29-Nov-2025

ନିଜ ଅନ୍ତର୍ନିହିତଶକ୍ତିକୁ ବିଶ୍ୱକଲ୍ୟାଣ ପାଇଁ ଉପଯୋଗ ହେଉ

ବଲାଙ୍ଗୀର(ପ୍ରେରଣା ଖବର): ଆଜି ସ୍ଥାନୀୟ କଦମପଡା ସରସ୍ୱତୀ ଶିଶୁବିଦ୍ୟାମନ୍ଦିରର ସଭାକକ୍ଷରେ ନିଖିଳଓଡିଶା ସାହିତ୍ୟପରିଷଦର ବଲାଙ୍ଗୀର ଶାଖା ପକ୍ଷରୁ “ଆତ୍ମବୋଧରେ ବିଶ୍ୱବୋଧ” ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି । ବିଦ୍ୟାଦାତ୍ରୀ ଦେବୀସରସ୍ୱତୀ ଓ ଭାରତମାତାଙ୍କ ପୂଜାର୍ଚ୍ଚନା ପରେ ସାହିତ୍ୟପରିଷଦର ବଲାଙ୍ଗୀର ଶାଖାର ସଭାପତି ଡ.ଭବାନୀଶଙ୍କର ପଟେଲଙ୍କ ସଭାପତିତ୍ୱ ଓ ବିଦ୍ୟାମନ୍ଦିରର

ଗୁରୁମା ଭାରତୀ ସାହୁଙ୍କ ସଂଯୋଜନାରେ ଅନୁଷ୍ଠିତ ଏହି ଆଲୋଚନାଚକ୍ରରେ ବରେଣ୍ୟ ଅତିଥି ଭାବରେ ସାହିତ୍ୟ ପରିଷଦର ରାଜ୍ୟକାର୍ଯ୍ୟକାରିଣୀ ସଭ୍ୟ ତଥା ଶିକ୍ଷାବିଦ ଗିରିଜାଶଙ୍କର ରଥ, ମୁଖ୍ୟବକ୍ତା ଭାବରେ ବରିଷ୍ଠ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା, ସମ୍ମାନୀତ ଅତିଥି ଭାବରେ ଶିଶୁବିଦ୍ୟାମନ୍ଦିର ପରିଚାଳନା କମିଟି ସଂପାଦକ ତରଣୀସେନ ପଟେଲ ଯୋଗ ଦେଇଥିଲେ । ସାହିତ୍ୟ ପରିଷଦର ଜିଲ୍ଲାସଂପାଦକ ରାମଚନ୍ଦ୍ର ପଟେଲ ଆଲୋଚନାଚକ୍ରର ଉଦ୍ଦେଶ୍ୟ ଜ୍ଞାପନ କରିଥିଲେ । ମୁଖ୍ୟବକ୍ତା ତାଙ୍କ ଆଲୋଚନାକାଳରେ କହିଲେ ଯେ, ବୈଦିକ ଯୁଗରୁ ଆମର ମୁନୀଋଷି,ମହାମନୀଷି ଓ ଶାସ୍ତ୍ରଗୁଡିକ ମଣିଷକୁ ନିଜର ଆନ୍ତରାତ୍ମାକୁ ଚିହ୍ନ ମାନବୀୟ ଗୁଣ ନେଇ କାର୍ଯ୍ୟ କରିବାକୁ ପରାମର୍ଶ ଦେଇଆସିଛନ୍ତି । ଆଜି ମଣିଷ ସମାଜ ଯେତେ ନିଜକୁ ଉନ୍ନତ ଭାବୁଛି ସେତେ ନିଜଉପରେ ଆତ୍ମବିଶ୍ୱାସ ମଧ୍ୟ ହରାଉଛି । ମଣିଷଠାରୁ ମଣିଷ ଦୂରେଇ ଯାଉଛି ଓ ଶିଶୁମାନଙ୍କଠାରେ ଆତ୍ମବଳ କମିଯାଇ ଆତ୍ମହତ୍ୟା ପ୍ରବଣତା ବଢିଯାଉଛି । ଗର୍ବ ଓ ଅହଙ୍କାର ଓ ଅସୁୟାଭାବରେ ମଣିଷ ମଦମତ୍ତ ହୋଇ ଆତ୍ମବୋଧକୁ ଭୁଲିଯାଉଛି । ନିର ଶକ୍ତିସାମର୍ଥ୍ୟ ଉପରେ ଭରସା ରଖୁନାହିଁ । ତେଣୁ ଆଜି ସମୟ ଆସିଛି ନିଜର ଜ୍ଞାନର ସୀମାବଢାଇବା ସହିତ ଆନ୍ତର୍ନିହିତ ଶକ୍ତିକୁ ଜାଗ୍ରତ କରି ବିଶ୍ୱକଲ୍ୟାଣ ନିମିତ୍ତ ତାହାର ଉପ ଯୋଗ କରାଯିବା ଆବଶ୍ୟକ ବୋଲି କହିଥିଲେ । ନିଜେ ନିଜକୁ ଚିହ୍ନିଲେ ଓ ବିଶ୍ୱର ଆବଶ୍ୟକତାକୁ ଉପଲବ୍ଧିକରି ନିଜର କର୍ତ୍ତବ୍ୟ ସ୍ଥିର କଲେ ସମାଜର ମଙ୍ଗଳସାଧିତ ହୋଇପାରିବ ବୋଲି ମତପ୍ରକାଶ ପାଇଥିଲା । ବରେଣ୍ୟ ଅତିଥି ଶିକ୍ଷାବିଦ ରଥ ତାଙ୍କ ବକ୍ତବ୍ୟରେ ଭାରତରେ ଭାଷା,ସାହିତ୍ୟ ଓ ସଂସ୍କୃତିକୁ

ସୁରକ୍ଷା କରିବାରେ ନିଖିଳ ଭାରତୀୟ ସାହିତ୍ୟ ପରିଷଦ କାର୍ଯ୍ୟକରୁଛି । ଦେଶର ସବୁ ଅଞ୍ଚଳରୁ କବି, ଲେଖକ, ସାହିତ୍ୟିକଙ୍କୁ ତାଙ୍କର ଲେଖାକୁ ପ୍ରକାଶ କରିବାକୁ ସୁଯୋଗ ଦେଉଥିବା କହିଥିଲେ । ଏହି କାର୍ଯ୍ୟକ୍ରମରେ ସାହିତ୍ୟ ପରିଷଦ ର ସଭ୍ୟ/ସଭ୍ୟା ତଥା ଶିଶୁବିଦ୍ୟାମନ୍ଦିରର ଗୁରୁଜୀ/ଗୁରୁମା ମାନେ ଯୋଗଦେଇଥିଲେ । ଶେଷରେ ଶିଶୁବିଦ୍ୟାମନ୍ଦିରର ପ୍ରଧାନଆଚାର୍ଯ୍ୟ ସନାତନ ମିଶ୍ର ଧନ୍ୟବାଦ ଅର୍ପଣ କରିଥିଲେ ।