15-Dec-2025

ବଲାଙ୍ଗୀର(ପ୍ରେରଣା ଖବର): ଆଜି ସ୍ଥାନୀୟ ହାତଶାଳପଡା ସ୍ଥିତ ଟାଉନ ବାଳକ ହାଇସ୍କୁଲର ଖେଳପଡିଆ ଠାରେ ଟାଉନ ବାଳିକା ଉଚ୍ଚବିଦ୍ୟାଳୟର ୬୭ତମ କ୍ରୀଡାଉତ୍ସବ ଉଦଘାଟିତ ହୋଇ ଯାଇଛି । ଦୁଇଦିନ ଧରି ଏହି ଉତ୍ସବ ଅନୁଷ୍ଠିତ ହେବ । ବଲାଙ୍ଗୀର ଅତିରିକ୍ତ ଜିଲ୍ଲାପାଳ ଡ.ବିଜୟାନନ୍ଦ ସେଠୀ ମୁଖ୍ୟ ଅତିଥି ଭାବରେ ଯୋଗଦେଇ ଏହି କ୍ରୀଡାଉତ୍ସବକୁ ଉଦଘାଟନ କରିଛନ୍ତି । ସ୍କୁଲର ପ୍ରଧାନଶିକ୍ଷକ ନରେନ୍ଦ୍ରନାଥ ମିଶ୍ରଙ୍କ ସଭାପତିତ୍ୱ ଓ ସଂଯୋଜନାରେ ଅନୁଷ୍ଠିତ ଏହି ଉଦଘାଟନୀ କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ଡ.ସେଠୀ, ସମ୍ମାନୀତ ଅତିଥି ଭାବରେ ବିଜେପିର ବରିଷ୍ଠନେତା

ଗୋପାଳଜୀ ପାଣିଗ୍ରାହୀ,ଜିଲ୍ଲା ଶିକ୍ଷାବିଭାଗର କ୍ରୀଡାଅଧିକାରୀ ପ୍ରଦୀପକୁମାର ପାତ୍ର, କ୍ରୀଡାସଂଗଠକ ସୁମିତ କୁମାର ପୁରୋହିତ, ଟାଉନ ବାଳକ ହାଇସ୍କୁଲର ପ୍ରଧାନଶିକ୍ଷକ ଆର୍ଯ୍ୟବାଳା ମିଶ୍ର, ସାମ୍ବାଦିକ ସନ୍ଦୀପ କୁଅଁର, ପୂର୍ଣ୍ଣଚନ୍ଦ୍ର ପଣ୍ଡା, ରଘୁନନ୍ଦନ ସିଂ,ବୀରେନ୍ଦ୍ର ଝାଙ୍କର,ବଳରାମ ମିଶ୍ର, ଚିତ୍ତରଂଜନ ମିଶ୍ର, ଅଞ୍ଜନକୁମାର ପଧାନ, ମୁକେଶ ବହିଦାର ଓ କାର୍ଯକ୍ରମକୁ ପ୍ରାୟୋଜିତ କରିଥିବା ଓଡିଶାଗ୍ରାମୀଣ ବ୍ୟାଙ୍କର ଅଧିକାରୀ ଯୋଗ ଦେଇଥିଲେ । ଛାତ୍ରଛାତ୍ରୀମାନେ କ୍ରୀଡା ମାଧ୍ୟମରେ ଜୀବନକୁ ଶୃଙ୍ଖଳିତ ଓ ଶାରିରୀକ-ମାନସିକ ସ୍ତରରେ ଉନ୍ନତ କରନ୍ତୁ ବୋଲି ଅତିଥିଗଣ ମତବ୍ୟକ୍ତ କରିଥିଲେ। ବଲାଙ୍ଗୀର ମାଟିରୁ ପୂର୍ବରୁ ଆନନ୍ଦିନୀ ଦର୍ଜୀ,ପ୍ରଣତୀ ମିଶ୍ର, ମାଧୁରୀ ମେହେଟା, ରୋଶନାରା ପରବୀନ, ପାୟଲ ନାଗ ଭଳି କ୍ରୀଡାବିଦ ମାନେ ଜାତୀୟ ତଥା ଆନ୍ତର୍ଯ୍ୟାତୀୟ ସ୍ତରରେ ସୁଖ୍ୟାତି ଅର୍ଜନ କରିଛନ୍ତି। ତେଣୁ ଆଗ୍ରହ ରହିଲେ କ୍ରୀଡାବିଦ ହୋଇ ଜୀବନକୁ ସଫଳ କରିହେବ ବୋଲି ବକ୍ତାଗଣ କହି ଥିଲେ । ଏଡିଏମ ଡ.ବିଜୟାନନ୍ଦ ସେଠୀ କ୍ରୀଡାଉତ୍ସବର ପତାକାଉତ୍ତୋଳନ କରିବା ସହିତ କାର୍ଯ୍ୟକ୍ରମକୁ ଉଦଘାଟନ କଲା ପରେ 

ଛାତ୍ରୀଙ୍କ ମଧ୍ୟରେ ବିଭିନ୍ନ କ୍ରୀଡାର ପ୍ରତିଯୋଗୀତା ଆରମ୍ଭ ହୋଇଥିଲା । କ୍ରୀଡା ପ୍ରତିଯୋଗୀତାକୁ ଟାଉନ ବାଳିକା ହାଇସ୍କୁଲର ପିଇଟି ସୁଜାତା ମଲ୍ଲିକ,ଟାଉନହାଇସ୍କୁଲ ପିଇଟି ବିକାଶ ଦାସ,ପୋଲିସ ହାଇସ୍କୁଲ ପିଇଟି ଆରତୀ ସାହୁ  ପରିଚାଳନା କରିଥିଲେ । ଏହି ଅବସରରେ ଅତିଥିଗଣଙ୍କୁ ମାନପତ୍ର ଓ ଉପଢୌକନ ଦେଇ ସମ୍ବର୍ଦ୍ଧିତ କରାଯାଇଥିଲା । ସେହିପରି ଶିକ୍ଷୟିତ୍ରୀ ଅରୁନ୍ଧତି ବଢେଇ,ସତ୍ୟାନନ୍ଦ ବିଶ୍ୱାଳ ମାନପତ୍ର ପଠନ କରିଥିବା ବେଳେ ଶିକ୍ଷୟିତ୍ରୀ ଝୁନିତା ଭୋଇ ଧନ୍ୟବାଦ ଅର୍ପଣ କରିଥିଲେ ।