍ରେଣୀରେ ପାଠ ପଢ଼ୁଛି। କିନ୍ତୁ ମା'ଙ୍କ ଭିନ୍ନକ୍ଷମତା କାରଣରୁ ଝିଅର ଆଧାର କାର୍ଡ ମଧ୍ୟ ଏପର୍ଯ୍ୟନ୍ତ ହୋଇ ପାରିନାହିଁ।

ଏହା ଫଳରେ ସରକାରୀ ଯୋଜନାର ସୁବିଧା ପାଇବାରେ ମଧ୍ୟ ସମସ୍ୟା ସୃଷ୍ଟି ହେଉଛି।ସ୍ଥାନୀୟ ମା' ସମୂହର ସଦସ୍ୟା ପ୍ରମିଳା ଭତ୍ରା, ରୁକ୍ମଣୀ ମାଝୀ, ପୁଷ୍ପା ମାଝୀ, ରତନା ମାଝୀ, ବଇଦି ମାଝୀ ଓ କୁମାରୀ ମାଝୀ ପ୍ରଶାସନଙ୍କୁ ନିବେଦନ କରିଛନ୍ତି ଯେ, ଶ୍ରୀମତୀ ଶୁକଳ ଭତ୍ରାଙ୍କୁ ଯଥାଶୀଘ୍ର ରାସନ (ଚାଉଳ) କାର୍ଡ, ବିଧବା ଭତ୍ତା, ଭିନ୍ନକ୍ଷମ ଭତ୍ତା ପ୍ରଦାନ କରାଯାଉ ଏବଂ ତାଙ୍କ ଝିଅର ଆଧାର କାର୍ଡ କରାଇବା ପାଇଁ ସମ୍ପୃକ୍ତ ବିଭାଗ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରନ୍ତୁ। ମାନବିକତା ଦୃଷ୍ଟିରୁ ଏହି ପରିବାର ପ୍ରତି ଜିଲ୍ଲା ଓ ବ୍ଲକ ପ୍ରଶାସନ ତୁରନ୍ତ ଦୃଷ୍ଟି ଦେଇ ଆବଶ୍ୟକ ସରକାରୀ ସହାୟତା ପ୍ରଦାନ କରିବେ ବୋଲି ସ୍ଥାନୀୟ ଲୋକମାନେ ଆଶା ପ୍ରକାଶ କରିଛନ୍ତି।