15-Dec-2025

ବଲାଙ୍ଗୀର (ପ୍ରେରଣା ଖବର): ଅନ୍ନଦାତା ମହା ସଙ୍କଟରେ | ଯିଏ ସାରା ବିଶ୍ୱକୁ ଆହାର ଯୋଗାଏ ସିଏ ଆଜି ଚିନ୍ତାରେ | ନିଜର ଚାଷ ଜମିରେ କିମ୍ବା ଚାଷୀ ମାନେ ଭାଗ ଚାଷୀ ହିସାବରେ ଧାର କରଜ କରି ବହୁତ ପରିଶ୍ରମକରି ମୁଣ୍ଡ ଝାଳ ତୁଣ୍ଡେ ମାରି ଖରା ବର୍ଷାରେ ଚାଷ କରିଥାଏ | ଚାଷୀ ଜାଣେ ଚାଷ କରିବା ଦୁଃଖ | କେତେବେଳେ ପ୍ରକୃତି ଚାଷୀକୁ କେତେ କଷ୍ଟ ଦେଇଥାଏ, କେତେବେଳେ ରୋଗ ପୋକ ତ କେତେବେଳେ ଅଦିନିଆ ବର୍ଷା, କେତେବେଳେ ଲଗାଣ ବର୍ଷା, କେତେବେଳେ ଅମଳ ସମୟରେ ଫସଲ ନଷ୍ଟ ହେବାର ବର୍ଷା ସବୁକୁ ସାହିଯାଏ ଚାଷୀ | ଚାଷ କାର୍ଯ୍ୟ ସରି ଅମଳ ହୋଇ ଅମଳ ଧାନ ଘରେ ରଖା ହୋଇଛି | ଚାଷୀ ଭାବିଛି ଅମଳ ଧାନ କିଛି ବିକ୍ରୟ କରି ଧାର କରଜ ପରିଶୋଧ କରିବା ପାଇଁ କିନ୍ତୁ ଚାଷୀର ଦୁଃଖ କେବେ ସରେ ନାହିଁ | ବିଗତ ଦିନରେ ଚାଷୀକୁ ପ୍ରକୃତି ଦୁଃଖ ଦେଇଥିବାବେଳେ ଏବେ ରାଜ୍ୟ ସରକାର ଦୁଃଖ ଦେଉଛି |  ଚାଷୀ ଧାନ ବିକିବା ପାଇଁ କାହିଁ କେତେ ଦିନରୁ ପଞ୍ଜିକରଣ କରି ସାରିଛି ହେଲେ ଧାନ ବିକ୍ରି ପାଇଁ ଟୋକନ ମେସେଜ ଅପେକ୍ଷାରେ ଚାଷୀ | ଟୋକନ ଆଜି ଆସିବ କାଲି ଆସିବ କିନ୍ତୁ ଡିସେମ୍ବର ମାସ ସରିବାକୁ ଆଉ କିଛି ଦିନ ବାକି, ପୌଷପୁନି ମଧ୍ୟ ଆସିଯିବ କିନ୍ତୁ ଚାଷୀ ତାର କଷ୍ଟଉପାର୍ଜିତ ଧାନ ବିକି ପାରିନାହିଁ | ଏଭଳି ହେବା ଦ୍ୱାରା ଚାଷୀ ସରକାର ପାଖରେ ନ ବିକି ବାଧ୍ୟ ହୋଇ ବେପାରୀ ପାଖରେ କମ ଦରରେ ବିକି ଦେବ | ଚାଷୀ ସମସ୍ୟାକୁ ସମାଧାନ କରିବା ପାଇଁ କେନ୍ଦ୍ର ଓ ରାଜ୍ୟ ସରକାର ଉଭୟେ ବିଫଳ | ଡବଲ ଇଞ୍ଜିନ ସରକାରରେ ଚାଷୀ ଡବଲ ରୁ ଟିବଲ ହଇରାଣ ହେଉଛି | ଚାଷୀର ସମସ୍ୟା ସମାଧାନ ପାଇଁ ବିଭିନ୍ନ ରାଜନୈତିକ ଦଳର କୃଷକ ମୋର୍ଚ୍ଚା ମାନେ ମଧ୍ୟ ନିଦାବିଷ୍ଣୁ ସାଜିଛନ୍ତି | ରାଜ୍ୟ ସରକାର ଧାନର ମୂଲ୍ୟ କ୍ୟୁଣ୍ଟାଲ ପ୍ରତି 3100 ଟଙ୍କା ବଢ଼େଇ ବାହାବା ନେଉଥିବାବେଳେ ଏବେ ଚାଷୀର  ଅମଳ ଧାନ କ୍ରୟ କରିବା ପାଇଁ ଅକଲଗୁଡ଼ୁମ ହେଇ ଯାଉଛି | ପ୍ରଥମେ ଅନେକ ଦିଗରୁ ଚାଷୀକାର୍ଡ କାଟିବା ପାଇଁ ଯୋଜନା କଲା ଏବେ ଘୋଷଣା କରିଛନ୍ତି ଯେଉଁ ରାସନକାର୍ଡଧାରୀ ଚାଷୀ ପରିବାର ର ଅଢ଼େ ଏକର ଜମି ଥିବ କିମ୍ବା 30 କ୍ୟୁଣ୍ଟାଲ ଧାନ ଅମଳ କରୁଥିବ ସେହି ଚାଷୀର ରାସନ କାର୍ଡ କାଟିଦେବେ ରାଜ୍ୟ ସରକାର | ଚାଷୀର ସମସ୍ୟା ସମାଧାନ କରିବା ପାଇଁ, ଗରିବର ସମସ୍ୟା ସମାଧାନ କରିବା ପାଇଁ, ବେକାରୀ ସମସ୍ୟା ସମାଧାନ କରିବା ପାଇଁ, ବୃଦ୍ଧ ବୃଦ୍ଧାଙ୍କ ଭତ୍ତା ସମସ୍ୟା ସମାଧାନ କରିବା ପାଇଁ, ଦାଦନ ସମସ୍ୟା ସମାଧାନ କରିବା ପାଇଁ ରାଜ୍ୟ ରାଜକୋଷରେ ଯଦି ଟଙ୍କାର ଅଭାବ ରହିଛି କିନ୍ତୁ ବିଧାୟକ ମାନେ ନିଜ ଦରମା ବଢେଇବା ପାଇଁ କେଉଁ ରାଜକୋଷରୁ ଭରଣା ହେବ | ଚାଷୀ ସମସ୍ୟା ସମାଧାନ ସହ ଚାଷୀର ଧାନ କ୍ରୟ କରିବା ଏବଂ ରାସନକାର୍ଡ ଧାରୀ ମାନଙ୍କ ରାସନ କାର୍ଡ କାଟିବା ନିର୍ଦ୍ଧେଶାବଳୀକୁ ପ୍ରତ୍ୟାହାର କରିବା ପାଇଁ ଆଜି ଜିଲ୍ଲା ଆଦିବାସୀ କଲ୍ୟାଣ ସଂଘର ଯୁଗ୍ମ ସମ୍ପାଦକ ଗିରିରାଜ ଭୋଇଙ୍କ ନେତୃତ୍ୱରେ ଉପଜିଲ୍ଲାପାଳଙ୍କ ଅନୁପସ୍ଥିତରେ  ଉପଜିଲ୍ଲାପାଳଙ୍କ ଜରିଆରେ ଜିଲ୍ଲାପାଳ ବଲାଙ୍ଗୀର ଉଦ୍ଦେଶ୍ୟରେ ସହାୟକ ଜିଲ୍ଲାପାଳ ହେତୁରାମ ବିଭାର ଙ୍କୁ ଦାବିପତ୍ର ପ୍ରଦାନ କରିଥିଲେ | ଦାବିପତ୍ର ଦେବା ସମୟରେ ଅନ୍ୟ ମାନଙ୍କ ମଧ୍ୟରେ ଗୌରୀ ଶଙ୍କର ବରିହା, ମଦନ ମାଝୀ, ଯୁଧିଷ୍ଠିର ମିର୍ଦ୍ଧା, ଶେଷଦେବ ବେହେରା, ଟିକେଶ୍ୱର କୁମୁରା ଉପସ୍ଥିତ ଥିଲେ |