20-Jan-2026

ବଲାଙ୍ଗିର(ଦେବାଶିଷ ବହିଦାର): ୨୩ତମ ବଲାଙ୍ଗିର ଲୋକଉତ୍ସବର  ଆଜି ହେଉଛି ଦ୍ବିତୀୟ ଦିବସ l କଳା ସଂସ୍କୃତିର ମହାମିଳନ ବଲାଙ୍ଗୀର ଲୋକ ଉତ୍ସବର ଦ୍ଵିତୀୟ ଦିବସରେ ମଧ୍ଯ  କୋଶଳ କଳା ମଣ୍ଡପ ପଡିଆରେ କଳାକାର, ସଂସ୍କୃତିପ୍ରେମୀ ଓ  ଲୋକକଳା ଗବେଷକ ମାନଙ୍କ ବହୁ ସଂଖ୍ୟାରେ ଭିଡ ଜମିଥିଲା l ଦିନ ବେଳା ପୁରୁଣା ମଞ୍ଚ ଠାରେ ସମ୍ପାନ୍ କମିଟି ତରଫରୁ ବଲାଙ୍ଗୀରର କଳା, ସାହିତ୍ୟ ଓ ସଂସ୍କୃତି ସମ୍ପର୍କିତ ଏକ ସାରଗର୍ଭକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା l ବଲାଙ୍ଗୀର ଉପଜିଲ୍ଲାପାଳ ଆଲୋକ କୁମାର ପଟେଲଙ୍କ ସଭାପତିତ୍ବରେ ଆୟୋଜିତ ଲୋକଉତ୍ସବର ଦ୍ଵିତୀୟ ସନ୍ଧ୍ୟାରେ ମୁଖ୍ୟ ଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷା ଶ୍ରୀମତୀ ଦେବକୀ ସାହୁ ଉପସ୍ଥିତି ରହି  ଦୀପ ପ୍ରଜ୍ବଳନ ପୂର୍ବକ ସଭାକୁ ଶୁଭ ଉଦ୍ଘାଟନ କରିଥିଲେ । ମୁଖ୍ୟ ଅତିଥି ନିଜ ଅଭିଭାଷଣରେ କୋଶଳ କଳାମଣ୍ଡଳ ପଡିଆର ଉନ୍ନତି ଓ ସୌନ୍ଦର୍ଯ୍ୟକରଣ ପାଇଁ ଆମ ସରକାର ପ୍ରତିଶ୍ରୁତିବଦ୍ଧ ବୋଲି କହିଥିଲେ l କଳା, ସାହିତ୍ୟ ଓ ସଂସ୍କୃତି ବିଭବରେ ପରିପୂର୍ଣ୍ଣ ବଲାଙ୍ଗୀରରେ ଏକ ମଲ୍ଟି ପରପୋଜ୍ ଲାଇବ୍ରେରୀ ସ୍ଥାପନ କରାଯିବାର ପ୍ରସ୍ତାବ ଦେଇଥିଲେ ଶ୍ରୀମତୀ ଦେବକୀ ସାହୁ l  ସମ୍ମାନିତ ଅତିଥି ଭାବେ ବଲାଙ୍ଗୀର ମୁନିସିପାଲିଟି ପୌରାଧ୍ୟକ୍ଷା  ଶ୍ରୀମତୀ ଲିକା ସାହୁ ମଞ୍ଚାସୀନ ରହି ଆମ ବଲାଙ୍ଗିର ବୀରଙ୍କ ମାଟି, ଏଠାକାର  ଐତିହ ଯେପରି ଅନନ୍ୟ ଆମ କଳାସଂସ୍କୃତି ମଧ୍ୟ ଅନନ୍ୟ । ଏହି ମାଟିର ମହାନୀୟତା ସମ୍ପର୍କରେ ପୌରାଧ୍ୟକ୍ଷା  ଶ୍ରୀମତୀ ସାହୁ ଆଲୋକପାତ କରିଥିଲେ l ଆମର ଇତିହାସ ଓ ପରମ୍ପରା ସହ ନୂଆ ପିଢ଼ି କୁ ଯୋଡ଼ିବାକୁ ହେବ ବୋଲି ସେ କହି ଥିଲେ। ଅନ୍ୟତମ ବରେଣ୍ୟ ଅତିଥି ଭାବରେ ଟିଟିଲାଗଡ଼ ଉପଜିଲ୍ଲାପାଳ ପଦ୍ମନାଭ ସାମନ୍ତରାୟ,ପାଟଣାଗଡ଼  ଉପଜିଲ୍ଲାପାଳ ସୁନୀଲ ମେହେରଙ୍କ ସମେତ ମଞ୍ଚ କମିଟିର ସହ ଅଧ୍ୟକ୍ଷ  କିଶୋର ଜାଲ ମଞ୍ଚାସୀନ ଥିଲେ

ଅତିଥି କଳାକାର ଭାବରେ ସଂସ୍କୃତି ଗବେଷକ ତଥା ସାମ୍ବାଦିକ ରାଜୀବ ସଗରିଆଙ୍କୁ ଲୋକ ଉତ୍ସବ ସମିତି ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା 
ବରିଷ୍ଠ କଳାକାର ବିଘ୍ନରାଜ ଘିବେଲା ମଞ୍ଚାସୀନ ରହି ନିଜର ବକ୍ତବ୍ୟ ଓ କଳାକାର ଜୀବନର ଅନୁଭୂତି କହିଥିଲେ । ପବ୍ଲିସିଟି କମିଟିର ସହ ଅଧ୍ୟକ୍ଷ ଶରତ ଚନ୍ଦ୍ର ମିଶ୍ର ମଞ୍ଚ ପରିଚାଳନା ଓ ଅତିଥି ପରିଚୟ ପ୍ରଦାନ କରିଥିଲେ l ମଞ୍ଚ କମିଟିର ସହଅଧ୍ୟକ୍ଷା ଶ୍ରାବଣୀ ମେହେର ମଞ୍ଚାସୀନ ଥିଲେ।ପବ୍ଲିସିଟି କମିଟିର  ଅନ୍ୟତମ ସହଅଧ୍ୟକ୍ଷ ସାମ୍ବାଦିକ ରିତୁରାଜ ସିଂହ  ଧନ୍ୟବାଦ୍ ଅର୍ପଣ କରିଥିଲେ । ରାଜ୍ଯ ତଥା ରାଜ୍ଯ ବାହାରର ବିଭିନ୍ନ ସାଂସ୍କୃତିକ ଦଳ ଦ୍ବାରା ସାଂସ୍କୃତିକ ଓ ପାରମ୍ପରିକ ନୃତ୍ୟ ଗୀତ କାର୍ଯ୍ୟକ୍ରମ ପରିବେଷିତ ହୋଇଥିଲା ।

  ଏହି ଉତ୍ସବର ଦ୍ଵିତୀୟ ରଜନୀରେ ଗୁଜୁରାଟର ସିଦ୍ଧି ଧମାଲ, ପଞ୍ଜାବର ଭାଙ୍ଗଡା, ଆସାମର ବିହୁ, ପୁରୀ ର ଗୋଟିପୁଅ, ସୁବର୍ଣ୍ଣପୁରର ବଜନିଆଁ, କଳାହାଣ୍ଡିର ଘୁମୁରା, ବଲାଙ୍ଗିରର ସ୍ଥାନୀୟ ସୁର ମନ୍ଦିର, ଲଲିତ ଡାନ୍ସ ଗ୍ରୁପ, ଢୋଲ ମହୁରି କଳାପରିଷଦ, ମହନୀ ନୃତ୍ୟ କଳାପରିଷଦ, ସନଯୋଟ କଳାକେନ୍ଦ୍ର ଗୁଡ଼ିକ ପାରମ୍ପରିକ ନୃତ୍ୟ ପ୍ରଦର୍ଶନ କରିଥିଲେ ।

ଆଜି ସନ୍ଧ୍ୟାରେ କୋଶଳ କଳାମଣ୍ଡଳ ରାସ୍ତାରେ ଲୋକଙ୍କ ଭିଡ ଓ ଗାଡି ମୋଟର ଯୋଗୁଁ ଲୋକେ ଅନେକ ହଇରାଣ ହୋଇ ଥିଲେ l କଳା ମଣ୍ଡଳ ରାସ୍ତାରେ ଥିବା ଦୋକାନ ସାମ୍ନାରେ ଗାଡି ମୋଟର ପର୍କିଙ୍ଗ ଯୋଗୁ ଦୋକାନୀ ମାନଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି l ବିଶେଷ କରି ଏହି ରାସ୍ତାରେ ଥିବା ଏକ ଚାର୍ଟ ଓ ଜଳଖିଆ ଦୋକାନରେ ଲୋକଙ୍କ ପ୍ରବଳ ଭିଡ ଯୋଗୁଁ ରାସ୍ତା ଏକ ପ୍ରକାର ଜାମ୍ ହୋଇଯାଇଥିବା ଦେଖିବାକୁ ମିଳିଥିଲା l ଆଉ ୩ ଦିନ ଧରି ଲୋକ ଉତ୍ସବ ଚାଲିବ l ତେଣୁ ଏହି ଦିନ ମାନଙ୍କରେ ଟ୍ରାଫିକ୍ ସମସ୍ୟାର ସମାଧାନ ଓ ଭିଡ କୁ ନିୟନ୍ତ୍ରଣ କରିବା ଦିଗରେ ପୋଲିସ ତତ୍ପରତା ପ୍ରକାଶ କରିବାକୁ ଜନମତ ପ୍ରକାଶ ପାଇଛି l